ក្រុមសិទ្ធិមនុស្សស្នើឲ្យមេដឹកនាំបារាំង និងអង់គ្លេសលើកបញ្ហាសិទ្ធិមនុស្ស ពេលលោក ប្រាយុទ្ធ ទស្សនកិច្ចអឺរ៉ុប

អន្តរជាតិ

ក្រុមសិទ្ធិមនុស្សស្នើឲ្យមេដឹកនាំបារាំង និងអង់គ្លេសលើកបញ្ហាសិទ្ធិមនុស្ស ពេលលោក ប្រាយុទ្ធ ទស្សនកិច្ចអឺរ៉ុប

19, Jun 2018 , 8:59 pm

រូបភាព

ដោយ: សៅ ផលនិស្ស័យ (Sao Phal Niseiy)

នាយករដ្ឋមន្ត្រីថៃលោក ប្រាយុទ្ធ ចន្ទអូចា ចាប់ផ្តើមដំណើរទស្សនកិច្ចរបស់ខ្លួនទៅកាន់ប្រទេសតំបន់អឺរ៉ុបសប្តាហ៍នេះក្នុងគោលបំណងពង្រឹងពាណិជ្ជកម្ម និងសេដ្ឋកិច្ច។ ខាងក្រុមសិទ្ធិមនុស្សបានអំពាវនាវឲ្យមេដឹកនាំបារាំង និងអង់គ្លេសយកបញ្ហាសិទ្ធិមនុស្ស និងប្រជាធិបតេយ្យផងដែរ ខណៈការបោះឆ្នោតត្រូវគេកំណត់រៀបចំនៅខែកុម្ភៈឆ្នាំក្រោយ តែគ្មានថ្ងៃជាក់លាក់នៅឡើយ។

នៅថ្ងៃពុធទី ២០ ខែមិថុនាប្រមុខរបបសឹកថៃលោកឧត្តមសេនីយ៍ ប្រាយុទ្ធ ចន្ទអូចា នឹងជួបពិភាក្សាជាមួយសមភាគីអង់គ្លេសលោកស្រី ថេរីសា មេយ៍ (Theresa May) ក្នុងដំណើរទស្សនកិច្ចមកកាន់តំបប់អឺរ៉ុប។ ក្រោយចាកចេញពីអង់គ្លេស លោកនឹងបន្តដំណើរទៅទស្សនកិច្ចនៅប្រទេសបារាំងផងដែរ។

ពាក់ព័ន្ធនឹងដំណើរទស្សនកិច្ចរបស់នាយករដ្ឋមន្ត្រីថៃនេះ លោក ប្រេដ អាដាម (Brad Adams) ដែលជានាយកទីភ្នាក់ងារឃ្លាំមើលសិទ្ធិមនុស្សប្រចាំតំបន់អាស៊ី (HRW) បានចេញសេចក្តីថ្លែងការណ៍មួយទទូចឲ្យមេដឹកនាំបារាំង និងអង់គ្លេសលើកយកបញ្ហាសិទ្ធិមនុស្សមកជជែកជាមួយលោក ប្រាយុទ្ធ។

«នាយករដ្ឋមន្ត្រី មេយ៍ និងលោក អេម៉ានុយអែល ម៉ាក្រុង គួរបញ្ហាកង្វល់របស់ខ្លួនចំពោះស្ថានភាពសិទ្ធិមនុស្សនៅថៃ។ មេដឹកនាំទាំងពីរគួរនិយាយឲ្យច្បាស់ប្រាប់ឧត្តមសេនីយ៍ ប្រាយុទ្ធ ថានឹងមិនមានការធ្វើជំនួញរួមគ្នាដូចសព្វដងឡើយ ដរាបណាគ្មានការបោះឆ្នោតសេរី និងយុត្តិធម៌ រួមជាមួយការបង្កើតរដ្ឋាភិបាលស៊ីវិលនិងការស្ទួយសិទ្ធិមនុស្សនោះ»។ នេះជាសម្តីរបស់លោក អាដាម ក្នុងសេចក្តីថ្លែងការណ៍ខ្លួន។

