អន្តរជាតិ
កិច្ចព្រមព្រៀងពាណិជ្ជកម្មសេរីនៅប៉ាស៊ីហ្វិកនឹងចូលធរមាននៅចុងខែធ្នូ ទោះគ្មានអាមេរិកក្ដី
រូបភាព AFP
×![]()
ដោយ: តន ចាន់រិទ្ធារ៉ា
កិច្ចព្រមព្រៀងពាណិជ្ជកម្មសេរីនៅតំបន់ប៉ាស៊ីហ្វិក ដែលសឹងតែលុតដង្ហើមក្រោយការដើរចេញរបស់អាមេរិកនោះ នឹងចូលជាធរមាននៅចុងខែធ្នូខាងមុខ។ សមាជិកចំនួន៦ប្រទេសក្នុងចំណោមប្រទេស១១ ដែលនៅសេសសល់ បានផ្ដល់សច្ចាប័នកិច្ចព្រមព្រៀងនេះដើម្បីបើកផ្លូវដល់ការធ្វើពាណិជ្ជកម្មដែលគ្មានរបាំងអ្វីឡើយ។ នេះជាការប្រឆាំងដោយផ្ទាល់ទៅនឹងគោលនយោបាយគាំពារនិយមរបស់ប្រធានាធិបតី ដូណាល់ ត្រាំ ពីសំណាក់សម្ព័ន្ធមិត្តនៅប៉ាស៊ីហ្វិករបស់អាមេរិក។
គ្មានអាមេរិក ក៏អត់បញ្ហា។ កិច្ចព្រមព្រៀងជឿនលឿននិងគ្រប់ជ្រុងជ្រោយសម្រាប់ភាពដៃគូអន្តរប៉ាស៊ីហ្វិក (CPTPP) នឹងចាប់ផ្ដើមអនុវត្តផ្លូវការនៅថ្ងៃទី៣០ ខែធ្នូខាងមុខនេះ។ កិច្ចព្រមព្រៀងពាណិជ្ជកម្មសេរីនៅក្នុងតំបន់ប៉ាស៊ីហ្វិកនេះ ត្រូវបានជួយសង្គ្រោះដោយប្រទេសចំនួន១១ ដែលជម្នះនយោបាយគាំពារនិយមរបស់ប្រធានាធិបតី ដូណាល់ ត្រាំ ។ លោក ត្រាំ បានដកអាមេរិកចេញពីកិច្ចព្រមព្រៀងចាស់ភាពជាដៃគួអន្តរប៉ាស៊ីហ្វិក (TPP) កាលពីឆ្នាំ២០១៧ ។
ការចូលធរមានរបស់កិច្ចព្រមព្រៀង CPTPP កើតឡើងបន្ទាប់ពីអូស្ត្រាលីក្លាយជាសមាជិកទី៦ ដែលផ្ដល់សច្ចាប័នដល់កិច្ចព្រមព្រៀងនេះនៅថ្ងៃទី៣១ ខែតុលា។ សមាជិក៥ ដែលផ្ដល់សច្ចាប័នរួចហើយមាននូវែលសេឡង់ សិង្ហបុរី កាណាដា ជប៉ុន និងម៉ិកស៊ិក។ ដោយសារសមាជិកលើសចំនួនពាក់កណ្ដាលផ្ដល់សច្ចាប័នបែបនេះ កិច្ចព្រមព្រៀងនេះអាចអនុវត្តបានតាមលក្ខខណ្ឌរបស់ខ្លួននៅរយៈពេល៦០ថ្ងៃក្រោយ។
ក្រោមកិច្ចព្រមព្រៀងដែលមានចំណងផ្លូវច្បាប់នេះ សមាជិកទាំងអស់ត្រូវមានក្របខណ្ឌច្បាប់តឹងរ៉ឹងក្នុងវិស័យពាណិជ្ជកម្ម បន្ធូរបន្ថយរបាំងពន្ធគយ និងបើកចំហទីផ្សាររបស់ខ្លួន។ កិច្ចព្រមព្រៀងនេះក៏នឹងអនុវត្តស្តង់ដាការងារថ្មី ហើយចាប់បង្ខំឲ្យរដ្ឋាភិបាលប្រទេសសមាជិកខ្លះត្រូវបង្កើតការប្រកួតប្រជែងក្នុងវិស័យដែលកំពុងកាន់កាប់ដោយអ្នកវិនិយោគនៃប្រទេសទាំងនោះដែរ។ នេះបើតាមទីភ្នាក់ងារព័ត៌មាន AFP ។
នៅថ្ងៃទី៣០ ខែធ្នូ ការកាត់បន្ថយពន្ធជុំទីមួយនឹងចាប់ផ្ដើម។ ឯការបន្ថយពន្ធជុំទីពីរនឹងធ្វើនៅថ្ងៃទី១ ខែមករា ឆ្នាំ២០១៩ ។ នេះបើតាមការបញ្ជាក់របស់រដ្ឋមន្ត្រីពាណិជ្ជកម្មនូវែលសេឡង់ David Parker ។ ខណៈសមាជិក៥ប្រទេសទៀតដូចជាព្រុយណេ វៀតណាម ស៊ីលី ម៉ាឡេស៊ី និងប៉េរូ មិនទាន់ផ្ដល់សច្ចាប័ននោះ លោក Parker រំពឹងថា ប្រទេសនៅសេសសល់ទាំងនេះនឹងចូលរួមជាមួយសមាជិកទាំង៦ផ្សេងទៀត។
តាមពិតទៅ ក្រោយការដកខ្លួនរបស់អាមេរិក គេមិនរំពឹងថា កិច្ចព្រមព្រៀងពាណិជ្ជកម្មមួយនេះអាចបន្តរស់រានឡើយ។ ប៉ុន្តែជប៉ុន ដែលជាសម្ព័ន្ធមិត្តអាមេរិក តែក៏ជាអ្នកការពារសាកលភាវូបនីយកម្មដែរនោះ បានប្រឹងប្រែងជម្នះការលំបាក និងចរចាជាមួយប្រទេស១០ទៀតរហូតសម្រេចបានកិច្ចព្រមព្រៀងថ្មីក្នុងខែមករា។ ប្រទេសទាំង១១នេះ សុទ្ធតែមានសេដ្ឋកិច្ចរីកចម្រើនខ្លាំង ដែលស្មើនឹង១៤ភាគរយនៃសេដ្ឋកិច្ចពិភពលោក៕
Tag:
អូស្ត្រាលី
CPTPP
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
