ជាតិ
នាវាដឹកទំនិញថៃ១គ្រឿង បានលិចនៅភូមិសាស្រ្តខេត្តកោះកុង កប៉ាល់ដែលលិចនៅកោះកុង ត្រូវសមត្ថកិច្ចខេត្តព្រះសីហនុជួយសង្គ្រោះ។ រូបពី លោក ឱ សារឿន
× ភ្នំពេញ៖ ជនជាតិថៃ១០នាក់ ត្រូវបានសមត្ថកិច្ចកម្ពុជា ជួយសង្គ្រោះនៅចន្លោះកោះវ៉ាង និងកោះម្នាស់ ក្នុងភូមិសាស្រ្តខេត្តកោះកុង ដោយសារនាវាដឹកទំនិញរបស់ពួកគេ ត្រូវបានលិច កាលពីថ្ងៃទី៩មិថុនា។ នេះបើតាមលោក ឱ សារឿន អ្នកនាំពាក្យខេត្តព្រះសីហនុ។
នាវាដឹកទំនិញ ដែលបានលិចមានបណ្ដោយ ៤៩ម៉ែត្រ, ទទឹង១៥ ម៉ែត្រ, និងទម្ងន់ផ្ទុកពី៦៧០ ទៅ១៣០០ តោន។ នៅកប៉ាល់នោះ មានមនុស្ស១០នាក់ ហើយត្រូវបានក្រុមជួយសង្គ្រោះប្រចាំខេត្តព្រះសីហនុ អន្តរាគមន៍ជួយទាន់ពេលវេលា។
ជុំវិញករណីនេះ អ្នកនាំពាក្យខេត្តព្រះសីហនុបានប្រាប់សារព័ត៌មានថ្មីៗ៖ «បុរសរងគ្រោះទាំង១០នាក់នោះ បានថ្លែងអំណរគុណដល់អាជ្ញាធរកម្ពុជា និងអ្នកជួយសង្គ្រោះទាំងអស់ដែលបានជួយក្រុមនាវិកលើកប៉ាល់រួចផុតពីគ្រោះថ្នាក់»។
ជាមួយគ្នាដែរ កម្លាំងនគរបាលការពារព្រំដែនទឹកកម្ពុជា បានការពារទូកុងតឺន័រ ដែលអណ្តែតលើផ្ទៃទឹក ហើយរង់ចាំក្រុមជំនាញកំពង់ផែស្វយ័តខេត្តព្រះសីហនុ ទៅសណ្តោង៕
ជនជាតិថៃ ដែលសមត្ថកិច្ចកម្ពុជាបានជួយសង្គ្រោះ។ រូបពី លោក ឱ សារឿន
ទូកុងតឺន័រដែលលិចនៅកោះកុង។ រូបពី GCNP
© រក្សាសិទ្ធិដោយ thmeythmey.com