កីឡាអន្តរជាតិ
អន្តរជាតិ
UEFA នឹងពិន័យក្លិប Man Utd ដោយសារករណីអ្នកគាំទ្ររត់សំដៅទៅ Ronaldo ក្នុងទីលាន
× សហព័ន្ធកីឡាបាល់ទាត់ទ្វីបអឺរ៉ុប UEFA នៅថ្ងៃ២៤ តុលា បានចោទប្រកាន់ Manchester United ចំពោះករណីអ្នកគាំទ្ររត់ចូលទីលានអំឡុងការប្រកួតដែលក្រុមម្ចាស់ផ្ទះចាញ់ Juventus ១-០ នៅទឹកដី Old Trafford ក្នុងក្របខណ្ឌ UEFA Champions League។
អ្នកគាំទ្ររបស់ក្រុមបិសាចក្រហមម្នាក់បានព្យាយាមរត់ចូលទៅក្នុងទីលានដើម្បីជួប Cristiano Ronaldo ដែលត្រឡប់ទៅកាន់ទឹកដី Old Trafford នៅដើមតង់ទី១។ សកម្មភាពដដែលនេះបានកើតឡើងម្តងទៀត នៅពេលបញ្ចប់ការប្រកួតរវាងក្រុម Man Utd និង Juventus នេះ ដោយមានអ្នកគាំទ្រច្រើនអ្នករត់ទៅរកវីរបុរសរបស់គេដែលមើលទៅមានភាពរញ៉េរញ៉ៃពេញតារាងតែម្តង។
សកម្មភាពគ្មានសណ្តាប់ធ្នាប់ខាងលើនេះបានធ្វើឲ្យ អង្គភាពវិន័យរបស់ UEFA ចោទប្រកាន់ក្លិប Man Utd ដែលជាម្ចាស់ផ្ទះថាបានរំលោភលើមាត្រា១៦ នៃបទបញ្ញត្តិវិន័យរបស់ពួកគេ។ ការដាក់ពិន័យយ៉ាងណានោះ ស្ថាប័នគ្រប់គ្រងកីឡាបាល់ទាត់ទ្វីបអឺរ៉ុប នឹងយកករណីនេះទៅពិចារណារហូតដល់ថ្ងៃទី ២២ ខែវិច្ឆិកាខាងមុខ។
ក្លិបដែលមានមូលដ្ឋានក្នុងក្រុង Manchester នេះ ក៏អាចប្រឈមនឹងការផាកពិន័យផងដែរសម្រាប់ការមកដល់កីឡដ្ឋានរបស់ខ្លួនយឺតពេលពីសំណាក់អ្នកចាត់ការលោក Jose Mourinho កាលពីប៉ះ Valencia ក្នុងការប្រកួតពានអឺរ៉ុបនេះដែរ។ ពួកគេអាចនឹងត្រូវ UEFA ផាកពិន័យជាប្រាក់ ១៧០៨០ ដុល្លារអាមេរិក លើករណីយឺតយ៉ាវនេះ៕
Tag:
បាល់ទាត់
UEFA
Cristiano Ronaldo
Manchester United
© រក្សាសិទ្ធិដោយ thmeythmey.com