ជាតិ
គ្រាប់បែកទម្លាក់ពីយន្តហោះជាង៥០ឆ្នាំ នៅកំពង់ចាម ត្រូវបានដោះចេញ
× មជ្ឈមណ្ឌលសកម្មភាពកំចាត់មីនកម្ពុជា (CMAC) បានដោះគ្រាប់បែកមួយ ទម្ងន់ប្រមាណ ២៣០គីឡូក្រាម នៅខេត្តកំពង់ចាមបានជោគជ័យ។ គ្រាប់បែកនេះ ត្រូវបានទម្លាក់ពីយន្តហោះប្រភេទMK82 ជាង៥០ឆ្នាំមកហើយ។ នេះបើតាមហ្វេសប៊ុករបស់លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា បានលើកឡើងថា គ្រាប់បែកនេះ ត្រូវបានប្រទះឃើញក្រោមដីជម្រៅជាង៤ម៉ែត្រ នៅកន្លែងជីកប្រពន្ធ័ធារាសាស្ត្រទឹកមួយ នៅភូមិសំពងជ័យ ឃុំសំពងជ័យ ស្រុកជើងព្រៃ ខេត្តកំពង់ចាម។
បើតាមអគ្គនាយកមជ្ឈមណ្ឌលសកម្មភាពកំចាត់មីនកម្ពុជា គ្រាប់បែកនេះ ត្រូវបានដោះបានជោគជ័យហើយ។ លោក ហេង រតនា អះអាងដូច្នេះ៖ «[ស៊ីម៉ាក់] បានបោសសម្អាតគ្រាប់បែកទម្លាក់ពីយន្តហោះប្រភេទMK82 ទម្ងន់ប្រមាណ២៣០គីឡូក្រាម ដោយបានដោះបន្សាបនិងដឹកជញ្ជូនដោយសុវត្ថិភាព» ។
គួរជម្រាបថា ក្នុងរយៈពេលជាង ៣០ ឆ្នាំមក ចាប់ពីឆ្នាំ១៩៩២ រហូតដល់ខែធ្នូ ឆ្នាំ២០២៣ មជ្ឈមណ្ឌលសកម្មភាពកំចាត់មីនកម្ពុជា (CMAC) បានរុករកឃើញនិងបំផ្លាញចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទប្រមាណជាង ៣ លានគ្រាប់លើផ្ទៃដីចម្ការមីន និងចម្ការគ្រាប់សរុបចំនួនជាង១ ៧៣៥ គីឡូម៉ែត្រក្រឡា។ ក្នុងនោះមីនប្រឆាំងមនុស្សចំនួន ៥៨៩ ៩៦២ គ្រាប់ គ្រាប់មីនប្រឆាំងរថក្រោះចំនួន ១១ ៤៣០ គ្រាប់ គ្រាប់យុទ្ធភណ្ឌមិនទាន់ផ្ទុះចំនួន ២ ៤៤០ ២៩៧ គ្រាប់ គ្រាប់បែកទម្លាក់ពីយន្តហោះរួមនិងគ្រាប់បែកចង្កោមចំនួន ១២៦ ០៩១គ្រាប់៕
Tag:
CMAC
កំពង់ចាម
គ្រាប់បែក
© រក្សាសិទ្ធិដោយ thmeythmey.com