មនុស្សរាប់ពាន់នាក់មកពីទីភ្នាក់ងារផ្តល់ជំនួយ ធុរកិច្ច និងសង្គមស៊ីវិល ព្រមទាំងជនភៀសខ្លួន បានចូលរួមក្នុងព្រឹត្តិការណ៍ទីក្រុងហ្សឺណែវ ខណៈដែលចំនួនជនភៀសខ្លួននៅទូទាំងពិភព លោកកើនលើសពីកំណត់ត្រា ១១៤ លាននាក់ ចំពេលមានជម្លោះ ភាពក្រីក្រ និងការប្រែប្រួល អាកាសធាតុ។

 

ឧត្តមស្នងការ UN ទទួលបន្ទុកជនភៀសខ្លួន (UNHCR) លោក Filippo Grandi មានប្រសាសន៍ ថា លោកមានសេចក្តីសោមនស្សរីករាយ និងមានមោទនភាពចំពោះលទ្ធផលដែលកើតមាន ឡើងនៅពេលដែលទីភ្នាក់ងារ UN ប្រឈមមុខនឹងការខ្វះខាតថវិកាយ៉ាងធ្ងន់ធ្ងរ និងព្យាយាម ប្រឆាំងនឹងការការយល់ឃើញរបស់បណ្ដាប្រទេសលោកខាងលិចមួយចំនួនដែលចាត់ទុកថា ជនភៀសខ្លួនគឺជាការគំរាមកំហែងមួយដល់ខ្លួន។

 

«ការងារនេះគឺចាំបាច់សម្រាប់ពិភពលោក ដូចដែលអ្នកបានដឹងហើយថា (ពួកយើង) បន្ត​ ប្រឈមមុខនឹងពេលវេលាដ៏លំបាកបំផុត»។ លោក Grandi បានប្រាប់វេទិកាក្នុងការ ថ្លែងសុន្ទរកថាបិទបែបនេះដោយបន្តថា ស្ថានភាពនៃពិភពលោកទាមទារឱ្យមានការចាប់ ផ្តើមឡើងវិញនៃមនុស្សជាតិ និងថាមពលដើម្បីឆ្លើយតបនឹងបញ្ហាប្រឈមនៅចំពោះមុខពួក យើងដែលរួមទាំងការផ្លាស់ទីលំនៅដោយបង្ខំ។

 

ទោះបីជាយ៉ាងណាក៏ដោយ នៅក្នុងសញ្ញាមួយនៃបញ្ហាប្រឈមរបស់ UNHCR លោក Grandi បានរិះគន់អ្នកដែលព្យាយាមរារាំងសកម្មភាពមនុស្សធម៌ពហុភាគីសម្រាប់ហេតុផលនយោ បាយដែលជាការច្រានចោលជាក់ស្តែងចំពោះរដ្ឋមន្ត្រីការបរទេសហុងគ្រីលោក Peter Szijjarto ដែលបានជំរុញឱ្យមានការទប់ស្កាត់ព្រំដែនកាន់តែខ្លាំងសម្រាប់ជនចំណាកស្រុកនៅក្នុងវេទិកានេះ។

 

លោក Grandi សម្គាល់ផងដែរថា ក្នុងអំឡុងពេលព្រឹត្តិការណ៍បីថ្ងៃ មនុស្សប្រាំពីរលាននាក់ ត្រូវបានផ្លាស់ទីលំនៅដោយសារជម្លោះដ៏ក្ដៅគគុករបស់ស៊ូដង់ ហើយលោកបានអំពាវនាវឱ្យ មានវិធានការដើម្បីជៀសវាងវិបត្តិជនភៀសខ្លួននៅតំបន់កាហ្សាផងដែរ។

 

ទន្ទឹមនឹងការសន្យាហិរញ្ញវត្ថុ ប្រទេសនានាក៏បានសន្យាទទួលយកជនភៀសខ្លួន ១ លាននាក់ ពីប្រទេសទីបីនៅឆ្នាំ២០៣០។ ក្រុមហ៊ុននានារួមទាំងម្ចាស់ក្រុមហ៊ុន IKEA Ingka Group បានអះអាងថា ពួកគេនឹងជួយជនភៀសខ្លួន ១០ ម៉ឺននាក់ឱ្យស្វែងរកការងារធ្វើ។

 

ឯ អគ្គលេខាធិការ UN លោក អាន់តូនីញ៉ូ ហ្គោតេ៉រេសបាននិយាយនៅក្នុងសុន្ទរកថាបិទ បន្ទាប់ពីបានលើកឡើងពីវិបត្តិមនុស្សធម៌នៅក្នុងមីយ៉ាន់ម៉ា យេម៉ែន សូម៉ាលី និងកាហ្សាថា វេទិកានេះកំពុងជួយទប់ស្កាត់ជំនោរនៃទុក្ខវេទនាដែលផ្តល់ក្តីសង្ឃឹមអំពីការយល់ស្របជាសកលដើម្បីដោះស្រាយវិបត្តិជនភៀសខ្លួនតែម្ដង។

គួរបញ្ជាក់ថា UNHCR រៀបចំវេទិកាជនភៀសខ្លួនសកលរៀងរាល់បួនឆ្នាំម្តង ក្រោមក្រប ខណ្ឌមួយដើម្បីចែករំលែកទំនួលខុសត្រូវសម្រាប់ជនភៀសខ្លួនដោយស្មើភាព៕