អត្ថបទ៖ Matias Andres ជាតិ កីឡាជាតិ One Championship
ចាន់ សំអាត កំពុងបង្ហាញការព្យាយាមរបស់ខ្លួនដើម្បីឲ្យក្លាយខ្លួនជាកីឡាករឆ្នើមម្នាក់នៅក្នុងពិភពក្បាច់ចម្រុះ តាមរយៈបទពិសោធន៍ដែលខ្លួនធ្លាប់មានក្នុងកម្មវិធី One Warrior Series។ ក្បាច់គុននេះ ហើយដែលបានកែប្រែជីវិតរបស់សំអាត ពីក្មេងឈាមរាវទៅជាយុវជនដែលស្រឡាញ់ និងតស៊ូរនៅសង្វៀន។
«ខ្ញុំស្រឡាញ់ខាងប្រដាល់តាំងពីតូចម្ល៉េះ តែអត់ដឹងធ្វើម៉េចបានហាត់ ព្រោះនៅស្រុកខ្ញុំអត់សូវមានកន្លែងហ្វាត់ហាត់ទេ»។ នេះជាការរំលឹករបស់ ចាន់ សំអាត ដោយអះអាងថា ក្បាច់គុន រួមចំណែកយ៉ាងធំធេងក្នុងការផ្លាស់ប្តូរជីវិតរបស់។
កីឡាកររូបនេះ បានបញ្ជាក់ថា ខ្លួនបានសុំគេចូលប្រកួតទាំងខ្លួនមិនមានបទពិសោធន៍អ្វីទាល់តែសោះក្នុងកីឡាប្រដាល់ ប៉ុន្តែវាជាជំហានដែលនាំឲ្យគេបានប្រឡូកខ្លួន។ «គេឃើញខ្ញុំខំវាយតស៊ូខ្លាំងអ៊ីចឹង គេក៏បានយកខ្ញុំមកហាត់នៅភ្នំពេញតែម្តងទៅ»។
នៅក្លិប Cambodian Top Team (CTT) សំអាត មានឱកាសអនុវត្តជាមួយកីឡាករខ្លាំងៗ ដែលធ្លាប់បានបង្ហាញខ្លួននៅ One Championship ដូចជា រិន សារត្ន័ និងពន្លកថ្មី នៅ ស្រីពៅ ជាដើម។
កាលពីឆ្នាំ ២០១៥ ONE Championship បានមករៀបចំព្រឹត្តិការណ៍ ONE: KINGDOM OF KHMER
នៅរាជធានីភ្នំពេញ សំអាត ក៏មានវត្តមានប្រកួតក្នុងសង្វៀនធំនោះដែរ។ ប៉ុន្តែទើបតែឆ្នាំមុនដែលគាត់បានរីកមុខមាត់ខ្លាំងក្នុងវិស័យគុនចម្រុះ ពីព្រោះគាត់បានវាយគូប្រជែងថៃ Detchadin Srosirisuphathin ឲ្យសន្លប់តែក្នុងទឹកទីមួយក្នុងកម្មវិធី One Warrior Series (OWS)។
សំអាតបន្ថែមទៀតថា៖ «ប្រកួតនៅសិង្ហបុរី ខ្ញុំមានសង្ឃឹមប្រហែល ៥០ភាគរយប៉ុណ្ណោះ។ ប៉ុន្តែកាលនោះមានលោកគ្រូចាន់រាជ បងស្រីបងប្រុសខ្ញុំទៅជួយគាំទ្រខ្ញុំ។ លោកគ្រូប្រាប់ខ្ញុំពីរបៀបវាយ ប៉ុន្តែគាត់និយាយធម្មតា ដោយមិនស្រែកនោះឡើយ។ ខ្ញុំស្តាប់តាមគិតរហូតទទួលបានជ័យជម្នះ»។
ថ្វីបើ សំអាត មិនសូវបានប្រកួតគុនចម្រុះច្រើនក៏ដោយ ប៉ុន្តែសម្រាប់ឆ្នាំ ២០១៩ កីឡាកររូបនេះ សំរុកប្រឹងហាត់ខ្លាំងជាងមុនឆ្ងាយ។ ដូចកីឡាករផ្សេងៗដែរ សំអាតជឿជាក់ថាវិស័យកីឡានៅកម្ពុជានឹងឆាប់ផ្តើមរីកចម្រើនខ្លាំងឆាប់ៗ។
«ថ្ងៃក្រោយ ខ្ញុំចង់ចាប់យកទាំងគុនខ្មែរ និងគុនចម្រុះ។ និយាយទៅចង់ចេះជំនាញច្រើន តែតាមចិត្តខ្ញុំចង់គុនចម្រុះជាង ដោយសារវាមិនសូវឈឺខ្លួនខ្លាំង»។
ថ្ងៃអាទិត្យនេះ សំអាត និង រិន សារត្ន័ នឹងត្រូវឡើងប្រកួតនៅ Phnom Penh Kun Khmer។
គាត់រៀបរាប់ប្រាប់៖ «ខ្ញុំមានអារម្មណ៍ថាកក់ក្តៅបានសារត្ន័ប្រកួតថ្ងៃជាមួយ។ រត្ន័ប្រកួតពេលព្រឹក ហើយខ្ញុំប្រកួតពេលល្ងាច។ ឥឡូវខ្ញុំបានហាត់គ្រប់គ្រាន់ អីចឹងខ្ញុំមិនបារម្ភទេ»។
អ្វីដែលគួរឲ្យចម្លែកនោះគឺ សំអាត ថាគាត់មិនចង់ស្គាល់ពីដៃគូប្រកួតរបស់ខ្លួនមុនឡើយ។ គាត់ប្រាប់ថា គាត់មិនចង់ស្វែងយល់ពីគូប្រកួតទេ គឺគាត់ចង់ដើរចូលសង្វៀនជាមួយជំនឿចិត្តលើខ្លួនឯងវិញ។
«ខ្ញុំអត់ចង់ភ័យថាគេពូកែប្រើស្នៀតអីដើម្បីវាយទេ។ អ្វីដែលខ្ញុំគិតនោះគឺថា គេជាគូប្រយុទ្ធយើង អីចឹងត្រូវដើរចូលទៅវាយគេ”៕