ការិយាល័យអន្តោប្រវេសន៍ថៃ នៅថ្ងៃទី៩ ខែតុលា បានដកទិដ្ឋាការរបស់អ្នកយកព័ត៌មាន CNN ពីររូប បន្ទាប់ពីបានចូលទៅខាងក្នុងអាគារកើតហេតុនៃការបាញ់ប្រហារនៅក្នុងមណ្ឌលថែទាំកុមារកាលពីចុងសប្ដាហ៍មុន។ អ្នកទាំងពីរ ចូលមកថៃដោយប្រើទិដ្ឋាការទេសចរណ៍។
ស្នងការរងនៃការិយាល័យអន្តោប្រវេសន៍ថៃ លោកឧត្តមសេនីយ៍ទោ Archayon Kraithong នៅថ្ងៃទី៩ ខែតុលា បានលើកឡើងថា ទិដ្ឋាការរបស់សមាជិកក្រុមទូរទស្សន៍ CNN ឈ្មោះ Anna Marguerite Coren ភេទស្រី អាយុ ៤៧ឆ្នាំ សញ្ជាតិអូស្ត្រាលី និងម្នាក់ទៀតជាអ្នកថតរូប Daniel John Hodge ភេទប្រុស អាយុ ៣៤ឆ្នាំ ជាជនជាតិអង់គ្លេស ត្រូវបានដក។ អ្នកទាំងពីរ រងការរិះគន់ខ្លាំងក្រោយចូលទៅដល់ខាងក្នុងទីតាំងកើតហេតុក្នុងមណ្ឌលថែកុមារក្នុងខេត្ត Nong Bua Lamphu។
«ពួកគេចូលមកថៃតាមទិដ្ឋាការទេសចរដែលមិនអនុញ្ញាតឲ្យពួកគេធ្វើការនៅទីនេះឡើយ។ លោកឧត្តមសេនីយ៍ទោ Archayon ដែលជាអ្នកនាំពាក្យប៉ូលិសថៃផងដែរ បានអះអាងបែបនេះ។
អ្នកទាំងពីរបានមកដល់ថៃ នៅថ្ងៃទី៦ ខែតុលា ហើយទទួលបានការអនុញ្ញាតឱ្យនៅក្នុងទឹកដីថៃរហូតដល់ថ្ងៃទី១៩ ខែវិច្ឆិកា ក្នុងនាមជាភ្ញៀវទេសចរ។ នេះបើតាមការចុះផ្សាយរបស់ការសែតបាងកកប៉ុស្តិ៍។
បើតាមអគ្គស្នងការរងនគរបាលជាតិថៃ លោកឧត្តមសេនីយ៍ Surachate Hakparn ក្រោយកើតហេតុ កន្លែងថែកុមារនោះត្រូវសមត្ថកិច្ចបិទភ្លាមៗដើម្បីប្រមូលព័ស្តុតាង។ ប៉ុន្តែអ្នកយកព័ត៌មានរបស់ CNN ទាំងពីររូបនោះទៅយកព័ត៌មាន ដោយអះអាងថា ទទួលបានការអនុញ្ញាតពីមន្រ្តីសុខាភិបាលនៅនឹងកន្លែង។ នៅពេលចេញ អ្នកទាំងពីរ ក៏ផ្លោះរបង ព្រោះទីតាំងកើតហេតុត្រូវបានបិទ។
លោកឧត្តមសេនីយ៍ Hakparn អះអាងថាអ្នកយកព័ត៌មាន CNN ទាំងពីរនោះពួកគេគ្មានចេតនារំលោភបំពានលើទ្រព្យសម្បត្តិរដ្ឋ ឬបំពានបទបញ្ជារដ្ឋ ឬពាក់ព័ន្ធនឹងព័ស្តុតាងណាមួយឡើយ។
ក្រោយសារព័ត៌មាន CNN ចុះផ្សាយពីព្រឹត្តិការណ៍បាញ់ប្រហារនៅថៃ ក្លិបអ្នកសារព័ត៌មានបរទេសរបស់ថៃ (FCCT) និងសមាគមអ្នកកាសែតថៃ (TJA) បានរិះគន់ទូរទស្សន៍ CNN ចំពោះការចុះផ្សាយរូបភាព និងវីដេអូក្នុងមណ្ឌលថែទាំ។ FCCT អះអាងថា ខ្លួនព្រួយបារម្ភពីការលេចចេញរូបភាពមិនសមរម្យក្នុងការស្លាប់ដែលវាជាទង្វើមិនគោរពដល់អ្នកស្លាប់ និងគ្រួសារសព។
យ៉ាងណាមិញ លោក Mike McCarthy អនុប្រធានប្រតិបត្តិ និងជាអ្នកគ្រប់គ្រងទូទៅរបស់សារព័ត៌មានអន្តរជាតិ CNN បានឆ្លើយតបថា ក្រុមការងាររបស់ CNN បានសុំការអនុញ្ញាតពីមន្ត្រីថៃហើយ មុនចូលទៅថតយករូបភាពក្នុងមជ្ឈមណ្ឌលថែទាំកុមារ ហើយពួកគេមិនដែលមានចេតនាបំពានច្បាប់ថៃទេ។
ទោះជាយ៉ាងណា អាជ្ញាធរថៃ ក៏សម្រេចប្ដឹងអ្នកទាំងពីរចំពោះការចូលតំបន់ហាមឃាត់។ លោក Surachate វិញ អះអាងថា អ្នកទាំងពីរ ក៏នឹងរងបទចោទមួយចំនួនទៀតដែរ៕