លុបឈ្មោះ លោក រ៉ុង ឈុន ពីក្របខណ្ឌ, រដ្ឋមន្ត្រីបន្ទោសប្រធាននាយកដ្ឋានលើការគ្រប់គ្រងវត្តមានមន្ត្រី

ជាតិ

លុបឈ្មោះ លោក រ៉ុង ឈុន ពីក្របខណ្ឌ, រដ្ឋមន្ត្រីបន្ទោសប្រធាននាយកដ្ឋានលើការគ្រប់គ្រងវត្តមានមន្ត្រី

06, Feb 2018 , 11:12 am

រូបភាព

ដោយ: ថ្មីៗ

ភ្នំពេញ៖ រដ្ឋមន្ត្រីក្រសួងអប់រំ យុវជន និងកីឡា ស្តីបន្ទោសមន្ត្រីនាយកដ្ឋានស្រាវជ្រាវវិទ្យាសាស្ត្រ ដែលមិនបានគ្រប់គ្រងបុគ្គលិកក្រោមឱវាទ និងខកខានមកបំពេញកាតព្វកិច្ចការងារជាប់លាប់ ចាប់ពីថ្ងៃទី៤ មករា ដល់ថ្ងៃទី៣០មករា ។

សេចក្តីប្រកាសរបស់ក្រសួងអប់រំ ដែលចុះហត្ថលេខាដោយលោក ហង់ ជួន ណារ៉ុន បានបន្ទោសប្រធាននាយកដ្ឋានចំនួន៤រូប ដែលធ្វេសប្រហែសក្នុងការគ្រប់គ្រងមន្ត្រីក្រោមឱវាទមិនបានល្អ ចំពោះករណីដែលពួកគេខកខានបំពេញការងារឲ្យបានទៀងទាត់។ រដ្ឋមន្ត្រីអប់រំ ក៏បានបន្ទោសបុគ្គលិកអប់រំ ដែលខកខានបំពេញកាតព្វកិច្ចការងារជាប់លាប់ ចំនួន២០នាក់ដែរ។

ក្នុងករណីនេះរដ្ឋមន្ត្រីក្រសួងអប់រំ បានដាក់លក្ខខណ្ឌជាលាយលក្ខណ៍អក្សរដូច្នេះថា៖«សាមីជនប្រការ១ (ប្រធាននាយកដ្ឋាន) ត្រូវគ្រប់គ្រងបុគ្គលិកក្រោមឱវាទ ឲ្យស្របតាមច្បាប់ជាធរមាន។ ចំពោះសាមីជនដែលមានឈ្មោះក្នុងប្រការ២ (បុគ្គលិក) ត្រូវមកបំពេញកាតព្វកិច្ចការងារឲ្យបានជាប់លាប់។ ក្នុងករណីដែលបន្តអវត្តមានទៀត ក្រសួងនឹងចាត់វិធានការតាមច្បាប់ដែលនៅជាធរមាន»។

កាលពីថ្ងៃទី៥ កុម្ភៈ ក្រសួងអប់រំ បានលុបឈ្មោះលោក រ៉ុង ឈុន ដែលបម្រើការងារនៅក្នុងនាយកដ្ឋានស្រាវជ្រាវ វិទ្យាសាស្ត្រ ចេញពីក្របខណ្ឌក្រសួងអប់រំ យុវជន និងកីឡា ក្រោមហេតុផលថា លោក រ៉ុង ឈុន អវត្តមានដោយគ្មានច្បាប់អនុញ្ញាត។

លោក រ៉ុង ឈុន កាលពីអំឡុងខែឧសភា ឆ្នាំ២០១៥ កន្លងមក បានសុំព្យួរការងារទៅបម្រើការជាសមាជិកគណៈកម្មាធិការជាតិរៀបចំការបោះឆ្នោត (គ.ជ.ប) ក្នុងកូតាដែលជ្រើសរើសដោយគណបក្សសង្គ្រោះជាតិ។ ប៉ុន្តែក្រោយតុលាការកំពូល រំលាយគណបក្សប្រឆាំង លោក រ៉ុង ឈុន រួមជាមួយលោក គួយ ប៊ុនរឿន និងលោកស្រី តែ ម៉ានីរ៉ុង បានសរសេរលិខិតរួមគ្នាកាលពីថ្ងៃទី២០ ខែវិច្ឆិកា ដើម្បីសុំលាលែងពី គ.ជ.ប។

លោក ហង់ ជួនណារ៉ុន បានបញ្ជាក់នៅក្នុងសេចក្តីសម្រេចរបស់ខ្លួនថា លោក រ៉ុង ឈុន បានអវត្តមានពីការងារដោយ«គ្មានច្បាប់អនុញ្ញាត»តាំងពីថ្ងៃទី១ ខែមករា ឆ្នាំ២០១៨មកម្ល៉េះ៕