បើតាមសេចក្តីប្រកាសរបស់តុលាការអេស្ប៉ាញ នាថ្ងៃទី២៧ ខែឧសភា លោកស្រី Sofia Gil Garia ដែលជាចៅក្រម បានសម្រេចថា ស្ថាប័នគ្រប់គ្រងបាល់ទាត់ FIFA និង UEFA បានរំលោភបំពានច្បាប់ ដោយបានហាមឃាត់ក្លិបបាល់ទាត់ ពីការចូលរួមប្រកួតប្រជែងក្នុងពានរង្វាន់ថ្មី ក្នុងយុគបាល់ទាត់សម័យទំនើប​។ លោកស្រី Gil Garcia ក៏បានស្នើឱ្យ FIFA និង UEFA បញ្ឈប់រាល់ការប្រឆាំង ដែលធ្លាប់បានធ្វើឡើងកន្លងមក​ចំពោះការបង្កើតពាន ​ESL។
 

រឿងក្តីក្តាំបង្កើតពាន ESL នេះត្រូវបានដឹកនាំដោយក្រុមហ៊ុន A22 Sports Management ដែលជាក្រុមហ៊ុនអភិវឌ្ឍវិស័យកីឡា។ ក្រុមហ៊ុន A22 Sports បានដាក់ពាក្យបណ្តឹង ទៅតុលាការអេស្ប៉ាញ ដើម្បីតទល់ទៅនឹងសហព័ន្ធបាល់ទាត់អេស្ប៉ាញ, លីគកំពូលអេស្ប៉ាញ La Liga, UEFA និង FIFA ដែលបានរារាំងផ្លូវ។
 

កាលពីថ្ងៃទី២៧ ខែឧសភា ដដែល ក្របខណ្ឌ La Liga បានទទូច ប្រឆាំងនឹងសេចក្តីសម្រេចរបស់តុលាការទៅលើការបង្កើតពាន ESL ដោយថាខ្លួនមិនគាំទ្រឡើយ។