ហុងកុង ជាទីផ្សារធំទីពីររបស់ជប៉ុនសម្រាប់ការនាំចេញកសិផល និងនេសាទ ខណៈចិនដីគោក​ជា​ទីផ្សារធំជាងគេបង្អស់។ ប៉ុន្តែហុងកុង នឹងចាត់វិធានការរឹតត្បិតបន្ថែមទៀតជុំវិញផែនការ​របស់ជប៉ុនលើការបញ្ចេញទឹកដែលធ្វើប្រព្រឹត្តកម្មរួចរាល់ពីរោងចក្រនៅ Fukushima ដោយសារសុវត្ថិភាព​ចំណី​អាហារ។ ទីក្រុង តូក្យូអះអាងថា ការបញ្ចេញនេះនឹងមានសុវត្ថិភាព និង​ស្របតាមស្តង់ដារពិភពលោក។

 

នាយកប្រតិបត្តិនៃតំបន់រដ្ឋបាលពិសេសហុងកុង John Lee បានថ្លែងនៅ​ក្នុង​សន្និសីទ​សារព័ត៌មាន​មួយថា ការហាមឃាត់បច្ចុប្បន្នរបស់ហុងកុងលើការដឹកជញ្ជូនផលិតសមុទ្រពីជប៉ុន ​នឹងត្រូវពង្រីកថែមទៀត។

 

«ប្រសិនបើការបញ្ចេញសារធាតុចាប់ផ្តើម យើងនឹងហាមឃាត់ផលិតផលសមុទ្រមួយចំនួនធំ»។ លោក Lee បានសង្កត់ធ្ងន់បែបនេះ ហើយបន្តថា លោកបានស្នើឱ្យលេខាធិការបរិស្ថាន និងអេកូឡូស៊ីនៃ​ទីក្រុង​ហុងកុងបង្កើតក្រុមការងារចម្រុះដើម្បីរៀបចំផែនការសកម្មភាពរបស់ទីក្រុងទល់នឹងរឿងនេះដែរ។ 

 

ទន្ទឹមនេះ លោកសង្កត់ធ្ងន់ថា រដ្ឋាភិបាលនឹងចាត់វិធានការយ៉ាងម៉ឺងម៉ាត់ និងប្រកាសព័ត៌មាន លម្អិត​នៃ​ផែនការ​ជាសាធារណៈឱ្យបានឆាប់តាមដែលអាចធ្វើទៅបាន។ ទោះឧស្សាហកម្មម្ហូបអាហារនឹង​រង​ផល​ប៉ះពាល់ ហុងកុងត្រូវបង្ខំចិត្តសម្រេចចិត្តធ្វើបែបនេះដោយសារតែការបញ្ចេញ​សារធាតុមិន​ធ្លាប់​មាន​ពី​មុនមក។

 

កាលពីសប្ដាហ៍មុន ទៅក្រុងប៉េកាំងក៏បានប្រកាសរឹតបន្តឹងការត្រួតពិនិត្យលើម្ហូបអាហារពីជប៉ុន និង​ការ​នាំចូលរបស់ជប៉ុនមួយចំនួនដែរ។ កូរ៉េខាងត្បូងវិញក៏បន្តបម្រាមលើការនាំចូលអាហារ និង​អាហារ​សមុទ្រពីតំបន់ Fukushima ដដែល។

 

ក្នុងឆ្នាំ២០២២ ជប៉ុនបាននាំចេញផលិតផលជលផលចំនួន៥៣៦លានដុល្លារទៅកាន់ទីក្រុងហុងកុង​៕