នាការប្រកាសពិន្ទុនៅស្នាក់ការកណ្តាល AFC ក្នុងក្រុងគូឡាឡាំពួ ប្រទេសម៉ាឡេស៊ី នៅថ្ងៃទី២៧ ខែឧសភា លីគបាល់ទាត់អារ៉ាប៊ីសាអូឌីត ទទួលបានពិន្ទុច្រើនជាងគេចំនួន ១០៣,១៤៨ នាំមុខលីគជប៉ុនដែលទទួលបាន៩៦,៩៩៩ពិន្ទុ និងលីគកូរ៉េខាងត្បូង ៩៣,៦០០ពិន្ទុ។ ការផ្តល់ពិន្ទុនេះ ដោយយោងតាមលទ្ធផលប្រកួតក្នុងលីគ និងការប្រកួត AFC Champions League (ACL) ក្នុងនោះក្រុម Al Hilal SFC ជាជើងឯកឆ្នាំ ២០១៩ និង ២០២១ និងរងជើងឯកនៅឆ្នាំ ២០២២។
 

លើសពីនេះទៅទៀត នៅក្នុងរដូវកាល ២០២៣-២៤ ក្រៅពី Al Hilal ក្រុមនៅអារ៉ាប៊ីសាអូឌីតចំនួន៣ទៀត រួមមាន Al Nassr ដែលមានប្រធានក្រុម Cristiano Ronaldo ជាសមាជិក, Al Ittihad និង Al Fayha សុទ្ធតែបង្ហាញភាពលេចធ្លោទាំងក្នុងលីគ និង ACL បើទោះពានក្លិបប្រចាំតំបន់អាស៊ីនេះធ្លាក់ទៅ​លើ​ក្រុម Al Ain FC នៃលីគអេមីរ៉ាត​អារ៉ាប់រួម (UAE) ក្តី។

នៅប៉ុន្មានរដូវកាលចុងក្រោយ ក្លិបក្នុងលីគកំពូលអារ៉ាប៊ីសាអូឌីត នាំចូលកីឡាករល្បីៗពីតំបន់អឺរ៉ុបជាច្រើនរូបទៅរួមក្រុម ដែលរួមមាន Neymar, Karim Benzema និង Ronaldo ដែលធ្វើឱ្យលីគនេះកើនប្រជាប្រិយភាពយ៉ាងខ្លាំង។