Cristiano Ronaldo ខ្សែប្រយុទ្ធក្រុម Manchester United មិនសប្បាយចិត្តឡើយ ព្រោះមិនសូវបានចូលលេងគ្រប់គ្រាន់។ នេះបើតាមការលើកឡើងរបស់លោក Erik ten Hag អ្នកចាត់ការទូទៅ បិសាចក្រហម ក្នុងសន្និសីតកាសែតមុនក្រុមប៉ះ Omonia Nicosia ក្នុងការប្រកួតវគ្គសន្សំពិន្ទុពូល E ពានរង្វាន់ Europa League នៅរាត្រីថ្ងៃទី៦ ខែតុលា។
Ronaldo វ័យ៣៧ ឆ្នាំ នារដូវកាលថ្មីនេះ ចាប់ផ្តើមបានត្រឹម ១ប្រកួតប៉ុណ្ណោះសម្រាប់ជម្រើស ១១នាក់ដំបូងនៅក្របខណ្ឌ Premier League និង ២ប្រកួតនៅក្របខណ្ឌអឺរ៉ុប Europa League សម្រាប់ Man United។ ក្នុងជំនួបដែល Man Utd ចាញ់ Manchester City លទ្ធផល ៦-៣ Ronaldo មិនត្រូវបានផ្លាស់ប្តូរឱ្យចូលលេងឡើង ហើយក្រោយចប់ការប្រកួតនោះលោក Ten Hag បាននិយាយប្រាប់អ្នកកាសែតថា ជាកំហុសនៃការសម្រេចចិត្តមួយដែលមិនគោរពដល់អាជីពរបស់ Ronaldo។
ទឹកមុខខ្សែប្រយុទ្ធវ័យ ៣៧ឆ្នាំ បានបង្ហាញច្បាស់ៗពីភាពមិនពេញចិត្តក្រោយក្រុមចាញ់យ៉ាងអាម៉ាស់ ដោយឡែកមុនជំនួបទល់ក្រុម Omonia Nicosia ក្នុងព្រឹត្តិការណ៍ UEFA Europa League ប្រកួតទី៣ អ្នកចាត់ការសញ្ជាតិហូឡង់អះអាងថា Ronaldo មិនសប្បាយចិត្តក៏ព្រោះតែពេលវេលាលេងមិនគ្រប់គ្រាន់។
«គេមិនសប្បាយចិត្តព្រោះគេមិនបានលេងកាលពីថ្ងៃប៉ះ Man City ពិតណាស់គេចង់ទទួលបានពេលវេលាលេងពេញលេញ។ តែទោះជាយ៉ាងណាខ្ញុំនៅតែនិយាយដដែលថា គេហ្វឹកហាត់បានល្អ គេមានអារម្មណ៍ល្អ គេប្តេជ្ញាចិត្ត។»។ នេះជាការលើកឡើងរបស់លោក Ten Hag។
សម្រាប់ Man Utd ដែលត្រូវប៉ះ Omonia Nicosia នៅជំនួបលើទី៣របស់ខ្លួន ស្ថិតនៅចំណាត់ថ្នាក់លេខ២ក្នុងពូល E មាន៣ពិន្ទុ តាមពីក្រោយក្រុមកំពូលតារាង Real Sociedad ដែលមាន ៦ពិន្ទុពេញ។ ក្រុម FC Sheriff ឈរលេខ៣ មាន ៣ពិន្ទុដូចគ្នា ខណៈ Omonia Nicosia នៅបាតតារាងគ្មានពិន្ទុរាប់។
ចំណែកការប្រកួតក្នុងពូល E នេះដែល Real Sociadad ត្រូវធ្វើដំណើរទៅទឹកដី FC Sheriff ដើម្បីតតាំងស្វែងរកពិន្ទុបន្ថែមវេលាម៉ោង ១១:៤៥នាទីយប់។
ខាងក្រោមនេះជាការប្រកួតរបស់ក្រុមដទៃផ្សេងទៀតក្នុងពានរង្វាន់ Europa League រាត្រីថ្ងៃទី៦ ខែតុលានេះ៖
ពូល A
ក្រុម FC Zurich ទទួល PSV Eindhoven ម៉ោង ១១:៤៥យប់
Arsenal ប៉ះ Bodoe/Glimt ម៉ោង ២យប់
ពូល B ក្រុម Fenerbahce ទទួល AEK Larnaca និង Rennes ទទួល Dynamo Kyiv ម៉ោង ២យប់
ពូល C ក្រុម HJK Helsinki ស្វាគមន៍ Ludogorets Razgrad ១១:៤៥យប់ និង Roma ទទួល Real Betis ២យប់
ពូល D ក្រុម Malmo FF ទទួល Union Berlin ១១:៤៥យប់ និង SC Braga ទទួល Union St. Gilloise ២យប់
ពូល F ក្រុម Sturm Graz ទទួល Lazio ១១:៤៥យប់ និង FC Midtjylland ទទួល Feyenoord ២យប់
ពូល G ក្រុម Freiburg ទទួល Nantes និង Olympiacos ទទួល Qarabag FK ២យប់
ពូល H ក្រុម FK Crvena Zvezda ទទួល Ferencvaros និង Monaco ទទួល Trapzonspor ២យប់៕