បេីតាមលោក ស៊ុយ កុកធាន គុណភាពស្វាយចន្ទីកម្ពុជា គឺល្អជាងគេ។ អនុប្រធានសមាគមស្វាយចន្ទីកម្ពុជា បន្តបែបនេះ៖ «អ្វីដែលខ្ញុំរំពឹងទុក គឺគុណភាពស្វាយចន្ទីរបស់ប្រទេសកម្ពុជាយេីង គឺនៅលេីពិភពលោក មិនមាននរណាប្រៀបបានទេ»។ 

 

កម្ពុជា មានគោលដៅក្លាយជា«អធិរាជគ្រាប់ស្វាយចន្ទី»។ កាលពីខែមីនា ឆ្នាំ២០២៣ សម្ដេច ហ៊ុន សែន អតីតនាយករដ្ឋមន្ត្រីកម្ពុជា បានថ្លែងចេញខេត្តពោធិ៍សាត់ដូច្នេះ៖«ខ្ញុំចង់ធ្វើឱ្យប្រទេសកម្ពុជា ក្លាយទៅជាប្រទេសអធិរាជស្វាយចន្ទី។ ឥឡូវស្វាយចន្ទីបានផលិតច្រើនជាងគេទាំងអស់។ គ្រាន់តែយើងមិនទាន់មានការកែច្នៃ។»

 

សូមបញ្ជាក់ថា កាលពីខែមិថុនាកន្លងទៅ រដ្ឋាភិបាលបានដាក់ចេញគោលនយោបាយជាតិស្តីពី«ស្វាយចន្ទី» ដែលមានចក្ខុវិស័យអភិវឌ្ឍន៍ផលិតកម្ម កែច្នៃ និងទីផ្សារស្វាយចន្ទី ឱ្យមានលក្ខណៈប្រកួតប្រជែងប្រកបដោយបរិយាបន្ន ធានានូវនិរន្តរភាព និងការធ្វើពិពិធកម្មសេដ្ឋកិច្ចផងដែរ៕