ថៃ ជាប្រទេសមួយនៅក្នុងតំបន់អាស៊ីអាគ្នេយ៍ ដែលបើកចំហចំពោះសហគមន៍ស្រលាញ់ភេទដូចគ្នា និងគាំទ្របុគ្គលដែលចង់កែភេទ។ តាមការបញ្ជាក់របស់ប្រមុខរដ្ឋាភិបាល សេដ្ឋា ថាវីស៊ីន គណៈរដ្ឋមន្រ្តី បានអនុម័តសេចក្តីស្នើច្បាប់ ដែលទទួលស្គាល់តាមផ្លូវច្បាប់លើការរៀបអាពាហ៍ពិពាហ៍សម្រាប់មនុស្សមានភេទដូចគ្នា។ សេចក្តីស្នើច្បាប់មួយនេះ នឹងបញ្ជូនទៅសភា ដែលចាប់ផ្តើមកិច្ចប្រជុំនៅក្នុងថ្ងៃទី១២ ខែធ្នូខាងមុខ។ 

 

ប្រសិនបើសេចក្តីស្នើច្បាប់នេះ អាចក្លាយទៅជាច្បាប់មែន ថៃនឹងក្លាយជារដ្ឋទីបី ដែលអនុញ្ញាតឱ្យមានការរៀបអាពាហ៍ពិពាហ៍សម្រាប់អ្នកស្រលាញ់ភេទដូចគ្នា។ កន្លងមក តៃវ៉ាន់ និងនេប៉ាល់ បានអនុញ្ញាតឱ្យមានការរៀបអាពាហ៍ពិពាហ៍បែបនេះ។ 

 

សេចក្តីស្នើច្បាប់មួយនេះ ត្រូវបានផ្តួចផ្តើមឡើងដោយបក្សឆ្ពោះទៅមុខ ហើយត្រូវបានឆ្លងកាត់ដំណាក់កាលការអានលើកទីមួយ នៅឆ្នាំ២០២២។ យ៉ាងណាមិញ សេចក្តីស្នើច្បាប់ខាងលើ ត្រូវព្យួរទុកសិនមុនការបោះឆ្នោតក្នុងខែឧសភា កន្លងទៅ។ 

 

លោកនាយករដ្ឋមន្រ្តី បានលើកឡើងផងដែរថា រដ្ឋាភិបាលថៃ កំពុងពិចារណាលើសេចក្តីព្រាងច្បាប់ឱ្យប្រជាជនថៃអាចប្តូរការកំណត់ភេទរបស់ខ្លួន និងសេចក្តីព្រាងច្បាប់លែងកំណត់ពេស្យាចារជាបទល្មើសព្រហ្មទណ្ឌ។ នេះបើតាមការចុះផ្សាយរបស់សារព័ត៌មាន Thai Enquirer។ 

 

ស្របគ្នានេះ រដ្ឋាភិបាលរបស់លោកសេដ្ឋា ក៏បានដាក់សំណើក្នុងការរៀបចំព្យុហយាត្រាអ្នកស្រឡាញ់ភេទដូចគ្នា  World Pride នៅក្នុងឆ្នាំ២០២៨ ដែរ។ ក្នុងយុទ្ធនាការឃោសនាការបោះឆ្នោតកន្លងមក បក្សភឿថៃ និងបក្សឆ្ពោះទៅមុខ បានបង្ហាញពីការគាំទ្រចំពោះអ្នកស្រលាញ់ភេទដូចគ្នា៕