ការបិទជណ្តើរយន្តនៅតាមក្រសួងនានាអំឡុងក្រៅម៉ោងធ្វើការ និងផ្អាកយកទឹកដបដាក់ក្នុងកិច្ចប្រជុំរបស់ស្ថាប័នរដ្ឋ គឺជាយុទ្ធសាស្ត្រ និងគំនិតផ្តួចផ្តើមដែលរដ្ឋាភិបាលសិង្ហបុរីបានកំពុងអនុវត្តដើម្បីដោះស្រាយការប្រែប្រួលអាកាសធាតុ។

 

របាយការណ៍របស់ GreenGov.SG ចេញផ្សាយនៅថ្ងៃទី១៥ ខែធ្នូ ដោយក្រសួងនិរន្តរភាព និងបរិស្ថាន (MSE) ក៏បានរៀបរាប់លម្អិតអំពីកម្រិតនៃការបំភាយឧស្ម័នផ្ទះកញ្ចក់ ដូចជាការប្រើប្រាស់ថាមពល និងទឹករបស់វិស័យសាធារណៈដែរ។

 

នៅឆ្នាំ ២០៣០ វិស័យសាធារណៈត្រូវកាត់បន្ថយការប្រើប្រាស់ថាមពល និងទឹកឲ្យបានចំនួន ១០ភាគរយហើយកាត់បន្ថយភាពខ្ជះខ្ជាយឲ្យបាន ៣០ភាគរយរៀងគ្នា។ នេះគោលដៅត្រូវបានប្រកាសជាលើកដំបូងដោយរដ្ឋាភិបាលសិង្ហបុរីក្នុងឆ្នាំ២០២១។  

 

អគារទ្រព្យសម្បត្តិរដ្ឋសំខាន់ៗដែលបានអនុវត្តផែនការនេះរួមមាន អគារការិយាល័យ កន្លែងថែទាំសុខភាព សាលារៀន ការដំឡើងឧបករណ៍ប្រើប្រាស់សាធារណៈ ហេដ្ឋារចនាសម្ព័ន្ធដឹកជញ្ជូនសាធារណៈ និងយានជំនិះជាដើម។ 

 

បើតាមរបាយ​ការណ៍​ខាងលើ នេះ​ជា​លើក​ដំបូង​នៅ​អាស៊ី​អាគ្នេយ៍​ដែលទីភ្នាក់ងាររដ្ឋាភិបាល និងស្ថាប័នរដ្ឋរបស់សិង្ហបុរីដែលដាក់ចេញនូវការអនុវត្តនិរន្តរភាពបរិស្ថាននៅក្នុងវិស័យសាធារណៈ ដោយកាត់បន្ថយការបំភាយឧស្ម័នទៅបរិយាកាស។ 

 

ជាមួយនឹងបម្រែបម្រួលអាកាសធាតុកំពុងបន្តគំរាមកំហែងដល់សិង្ហបុរី របាយការណ៍ GreenGov.SG  អាចជួយឲ្យប្រទេសនេះសម្រេចបាននូវផែនការបៃតង២០៣០ ដែលជាចលនាជាតិជំរុញការអភិវឌ្ឍប្រកបដោយចីរភាព។ 

 

សិង្ហបុរីមានគោលបំណងសម្រេចឲ្យបានការបំភាយឧស្ម័នផ្ទះកញ្ជក់សូន្យនៅឆ្នាំ ២០៥០។ គំនិតផ្តួចផ្តើមរបស់ GreenGov.SG ចង់ឱ្យវិស័យសាធារណៈសម្រេចបាននូវគោលដៅនេះ មុន ៥ឆ្នាំគឺត្រឹមឆ្នាំ ២០៤៥៕