ក្រសួងដែនដីជប៉ុន បានវិភាគការខូចខាតបង្កដោយរលកស៊ូណាមិ នៅទីក្រុង Suzu និង ទីក្រុង Noto ក្នុងខេត្ត Ishikawa នៃឧបទ្វីប Noto ដែលស្ថិតតាមបណ្ដោយសមុទ្រជប៉ុន ដោយប្រើរូបភាពពីលើអាកាសផ្ដល់ដោយឧទ្ធម្ភាគចក្រសង្គ្រោះរបស់ខេត្ត។ តំបន់ដែលត្រូវ បានបញ្ជាក់ថាមានទឹកជំនន់សរុបរហូតដល់ ១០០ ហិកតា ហើយក្នុងនោះរួមមានកំពង់ផែ Iida ចំនួន ១៥​ ហិកតា និងផ្ទៃដីចំនួន ២៧ ហិកតានៅតំបន់ Nunoura និង Kurikawashiri នៅទីក្រុង Noto។ 

 

រលកស៊ូណាមិបានវាយប្រហារតំបន់ជាច្រើនបន្ទាប់ពីការរញ្ជួយដី។ មន្ត្រី​ក្រសួងដែន​ ដីក៏សម្គាល់ថា ​ទំហំ​ទឹក​ជំនន់​ពិត​ប្រាកដគឺ​ទំនង​ជា​ធំ​ជាង​ការរាយការណ៍ខាងលើផងដែរ។ កន្លងមក ជប៉ុន បានប្រកាសអាសន្នពីលទ្ធភាពមានរលកយក្សស៊ូណាមិវាយប្រហារមកលើខ្លួនជាថ្មី មុនពេលលើកចោលការព្រមាននេះ នៅថ្ងៃទី២ ខែមករា។ រលកមានកម្ពស់រហូតដល់ប្រមាណ ១២០សង់ទីម៉ែត្រឯណោះ។ 
 

គួរបញ្ជាក់ថា មកទល់ពេលនេះ ផលប៉ះពាល់ និងទំហំខូចនៃផ្ទះសម្បែង ឬជម្រៅទឹកជំនន់ មិនមានការរាយការណ៍លម្អិតនៅឡើយ។ បើទាក់ទងនឹងគ្រោះរញ្ជួយដី គិតត្រឹមថ្ងៃទី៣ ខែមករា យ៉ាងហោចណាស់មនុស្ស ៦២នាក់ត្រូវបានស្លាប់ ២០០ នាក់រងរបួសហើយក្នុងនោះ ២០ នាក់រងរបួសធ្ងន់។ ឯផ្ទះសម្បែងជាច្រើនបានរងការខូចខាតដោយសារការរញ្ជួយដី និង អគ្គិភ័យផងដែរ៕