ក្រៅពីបញ្ហាសិទ្ធិមនុស្ស ក្រុមអ្នកគាំទ្រសិទ្ធិមនុស្សក៏ទិតៀនរបបសឹកថៃផងដែរ ដែលបន្តការពន្យារពេលបោះឆ្នោតជាច្រើនដងកន្លងមក។ បើទោះបីជាមានការសន្យារៀបចំការបោះឆ្នោតនៅខែកុម្ភៈឆ្នាំ ២០១៩ ក៏ដោយ វាមិនទាន់មានការកំណត់ច្បាស់ថ្ងៃបោះឆ្នោតនៅឡើយទេ។

យ៉ាងណាក៏ដោយ បើទោះជាមានការបំពារបំពានសិទ្ធិមនុស្ស និងមានការអំពាវនាវពីសំណាក់ស្ថាប័នសិទ្ធិមនុស្សក្តី ការរំពឹងថា មេដឹកនាំអឺរ៉ុបលើកយកបញ្ហាសិទ្ធិមនុស្សទៅដាក់ក្នុងកិច្ចពិភាក្សាជាមួយលោក ប្រាយុទ្ធនៅជារឿងស្រពេចស្រពិល។ នេះក៏ដោយសារ បញ្ហាពាណិជ្ជកម្មរវាងថៃ និងបារាំង ឬអង់គ្លេសជារឿងអាទិភាព មិនមែនរឿងប្រជាធិបតេយ្យឬសិទ្ធិមនុស្សឡើយ។ ដូចឃើញស្រាប់ សហភាពអឺរ៉ុបបានព្យួរទំនាក់ទំនងជាមួយថៃក្រោយរដ្ឋប្រហារឆ្នាំ ២០១៤ ប៉ុន្តែនៅខែធ្នូឆ្នាំមុន អឺរ៉ុបចាប់ផ្តើមទំនាក់ទំនងនយោបាយគ្រប់កម្រិតជាមួយថៃឡើងវិញដែរ។

សហភាពអឺរ៉ុបជាដៃគូពាណិជ្ជកម្មធំបំផុតលំដាប់ទីបីរបស់ថៃបន្ទាប់ពីចិន និងជប៉ុន ហើយថៃក៏ជាដៃគូធំបំផុតលេខបីរបស់សហភាពអឺរ៉ុបដែរក្នុងតំបន់អាស៊ាននេះ។ បើតាមសារព័ត៌មាន បាងកកប៉ុសិ៍្តដែលដកស្រង់សម្តីការិយាល័យនាយករដ្ឋមន្ត្រីថៃ ក្នុងដំណើរទស្សនកិច្ចរបស់លោក ប្រាយុទ្ធ នេះដែរ លោកនឹងចុះកិច្ចព្រមព្រៀងមួយចំនួនផងដែរជាមួយមិត្តអឺរ៉ុប។

ស្ថិតនៅបារាំងលោក ប្រាយុទ្ធ នឹងធ្វើជាអធិបតីក្នុងការចុះកិច្ចព្រមព្រៀងរវាងក្រុមហ៊ុន Airbus ជាមួយក្រុមហ៊ុនអាកាសចរណ៍ថៃ Airways ដើម្បីឈានទៅបើកកន្លែងថែទាំង និងជួសជុលយន្តហោះនៅព្រលានយន្តហោះ U-tapao។ បន្ថែមពីនេះ លោកក៏នឹងសម្រេចុះកិច្ចព្រមព្រៀងទិញផ្កាយរណបអង្កេតការណ៍ពីក្រុមហ៊ុន Airbus ដូចគ្នាដែលមានតម្លៃ ២១៥លានដុល្លារ ហើយរដ្ឋាភិបាលបានប្រកាសថាផ្កាយរណបនេះនឹងត្រូវប្រើប្រាស់ក្នុងគោលដៅសំខាន់ៗជាច្រើនតាំងពីកសិកម្ម រហូតដល់សន្តិសុខជាតិផង។ ប៉ុន្តែក្រុមអ្នករិះគន់ជឿថា ផ្កាយរណបនឹងត្រូវប្រើប្រាស់ដើម្បីតាមដាន និងឈ្លបយកព័ត៌មានប៉ុណ្ណោះ៕