កីឡាការិនី ដែលមានបទពិសោធន៍ក្នុងការប្រកួតជាង១០ឆ្នាំមកនេះ បាននិយាយថា ដ្បិតឆ្នាំនេះ មានទូកនារីចូលរួមតិចមែន តែវាបង្ហាញឱ្យឃើញពីក្លាហានរបស់ស្តី្រ ដែលមិនចាញ់បុរសឡើយ។ តែយ៉ាងណាកីឡាការិនីរូបនេះ ចង់ឃើញទូកនារី ចូលរួមប្រកួតឱ្យបានច្រើនឡើងវិញ នាឆ្នាំក្រោយៗទៀត។ «នាងខ្ញុំមានការបារម្ភច្រើន ហើយបើតាមគោលការណ៍ចិត្ត ចង់ឱ្យមានទូកនារីចូលរួមច្រើន។ ឥឡូវមានតែទូកនារី២ទូក និងទូកចែវនារី១ទូក ឃើញថាខ្សត់ណាស់»។ នេះជាអារម្មណ៍របស់កីឡាការិនី ទូក«ដូនពេញសែនជ័យបារមីសារាវ័នតេជោ» នៃរាជធានីភ្នំពេញ។
 

មូលហេតុដែលនាំ​ឱ្យទូកនារីខ្សត់ខ្សោយនេះ អាចមកពីកត្តាខកខានរៀបចំពិធីបុណ្យអុំទូក ដែលនាំឱ្យពិបាកក្នុងការរកនារី មកជួយទូក។ ម្យ៉ាងទៀត នារីៗបច្ចុប្បន្ន ហាក់ដូចជាមិនសូវចាប់អារម្មណ៍ចូលរួមជាចំណុះទូកក្នុងការប្រកួតប្រជែងនេះ។ មិនត្រឹមតែជាកីឡាការិនីទេ សូម្បីតែអ្នករាំក្បាលទូកបច្ចុប្បន្ននេះ ក៏លែងសូវមាននារីដូចមុនដែរ។