ភ្នំពេញ៖ លោក ចាន់ ចេន មេធាវីការពារក្តីលោក កឹម សុខា ហាក់មិនពេញចិត្តចំពោះពាក្យសម្តីរបស់លោក សម រង្ស៊ី មេដឹកនាំអតីតគណបក្សសង្គ្រោះជាតិ ដែលរិះគន់មកលើមតិយោបល់អ្នកនយោបាយប្រឆាំង កំពុងរស់នៅក្នុងប្រទេសកម្ពុជាថា មិនបានការ ហើយស្ថិតនៅក្រោមគំនាបសម្ដេចនាយករដ្ឋមន្ត្រី ហ៊ុន សែន ឡើយ។ សម្តីរបស់លោក សម រង្ស៊ី បែបនេះ ត្រូវបានលោក ចាន់ ចេន ចេញឆ្លើយតបវិញថា លោក សម រង្ស៊ី កំពុងប្រមាថឆន្ទៈមនសិការបស់លោក កឹម សុខា ខណៈដែលកូនក្តីលោក បង្ហាញពីភាពអង់អាចក្លាហាន ហ៊ានលះបង់ និងមានឧត្តមគតិនយោបាយ ដែលប្រឈមតស៊ូនៅក្នុងសមរភូមិពិតប្រាកដ។
ខាងក្រោមនេះ គឺជាកិច្ចសម្ភាសរវាងលោក រំដួល ចិត្រា អ្នកសារព័ត៌មានថ្មីៗ ជាមួយលោក ចាន់ ចេន មេធាវីការពារក្តី និងជាអ្នកនាំពាក្យរាល់ឆន្ទៈរបស់លោក កឹម សុខា ដូចតទៅ៖
លោក រំដួល ចិត្រា៖ លោកមេធាវី ចាន់ ចេន! ខ្ញុំបានឃើញលោក សរសេរលើហ្វេសប៊ុកខ្លួន ដែលបញ្ចេញមតិរិះគន់តបលោក សម រង្ស៊ី ដែលនិយាយពីការបញ្ចេញមតិរបស់អ្នកនយោបាយក្នុងប្រទេសកម្ពុជា ថាយកជាការមិនបាន ហើយត្រូវបានសម្ដេច ហ៊ុន សែន ទិញបាន និងនៅក្រោមគំនាបគាត់ជាដើម។ ដោយលោកមេធាវី ចាត់ទុកពាក្យសម្តីលោក សម រង្ស៊ី ជាការប្រមាថដល់ឆន្ទៈលោក កឹម សុខា ។ ដូច្នេះជាសំនួរដំបូង ខ្ញុំចង់សួរលោកថា មូលហេតុអ្វីបានជាលោក ចេញពាក្យឆ្លើយតបបែបនេះ ទៅលោក សម រង្ស៊ី នៅក្នុងកាលទេសៈបែបនេះ?
លោក ចាន់ ចេន៖ បន្ទាប់ពីបានតាមដាននូវអ្វី ដែលលោក សម រង្ស៊ី បាននិយាយច្រំដែលៗម្ដងហើយម្ដងទៀតថា ប្រជាពលរដ្ឋខ្មែរ អ្នករស់នៅស្រុកខ្មែរ និយាយអ្វីយកជាការមិនបាន ព្រោះការនិយាយនោះវាស្ថិតនៅក្រោមគំនាបរបស់សម្ដេចនាយករដ្ឋមន្ត្រី ហ៊ុន សែន ឬក៏តាមបញ្ជារ ដូច្នេះយើងឭឃ្លារនេះ វាមានការភ្ញាក់ផ្អើលណាស់ ថាមិនគួរណាលោក សម រង្ស៊ី លើកហេតុផលបែបហ្នឹងមកទេ ទាំងនេះចំណុចទី១។ ឯទី២ទៀត យើងដឹងហើយថា ទោះបីជាកូនក្តីយើងខ្ញុំ ជាប់បម្រាម ជាប់កាតព្វតុលាការ ក៏ប៉ុន្តែកូនក្តីរបស់យើងខ្ញុំ ដែលគេហៅថា អ្នកដែលស្រលាញ់លទ្ធិប្រជាធិបតេយ្យ ក៏ដូចជាប្រជាពលរដ្ឋស្រលាញ់ប្រជាធិបតេយ្យ ក៏គេមានច្រកនូវអ្វីដែលគេអាចធ្វើទៅបាន។ ហើយម្យ៉ាងទៀត យើងធ្វើការងារដោយឈរនៅភាពឯករាជ្យភាពរបស់យើង ដោយមិនស្ថិតនៅគំនាបរបស់អ្នកណាមួយទេ។
