លោក កត្តា អ៊ន អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានប្រាប់​សារព័ត៌មានថ្មីៗ​​ថា កម្មករជាង៧ពាន់នាក់​នោះ បានរងគ្រោះថ្នាក់ការងារ អំឡុង​ពេល​បំ​ពេញ​ការងារ និងគ្រោះថ្នាក់ពេលធ្វើដំណើរទៅមកកន្លែងការងារ។ ក្នុងចំណោមកម្មករ​ទាំងនោះ លោកអះអាងថា ប.ស.ស បានចំណាយថវិកាសរុបចំនួនជាង ៨ ៤០៦លានរៀល លើថ្លៃព្យាបាល រួមទាំងតាវកាលិកជាសាច់ប្រាក់ដែលជាអត្ថប្រយោជន៍ផ្សេងៗទៀត។ 

 

ជាមួយគ្នាដែរ ក្នុងចំណោម កម្មករជាង៧ពាន់នាក់ខាងលើ មានកម្មករ៥៦៤នាក់ ដោយ​ក្នុង​នោះ​មានស្រី ២២៧នាក់ បានស្នើសុំវាយតម្លៃពីការបាត់បង់សមត្ថភាពអចិន្ត្រៃយ៍ ហើយ​ទទួល​បានធនលាភបាត់បង់សមត្ថភាពការងារអចិន្ត្រៃយ៍។ 

 

កម្មករគួរយល់ដឹងអំពីវិធានការបង្ការហានិភ័យការងារ ដែលអាចកើតមានឡើងជាយថា​ហេតុនានា ទោះបីពួកគេ មានប័ណ្ណ ប.ស.ស.ក៏ដោយ។

 

«ចំពោះបញ្ហាគ្រោះថ្នាក់ការងារ បេឡាជាតិសន្តិសុខសង្គមនៃក្រសួងការងារ និងបណ្តុះ​បណ្តាលវិជ្ជាជីវៈ បាននិងកំពុងជំរុញការផ្សព្វផ្សាយអប់រំ​ឱ្យពួកគេ​(កម្មករ)​យល់ដឹង​អំពី​អត្ថប្រយោជន៍របបសន្តិសុខសង្គម…»។

 

អ្នកនាំពាក្យក្រសួងការងារ ប្រាប់សារព័ត៌មានថ្មីៗ តាមប្រព័ន្ធតេឡេក្រាមបែបនេះ ហើយ​លោកបន្ថែមថា ​យន្តការបង្ការហានិភ័យការងារនេះ ក្រសួងកំពុងជំរុញឱ្យមានការផ្សព្វផ្សាយ អំពីសុវត្ថិភាពចរាចរណ៍ក្នុងការដឹកជញ្ជូន និងការធ្វើដំណើរ របស់កម្មករនិយោជិត, លក្ខខណ្ឌអនាម័យ សុវត្ថិភាពការងារ, វិធានការទប់ស្កាត់ករណីសន្លប់របស់កម្មករនិយោជិត, ការអនុវត្តរបបសន្តិសុខសង្គមផ្នែក ហានិភ័យការងារ, អំពីវិជ្ជាសង្គ្រោះបឋម និងការទប់ស្កាត់ករណីបង្ការអគ្គិភ័យនៅកន្លែង ធ្វើការជាដើម។

 

សូមជម្រាបថា នៅពេលសមាជិក ប.ស.ស. ជួបគ្រោះថ្នាក់ការងារ នឹងទទួលបានសេវា សង្គ្រោះបន្ទាន់, សេវាព្យាបាលនិងថែទាំ, ប្រាក់ឧបត្ថម្ភដល់អ្នក និងអ្នកថែទាំ។ លើសពីនេះ ពួកគេនឹងទទួលបានប្រាក់បំណាច់ប្រចាំថ្ងៃ ៧០ភាគរយនៃប្រាក់ឈ្នួលជាប់ ភាគទានប្រចាំ ថ្ងៃ ពេលដែលឈឺមិនអាចទៅធ្វើការបាន និងឧបករណ៍ជំនួយផ្សេងៗប្រសិនរបួស ឬពិការ ។ ជាមួយគ្នាដែរ ពួកគេក៏អាចស្នើសុំវាយតម្លៃពីការបាត់បង់សមត្ថភាព ដើម្បីទទួលបាន ប្រាក់ឧបត្ថម្ភបន្ថែមផងដែរ។ ចំណែក គ្រួសារសមាជិក ប.ស.ស នឹងទទួលបានប្រាក់ ឧបត្ថម្ភ ប្រសិនបើសមាជិក ប.ស.ស មានគ្រោះថ្នាក់ដល់ជីវិត៕