ត្រឹមរយៈពេល ១២ថ្ងៃប៉ុណ្ណោះ កូរ៉េខាងជើង បានបាញ់មីស៊ីលរហូតដល់ ៦លើក ដោយក្នុងនោះរួមទាំងការបាញ់មីស៊ីលបាលីស្ទិកចម្ងាយមធ្យមរំលងជប៉ុនថែមទៀត។ បញ្ហានេះ ត្រូវបានសហគមន៍អន្តរជាតិ រួមទាំងក្រុមប្រឹក្សាអង្គការអាកាសចរណ៍ស៊ីវិលអន្តរជាតិ (ICAOC) រិះគន់យ៉ាងខ្លាំង។ 

 

ជាការឆ្លើយតប មន្រ្តីអាកាសចរណ៍កូរ៉េខាងជើងមួយរូប ដែលមិនបានបញ្ចេញឈ្មោះ បានលើកឡើងថា ការសាកល្បងមីស៊ីលខ្លួនជាសកម្មភាពធម្មតា និងការពារពីការគំរាមកំហែងរបស់អាម៉េរិកដោយផ្ទាល់។ 

 

«ការសាកល្បងមីស៊ីលរបស់យើង គឺធម្មតា និងរៀបចំគម្រោងលើចំណាត់ការការពារខ្លួន ដើម្បីការពារសន្តិសុខប្រទេស រួមទាំងសន្តិភាពក្នុងតំបន់ពីការគំរាមហែងរបស់អាម៉េរិកដោយផ្ទាល់»។ មន្រ្តីកូរ៉េខាងជើង បានសង្កត់ធ្ងន់បែបនេះ នៅក្នុងសេចក្តីថ្លែងការណ៍មួយចេញផ្សាយដោយទីភ្នាក់ងារព័ត៌មាន KCNA។ 

 

បើតាមមន្រ្តីរូបនោះ ការសាកល្បងមីស៊ីលមិនបង្កការគំរាមកំហែង ឬប៉ះពាល់សុវត្ថិភាពអាកាសចរណ៍ស៊ីវិល ក៏ដូចជាសុវត្ថិភាពប្រទេសជិតខាង ឬក្នុងតំបន់ឡើយ។ 

 

ក្នុងថ្ងៃដដែល ក្រសួងការពារជាតិកូរ៉េខាងជើង បានចេញសេចក្តីថ្លែងការណ៍ដាច់ដោយឡែកមួយទៀត ដោយអះអាងថា ខ្លួនកំពុងតាមដានយ៉ាងដិតដល់លើសមយុទ្ធយោធារវាងអាម៉េរិក និងកូរ៉េខាងត្បូង ដោយមានការចូលរួមពីនាវាដឹកយន្តហោះចម្បាំងអាម៉េរិក USS Ronald Reagan។

 

សូមបញ្ជាក់ថា មួយរយៈចុងក្រោយ ឧបទ្វីបកូរ៉េ មានភាពតានតឹងយ៉ាងខ្លាំង ខណៈរដ្ឋបាលកូរ៉េខាងត្បូងថ្មី ដែលដឹកនាំដោយលោក យូន សុកយ៉ល បានបង្ហាញជំហរយ៉ាងមុតមាំចំពោះកូរ៉េខាងជើង៕