ពិធីបរិច្ចាគនេះ ធ្វើឡើងនៅមជ្ឈមណ្ឌលព្យាបាលកុមារ បេះដូងជប៉ុន ដោយមានការអញ្ចើញចូលរួមពីសំណាក់ លោកស្រីបណ្ឌិត ហោ សុវឌ្ឍនា អគ្គនាយករងនៃនិយ័តករធានារ៉ាប់រងកម្ពុជា លោក Mah Kin Yoong អគ្គនាយកប្រតិបត្តិស្តីទី នៃក្រុមហ៊ុន ដាយ អ៊ិឈិ ឡាយហ្វ៍ ​ប្រធាន និងសមាជិកក្រុមប្រឹក្សារបស់ក្រុមហ៊ុន​​ ដាយ អ៊ិឈិ ឡាយហ្វ៍ លោកស្រីវេជ្ជបណ្ឌិត Maiko Kojiro នាយិកាមជ្ឈមណ្ឌលព្យាបាលកុមារ បេះដូងជប៉ុន និង​គណៈគ្រប់គ្រងជាន់ខ្ពស់មកពី ដាយ អ៊ិឈិ ឡាយហ្វ៍ និងមជ្ឈមណ្ឌលព្យាបាលកុមារ បេះដូងជប៉ុន។

 

មជ្ឈមណ្ឌលព្យាបាលកុមារ បេះដូងជប៉ុន គឺជាមជ្ឈមណ្ឌល​ឯកទេសរបស់ប្រទេសជប៉ុន ដែលបានប្តេជ្ញាផ្តល់សេវាថែទាំសុខភាព និងព្យាបាលដោយឥតគិតថ្លៃ ជូនដល់ប្រជាជនកម្ពុជាចាប់តាំងពីឆ្នាំ២០០៤មកម៉្លេះ។ នៅឆ្នាំ២០២៣ មជ្ឈមណ្ឌលព្យាបាលកុមារ បេះដូងជប៉ុន បានផ្តល់ការព្យាបាលដោយឥតគិតថ្លៃ ជូនដល់អ្នកជំងឺទាំងពេញវ័យ និងកុមារជាង៣ម៉ឺននាក់ រួមទាំងកុមារមានជំងឺមហារីកផងដែរ។ ដាយ អ៊ិឈិ ឡាយហ្វ៍​ ជាក្រុមហ៊ុនធានារ៉ាប់រងអាយុជីវិតឈានមុខគេមួយ របស់ប្រទេសជប៉ុន និងជាដៃគូគាំទ្រដំបូងរបស់មជ្ឈមណ្ឌលព្យាបាលកុមារបេះដូងជប៉ុន ចាប់តាំងពីក្រុមហ៊ុនបានចាប់ផ្តើមបោះជំហានចូលមកប្រទេសកម្ពុជា។ កន្លងមក ដាយ អ៊ិឈិ ឡាយហ្វ៍ បានជួយបរិច្ចាគឧបករណ៍វះកាត់ និងថែទាំអ្នកជំងឺ គាំទ្រការបរិច្ចាគឈាម និងជំនួយសម្ភារសំខាន់ៗផ្សេងទៀត។

 

លោកស្រីវេជ្ជបណ្ឌិត Maiko Kojiro នាយិកាមជ្ឈមណ្ឌលព្យាបាលកុមារ បេះដូងជប៉ុន បានមានប្រសាសន៍ថា៖ «យើងអរគុណយ៉ាងក្រៃលែងចំពោះការបរិច្ចាគពី ដាយ អ៊ិឈិ ឡាយហ្វ៍។ ការរួមចំណែកនេះ នឹងគាំទ្រដល់កិច្ចខិតខំប្រឹងប្រែងបន្ត​ទៀតរបស់យើង ក្នុងការផ្តល់ការថែទាំ ព្យាបាល និងសង្គ្រោះជីវិតអ្នកជំងឺកាន់តែច្រើនទៀត។ លោកស្រីវេជ្ជបណ្ឌិតបាន បន្ថែមថា៖ «ជាមួយការប្តេជ្ញាចិត្តយូរអង្វែងរបស់យើង ចំពោះសហគមន៍នៅកម្ពុជា កិច្ចសហការជាមួយក្រុមហ៊ុនដែលមានការប្តេជ្ញាចិត្តដូចជា ដាយ អ៊ិឈិ ឡាយហ្វ៍ ពិតជាសំខាន់ក្នុងការធានាអនាគត និងសុខុមាលភាពកាន់តែប្រសើរសម្រាប់សហគមន៍»។

 

ក្រុមហ៊ុន ដាយ អ៊ិឈិ ឡាយហ្វ៍ អ៊ីនសួរ៉ិនស៍ (ខេមបូឌា) ម.ក គឺជាក្រុមហ៊ុនធានារ៉ាប់រងអាយុជីវិតដែលមានការរីកលូតលាស់លឿនមួយ នៅក្នុងប្រទេសកម្ពុជា ក្នុងរយៈពេលត្រឹមតែជាង ៥ឆ្នាំប៉ុណ្ណោះ។ ដាយ អ៊ិឈិ ឡាយហ្វ៍ ជាក្រុមហ៊ុនបុត្រសម្ព័ន្ធរបស់ក្រុមហ៊ុន Dai-ichi Life Holdings, Inc. (“DLHD”) ដែលជាក្រុមហ៊ុនធានារ៉ាប់រងអាយុជីវិតឈានមុខគេក្នុងប្រទេសជប៉ុន អស់រយៈពេលជាង ១២១ ឆ្នាំ ជាប្រវត្តិសាស្ត្រ។ DLHD ទទួលបានការវាយតម្លៃ A+ ដោយ S&P និងបានចុះបញ្ជីនៅលើទីផ្សារភាគហ៊ុនតូក្យូស្តុកអ៊ិចឆេង (Tokyo Stock Exchange)។

ចាប់តាំងពីបង្កើតក្រុមហ៊ុន DLHD ក្នុងឆ្នាំ ១៩០២មក យើងបានប្តេជ្ញានៅក្បែរអតិថិជនរបស់យើងជានិច្ច និងមនុស្សជាទីស្រឡាញ់ក្នុងជីវិតរបស់ពួកគាត់ និងខិតខំប្រឹងប្រែងរួមគ្នាដើម្បីផ្តល់ជូននូវ “ភាពស្ងប់ចិត្ត” ក្រោមទស្សនៈ “អតិថិជនជាចម្បង” ។ ក្រុមហ៊ុនបានរួមចំណែកផ្តល់ជូននូវភាពស្ងប់ចិត្ត តាមរយៈការផ្តល់សេវាធានារ៉ាប់រងអាយុជីវិត និងសេវាហិរញ្ញវត្ថុផ្សេងៗ ដល់សហគមន៍ក្នុងមូលដ្ឋាន។ ក្នុងនាមជាក្រុមហ៊ុន DLHD យើងនឹងនៅក្បែរអតិថិជនរបស់យើង និងមនុស្សដែលពួកគាត់ស្រឡាញ់។

 

*ដាយ អ៊ិឈិ ឡាយហ្វ៍ ហូលឌីង អ៊ីង មានគ្រឹះមូលធនដ៏រឹងមាំ ជាមួយនឹងទ្រព្យសម្បត្តិសរុបចំនួន ៤៤៥.០៨ ពាន់លានដុល្លារ និងបុព្វលាភធានារ៉ាប់រងជាង ៤៩.៧១ពាន់លានដុល្លារ។ (គិតត្រឹមថ្ងៃទី ៣១ ខែមីនា ឆ្នាំ២០២៤)៕