លោក រំដួល ចិត្រា៖ ក្នុងន័យលោកមេធាវីលើកឡើងខាងលើនេះ គឺលោកចង់បង្ហាញពីអ្វីអារម្មណ៍របស់កូនក្តីលោកកំពុងអនុវត្ត ប៉ុន្តែខ្ញុំនៅតែមានសំនួរថា តើហេតុអ្វីបានជាលោកមេធាវី លើកឡើងបែបនេះ នៅក្នុងកាលៈទេសៈបែបនេះ ដែលហាក់ដូចជាបង្ហាញថា លោក សម រង្ស៊ី និងលោក កឹម សុខា កំពុងបែកចិត្តឆ្ងាយពីគ្នា និងមិនចុះសម្រុងគ្នា? លោកអាចបកស្រាយ បានទេ?
លោក ចាន់ ចេន៖ នៅចំណុចនេះ ខ្ញុំមិនធ្វើអត្ថាធិប្បាយអ្វីវែងឆ្ងាយទេ ដោយសារខ្ញុំជាមេធាវី ខ្ញុំនិយាយអ្វីគោរពទៅលើក្របខណ្ឌវិជ្ជាជីវៈតាមឆន្ទៈរបស់កូនក្តី ហើយធ្វើកិច្ចការងារដែលមានការទទួលខុសត្រូវ។ ហើយអ្វីដែលោកសួរខ្ញុំ គឺជារឿងនយោបាយ ដូច្នេះមានតែលោកទាក់ទងទៅអ្នកនយោបាយ។ ក៏ប៉ុន្តែអ្វីដែលខ្ញុំបានបង្ហោះលើហ្វេសប៊ុកកាលពីម្សិលមិញនេះ ខ្ញុំចង់បញ្ជាក់ថា គឺជាការប្រមាថធំណាស់ ពីព្រោះមានន័យថា កូនក្តីខ្ញុំ គាត់បានលះបង់ដើម្បីសេរីភាព ដើម្បីយុត្តិធម៌សង្គម ដើម្បីប្រជាធិបតេយ្យ រហូតដល់មានការចាប់ឃុំខ្លួនគាត់ ចំណុចនេះវាជាការប្រមាថទី១ ទៅលើកូនក្តី។ ទី២ទៀត ក៏ជាការប្រមាថទៅលើអ្នកវិភាគនយោបាយឯករាជ្យ តែងតែវិភាគផងដែរ ហើយក៏ជាការលាបពណ៌មួលបង្កាច់ចោទប្រកាន់ទៅដល់ពួកយើងខ្ញុំជាមេធាវីការពារកូនក្តី ដូច្នេះខ្ញុំមិនចង់និយាយអ្វីវែងឆ្ងាយទេ។ ជាសរុបមកវិញពួកយើងធ្វើការងារដោយមានសេចក្តីថ្លៃថ្នូរ យើងមានវិជ្ជាជីវៈ យើងមានផ្ទះរស់នៅ មានបាយញាំ យើងអត់មានត្រូវការធ្វើកិច្ចការងារក្រោមគំនាបក្រោមបុគ្គលណានោះទេ គឺយើងអត់ដូចការដែលគាត់(សម រង្ស៊ី)លាបពណ៌មួលបង្កាច់ចោទប្រកាន់នោះទេ។
លោក រំដួល ចិត្រា៖ កន្លងមកលោក កឹម សុខា បានតែងតាំងលោក និងមេធាវីផ្សេងទៀត ជាអ្នកនាំពាក្យរាល់ឆន្ទៈរបស់លោក កឹម សុខា ដូច្នេះរាល់ការលើកឡើងរបស់លោកនេះ អាចធ្វើឲ្យគណបក្សសង្គ្រោះជាតិ កាន់តែបង្ហាញរូបភាពប្រេះឆាថែមទៀតទេ?
