ជាតិ
សង្គមជាតិ
ក្រសួងពីររួមគ្នាបង្កើតក្រុមការងារដើម្បីដោះស្រាយបទល្មើស វិធានការអនាម័យ និងបរិស្ថានក្នុងភូមិ-ឃុំ រូបភាពពីក្រសួងមហាផ្ទៃ
× ភ្នំពេញ៖ ក្រសួងមហាផ្ទៃ និងក្រសួងបរិស្ថាន បានរួមគ្នាបង្កើតក្រុមការងារត្រួតពិនិត្យនូវគោលនយោបាយភូមិ ឃុំ មានសុវត្ថិភាពដើម្បីការពារសន្តិសុខ សណ្តាប់ធ្នាប់ និងអនុវត្តវិធានការអនាម័យ និងបរិស្ថាននៅគ្រប់ភូមិ ឃុំ។ នេះបើតាមសេចក្តីប្រកាសអន្តរក្រសួងទាំងពីរដែលចាត់តាំងលោក ម៉ៅ ច័ន្ទតារា រដ្ឋលេខាធិការក្រសួងមហាផ្ទៃជាប្រធាន សម្រាប់ដឹកនាំការងារនេះជាមួយនឹងសមាជិកចំនួន១៣នាក់ទៀត។
តួនាទីរបស់មន្ត្រីការងារក្នុងការអនុវត្តគោលនយោបាយភូមិ ឃុំ មានសុវត្ថិភាព គឺដើម្បីធានាបាននូវសុខសុវត្ថិភាពជូនដល់ពលរដ្ឋក្នុងភូមិ ឃុំ ដោយចាត់វិធានការលុបបំបាត់សកម្មភាព លួច ឆក់ ប្លន់ គ្មានការផលិត ចែកចាយ និងប្រើប្រាស់គ្រឿងញៀន គ្មានអំពើអាណាចារ្យ ការជួញដូរស្ត្រី និងកុមារ និងអំពើហិង្សាក្នុងគ្រួសារ គ្មានក្មេងទំនើង និងគ្មានការលេងល្បែងស៊ីសងគ្រប់ប្រភេទ គ្មានការប្រើប្រាស់អាវុធខុសច្បាប់ និងបទល្មើសផ្សេងៗ។ នេះបើតាមផែនការណែនាំស្តីពីការចាត់តាំងអនុវត្តគោលនយោបាយភូមិ ឃុំមានសុវត្ថិភាព។
មន្ត្រីការងារទាំងនោះក៏នឹងត្រួតពិនិត្យ និងដាក់បញ្ចូលវិធានការអនាម័យ និងបរិស្ថាននៅក្នុងភូមិ ឃុំ។ សិក្សា ពិនិត្យ និងកែសម្រួលគោលការណ៍ វិធានការ និងយន្តការនានា នៃចលនាប្រឡងប្រណាំងការអនុវត្តគោលនយោបាយភូមិ ឃុំមានសុវត្ថិភាព។ រួមទាំងធ្វើរបាយការណ៍អំពីលទ្ធផលនៃការសិក្សាស្រាវជ្រាវ និងការពិនិត្យបញ្ហាជូនរដ្ឋមន្ត្រីក្រសួងមហាផ្ទៃ និងរដ្ឋមន្ត្រីក្រសួងបរិស្ថានដើម្បីពិនិត្យ សម្រេច។
ដើម្បីឲ្យការងារទាំងនេះប្រកបដោយប្រសិទ្ធភាព គឺត្រូវមានការចូលរួមពីអាជ្ញាធរមានសមត្ថកិច្ចគ្រប់ថ្នាក់ សមាសភាពសផ្សេងក្នុងជួររដ្ឋាភិបាល គណបក្សនយោបាយ អង្គការក្រៅរដ្ឋាភិបាល ផ្នែកឯកជន និងពលរដ្ឋទាំងមូល៕
Tag:
បរិស្ថាន
អនាម័យ
បទល្មើស
© រក្សាសិទ្ធិដោយ thmeythmey.com