ជាតិ
បង្កាន់ដៃនាគខាងត្បូងប្រាសាទអង្គរវត្តកំពុងជួសជុលកែលម្អឡើងវិញ ការជួសជុលបង្កាន់ដៃនាគច្រកខាងត្បូងប្រាសាទអង្គរវត្ត។ រូបភាពពីអាជ្ញាធរជាតិអប្សរា
× សៀមរាប៖ បង្កាន់ដៃនាគច្រកខាងត្បូងប្រាសាទអង្គរវត្ត កំពុងទទួលបានការជួសជុលឡើងវិញ ខណៈទីតាំងនេះរងការខូចខាតរចនាសម្ព័ន្ធមួយផ្នែក។
បុរាណវិទូលោក សយ សុភារិន្ទ បានឱ្យដឹងថា បង្កាន់ដៃនាគច្រកខាងត្បូងត្រូវបានជួសជុល និងពង្រឹងគ្រឹះឱ្យមានភាពរឹងមាំឡើងវិញ។ លោកពន្យល់ថា ទីតាំងនេះមានហានិភ័យដូចជា ទឹកភ្លៀងហូរច្រោះដី ធ្វើឱ្យថ្មញែកចេញពីគ្នា និងអាចដួលរលំ។
ក្រុមការងារនៃនាយកដ្ឋានអភិរក្សប្រាសាទ និងបុរាណវិទ្យា បានចាប់ផ្តើមរើថ្មខឿនបង្កាន់ដៃនាគ នៅដើមខែកក្កដា និងបានបង្ហាប់ដីឱ្យហាប់ល្អធ្វើយ៉ាងណាឱ្យគ្រឹះខឿនមានភាពរឹងមាំ ធានាបានការ ប្រើប្រាស់យូរអង្វែង។ លោក សយ សុភារិន្ទ ដែលដឹកនាំការងារជួសជុលបានពន្យល់ថា៖« ថ្មខឿនវាញែកចេញពីគ្នាដោយសារទឹកភ្លៀងហូរច្រោះនាំដី រុញហូរតាមចន្លោះថ្មពីមួយដុំទៅៗ ទើបយើងត្រូវធ្វើម៉េចបង្ហាប់គ្រឹះឱ្យជាប់ល្អ ទើបយើងរៀបថ្មបង្កាន់ដៃនាគទៅវិញ»។
តាមការពន្យល់ពីលោក សុភារិន្ទ គ្រឹះនៃបង្កាន់ដៃនាគ ខាងក្នុងគេបានរៀបថ្មបាយក្រៀមដើម្បីទប់ដី រីឯខាងក្រៅគេប្រើថ្មភក់។ ដោយសារអាយុកាលធ្វើឱ្យថ្មខ្លះនៃគ្រឹះមានការខូចខាត ស្អុយ ដែលការជួសជុល ដកថ្មស្អុយនោះចេញ ដោយប្រើថ្មថ្មីជំនួសមួយផ្នែកផងដែរ។ ចំណុចខ្លះមានការបាក់បែក បាត់ថ្ម ដែលត្រូវយកថ្មថ្មីមកជំនួសដូចគ្នា។ នេះជាការបញ្ជាក់ពីប្រធានការដ្ឋានលោក សយ សុភារិន្ទ។
មន្រ្តីអាជ្ញាធរជាតិអប្សរារូបនេះបន្តថា៖« ចំពោះនាគ ក៏មានកន្លែងខ្លះបាក់ និងពុកផុយដែរ ក៏ត្រូវជួសជុល ត ផ្គុំឡើងវិញ ទើបយកទៅដាក់ទីតាំងដើម ជើងទម្រនាគក៏ដូចគ្នា ថ្មដែលបាក់បែក ខូច ត្រូវដាក់ថ្មថ្មីជំនួស ឬឆ្លាក់ឡើងវិញ»។
គួរបញ្ជាក់ថា បង្កាន់ដៃនាគច្រកខាងត្បូងប្រាសាទអង្គរវត្ត ដែលកំពុងជួសជុលនៅពេលនេះ មានប្រវែងប្រហែល១០ម៉ែត្រ។ ច្រកនេះជាទីតាំងសំខាន់មួយ ដែលជាចរាចរសំខាន់សម្រាប់ភ្ញៀវទេសចរ។ ការរៀបចំ និងកែលម្អសោភ័ណភាពឡើងវិញ ជាផ្នែកមួយសំខាន់ដើម្បីលើកតម្លៃនៃបុរាណដ្ឋានឡើងវិញ។ ក្រៅពីច្រកខាងត្បូងនេះ អ្នកបុរាណវិទ្យា សយ សុភារិន្ទ បញ្ជាក់ថា ច្រកផ្សេងទៀតក៏សុទ្ធតែមានហានិភ័យ ដែលត្រូវឱ្យអាជ្ញាធរយកចិត្តទុកដាក់ និងជួសជុលឡើងវិញដូចគ្នា។ លោករំពឹងថា ការងារជួសជុលខាងលើនេះ អាចនឹងរួចរាល់ជាស្ថាពររយៈពេលបីខែ ប្រសិនពុំមានការរំខានដោយសារ ភ្លៀងធ្លាក់ញឹកញាប់៕
© រក្សាសិទ្ធិដោយ thmeythmey.com