លោក ចាន់ ចេន៖ ដោយសារតែខ្ញុំជាអ្នកបច្ចេកទេស ខ្ញុំមិនគិតដល់សំនួររបស់លោកទេ។ ក្នុងចំណុចនេះខ្ញុំមិនអត្ថាធិប្បាយទេ ព្រោះវាហួសកិច្ចការងាររបស់ខ្ញុំ។
(រូបលោក ចាន់ ចេន និងមេធាវីផ្សេងទៀត ជួបលោក កឹម សុខា នៅក្នុងគេហដ្ឋាន នាពេលកន្លងមក)
លោក រំដួល ចិត្រា៖ អ៊ីចឹងខ្ញុំចង់សួរត្រឡប់ក្រោយវិញថា អ្វីដែលលោកសរសេរលើហ្វេសប៊ុកនេះ ក្នុងនាមជាអ្នកនាំពាក្យនៃឆន្ទៈរបស់លោក កឹម សុខា ដែលផ្ដល់សិទ្ធឲ្យលោកនិយាយ ឬក្នុងនាមលោក ជាមេធាវី? ហើយតើលោកមានគិតថា អ្វីដែលលោកសរសេរនេះ នឹងកាន់តែធ្វើឲ្យគណបក្សសង្គ្រោះជាតិកាន់តែប្រេះឆាទេ?
លោក ចាន់ ចេន៖ តាមពិតខ្ញុំសរសេរលើហ្វេសប៊ុកខ្ញុំនេះ ក្នុងនាមជាពលរដ្ឋក្នុងសង្គមដែលមានសម្ដែងមតិទេ។ ខ្ញុំមិនដែលគិតយ៉ាងនេះទេ ព្រោះធម្មតាយើងរស់នៅក្នុងសង្គមប្រជាធិបតេយ្យ បើសិនជាឃើញអ្វីអវិជ្ជមាន ឬប៉ះពាល់ដល់កូនក្តីខ្ញុំ ខ្ញុំអាចបញ្ចេញមតិបាន ប៉ុន្តែខ្ញុំមិនបានគិតដល់រឿងអ្វីផ្សេងទេ។
លោក រំដួល ចិត្រា៖ ជាសំនួរចុងក្រោយលោកមេធាវី ! ដោយសារតែឥឡូវច្បាប់វិសោធនកម្មច្បាប់ស្តីពីគណបក្សនយោបាយ ដែលបើកផ្លូវឲ្យអ្នកនយោបាយ១១៨នាក់ អាចធ្វើនយោបាយឡើងវិញ ត្រូវបានរដ្ឋសភាអនុម័តរួចហើយ ហើយកំពុងបន្តនីតិដាក់ទៅព្រះមហាក្សត្រ។ ប៉ុន្តែមកដល់ពេលនេះ តើលោក កឹម សុខា ព្រមឲ្យមន្ត្រីបក្សខ្លួនព្រមទទួលយក បើសិនជាមានការផ្ដល់សិទ្ធិនយោបាយដល់ពួកគេ ខណៈដែលលោក សម រង្ស៊ី ហាមមិនឲ្យពួកគេទទួលយកនោះ?
លោក ចាន់ ចេន៖ ចំណុចនេះ ខ្ញុំមិនអាចដឹងដល់ទេ ក៏ប៉ុន្តែបើតាមខ្ញុំដឹង បើសិនជាមានអ្វីថ្មី គឺកូនក្តីខ្ញុំ គាត់នឹងប្រជុំជាមួយពួកខ្ញុំដូចសព្វមួយដងអ៊ីចឹង។ ដូច្នេះអ្វីដែលមិនមែនជាការបង្ហាញឆន្ទៈរបស់កូនក្តី ខ្ញុំមិនអាចជម្រាបប្រាប់បានទេ ដោយសារយើងធ្វើកិច្ចការគោរពក្របខណ្ឌវិជ្ជាជីវៈ ការពារផលប្រយោជន៍របស់កូនក្តី និងមានការទទួលខុសត្រូវ ស្របតាមគោលការណ៍ច្បាប់៕