អន្តរជាតិ
វៀតណាមជម្រះក្ដីមន្ត្រី២២នាក់លើករណីពុករលួយក្នុងក្រុមហ៊ុនប្រេងរដ្ឋ លោក Đinh La Thăng អតីតលេខាបក្សក្រុងហូជីមិញ ឈរក្នុងបន្ទប់សវនាការ (រូបភាព៖ TTXVN)
× តុលាការវៀតណាម នៅថ្ងៃទី៨ ខែមករា បានបើកសវនាការជម្រះក្ដីលើជនសង្ស័យចំនួន២២នាក់ក្នុងករណីពុករលួយក្នុងក្រុមហ៊ុនប្រេងរដ្ឋ PetroVietnam ។ ម្នាក់ក្នុងចំណោមជនសង្ស័យទាំងអស់ គឺជាពាណិជ្ជករដែលត្រូវបាននាំខ្លួនពីអាល្លឺម៉ង់កាលពីឆ្នាំមុន និងម្នាក់ទៀតជាអតីតមន្ត្រីជាន់ខ្ពស់បក្សកុម្មុយនីស្តវៀតណាម។ ជនសង្ស័យទាំងអស់ប្រឈមមុខការជាប់ទោស២០ឆ្នាំក្នុងពន្ធនាគារ ឬក៏ឈានដល់ទោសប្រហារជីវិត។
សន្តិសុខត្រូវបានយាមកាមយ៉ាងតឹងរ៉ឹងនៅខាងក្រៅតុលាការប្រជាជនក្រុងហាណូយ នៅថ្ងៃទី៨ ខែមករា ជាទីដែលសវនាការលើសំណុំរឿងបាត់លុយក្នុងក្រុមហ៊ុនប្រេង PetroVietnam ។ ជនសង្ស័យចំនួន២២នាក់មានឈ្មោះក្នុងសំណុំរឿងនេះ ដោយ៨នាក់ជាប់សង្ស័យពីបទបន្លំលុយ ១២នាក់ជាប់ចោទពីបទបំពានបទបញ្ញត្តិរដ្ឋស្ដីពីការគ្រប់គ្រងសេដ្ឋកិច្ច ដែលបណ្ដាលឲ្យមានផលប៉ះពាល់ធ្ងន់ធ្ងរ និងសល់ពីនេះ គឺត្រូវរងការចោទទាំងពីរករណី។
មន្ត្រីមានតំណែងខ្ពស់ជាងគេក្នុងចំណោមមន្ត្រីទាំង២២នាក់ គឺលោក Dinh La Thang ដែលត្រូវបានចាប់ខ្លួនកាលពីខែមុន។ លោក Dinh La Thang គឺជាសមាជិកការិយាល័យនយោបាយបក្សកុម្មុយនីស្តវៀតណាម និងជាលេខាបក្សក្រុងហូជីមិញ។ ប៉ុន្តែលោកត្រូវបានបណ្ដេញចេញពីតំណែងដោយសារករណីបាត់លុយក្នុងសំណុំរឿងបាត់លុយក្នុងក្រុមហ៊ុន PetroVietnam ។ នេះបើតាមការផ្សាយរបស់ទីភ្នាក់ងារព័ត៌មាន AFP ។
ជនសង្ស័យម្នាក់ទៀត គឺលោក Trinh Xuan Thanh ដែលត្រូវនាំខ្លួនពីអាល្លឺម៉ង់កាលពីឆ្នាំមុនដើម្បីចោទប្រកាន់លើករណីបាត់លុយច្រើនជាង១៥០លានដុល្លារក្នុងក្រុមហ៊ុនមួយចំណុះ PetroVietnam ។ ក្រុងបែរឡាំងចោទក្រុងហាណូយថា ចាប់ពង្រត់លោក Trinh Xuan Thanh ផ្ទុយពីឆន្ទៈបុគ្គល។ ប៉ុន្តែលោក Trinh បានបង្ហាញខ្លួនក្នុងទូរទស្សន៍រដ្ឋដោយអះអាងថា លោកត្រឡប់ចូលស្រុកដោយខ្លួនឯងប៉ុណ្ណោះ។
សវនាការនេះគ្រោងបញ្ចប់នៅថ្ងៃទី២១ ខែមករា។ ចំពោះទោសសម្រាប់ការបំពានបទបញ្ញត្តិរដ្ឋ គឺការជាប់ពន្ធនាគារដល់ទៅ២០ឆ្នាំឯណោះ ខណៈដែលទោសធ្ងន់ធ្ងរបំផុតក្នុងសំណុំរឿងបាត់លុយរដ្ឋនេះ អាចឈានដល់ការប្រហារជីវិតតែម្ដង។ យុទ្ធនាការបង្ក្រាបករណីបន្លំលុយរដ្ឋក្នុងវិស័យថាមពល និងធនាគារត្រូវបានរឹតបន្តឹងខ្លាំងកាលពីឆ្នាំមុន ខណៈដែលក្រុមយោធាដណ្ដើមឥទ្ធិពលខ្លាំងក្នុងជួរបក្សកុម្មុយនីស្តវៀតណាម។
ក្រុមអ្នករិះគន់រដ្ឋាភិបាលវៀតណាមបានអះអាងថា យុទ្ធនាការនេះជារឿងនយោបាយ ហើយតិចឬច្រើន គឺសំដៅមន្ត្រីកម្មាភិបាលដែលជិតស្និទ្ធអតីតនាយករដ្ឋមន្ត្រី Nguyen Tan Dung ដែលអស់អំណាចក្នុងមហាសន្និបាតបក្សក្នុងឆ្នាំ២០១៦ ។ លោក Nguyen ដែលមិនអាចប្រជែងកៅអីលេខាបក្សពីលោក Nguyen Phu Trong បាននោះ ត្រូវបានផាត់ចេញពីបក្ស ឯលោក Trong ក៏ក្ដាប់អំណាចបន្តទៀត៕
© រក្សាសិទ្ធិដោយ thmeythmey.com