លោក អ៊ុន ចាន់ដា អភិបាលខេត្តកំពង់ចាម បានចេញចំណាត់ការទប់ស្កាត់សកម្មភាព ជក់បារី លេងហ្គេមតាមអ៊ីនធឺណិត និងភាពអសកម្មនានានៅក្នុងសង្គម នៅក្នុងភូមិសាស្ត្រខេត្តកំពង់ចាម។
ចំណាត់ការនេះ កើតឡើងបន្ទាប់ពីអាជ្ញាធរសង្កេតឃើញថា យុវជន និងសិស្សានុសិស្សមួយចំនួន បានគេចសាលាមិនចូលរៀន ហើយទៅប្រមូលផ្តុំគ្នានៅតាមម៉ាត កន្លែងលក់កាហ្វេ-ភេសជ្ជៈ, ក្លិបហាត់ប្រាណ ក្លិបបាល់ទះ ក្លិបបាល់ទាត់, អាហារដ្ឋាន និងកន្លែងកម្សាន្តនានា ដើម្បីប្រើប្រាស់ទូរសព្ទ លេងហ្គេមតាមអ៊ីនធឺណិត ជក់បារី និងបារីអេឡិចត្រូនិក បង្កជម្លោះ បង្កបក្សពួកក្មេងទំនើង និងឈានទៅប្រើប្រាស់គ្រឿងញៀនថែមទៀត។
នៅក្នុងសេចក្តីជូនដំណឹងដែលចុះថ្ងៃទី១០ ខែមិថុនា ឆ្នាំ២០២៤ លោក អ៊ុន ចាន់ដា អភិបាលខេត្តកំពង់ចាម បានណែនាំឱ្យគណៈបញ្ជាការឯកភាពរដ្ឋបាលក្រុង-ស្រុក មេឃុំ-ចៅសង្កាត់ ចុះអប់រំផ្សព្វផ្សាយដល់ម្ចាស់អាជីវកម្ម ម៉ាត កន្លែងលក់កាហ្វេភេសជ្ជៈ, ក្លិបហាត់ប្រាណ ក្លិបបាល់ទះ ក្លិបបាល់ទាត់, អាហារដ្ឋាន និងកន្លែងកម្សាន្តនានា ដើម្បីទប់ស្កាត់ និងមិនត្រូវអនុញ្ញាតឱ្យសិស្សនុសិស្ស យុវជន ប្រមូលផ្តុំគ្នាលេងទូរស័ព្ទ, លេងហ្គេមតាមអ៊ីនធឺណិត ជក់បារី បារីអេឡិចត្រូនិកជាដើម នៅទីតាំងអាជីវកម្មរបស់ខ្លួន។
លោកអភិបាលខេត្ត ក៏បានប្រាប់ទៅគណៈបញ្ជាការឯកភាពរដ្ឋបាលក្រុង-ស្រុក មេឃុំ-ចៅសង្កាត់ បន្តចុះអប់រំផ្សព្វផ្សាយគោលនយោបាយ «ភូមិ-ឃុំ-សង្កាត់មានសុវត្ថិភាព» នៅគ្រប់សាលារៀន និងម្ចាស់អាជីវកម្ម ម៉ាត កន្លែងលក់កាហ្វេ អាហារដ្ឋាន និងកន្លែងកម្សាន្តនានា ដើម្បីទប់ស្កាត់បាតុភាពអសកម្មរបស់សិស្សានុសិស្សនៅតាមទីតាំងអាជីវកម្មនានា, លុបបំបាត់ក្មេងទំនើង, ល្បែងស៊ីសងខុសច្បាប់ គ្រឿងញៀន និងបទល្មើសគ្រប់ប្រភេទក្នុងមូលដ្ឋានរបស់ខ្លួន។ «ត្រូវចាត់វិធានការយ៉ាងម៉ឺងម៉ាត់តាមច្បាប់ ចំពោះម្ចាស់អាជីវកម្មណាដែលមិនសហការ ឬបន្តលាក់បាំង ឬបង្កលក្ខណៈឱ្យបន្ត ការប្រព្រឹត្តសកម្មភាពអសកម្មរបស់សិស្សានុសិស្សនៅក្នុងទីតាំងអាជីវកម្មរបស់ខ្លួន»។ នេះជាចំណាត់ការរបស់អភិបាលខេត្តកំពង់ចាម ដែលណែនាំទៅគណៈបញ្ជាការឯកភាពរដ្ឋបាលក្រុង-ស្រុក មេឃុំ-ចៅសង្កាត់ឱ្យអនុត្តន៍។
លោក អ៊ុន ចាន់ដា ក៏បានប្រាប់ឱ្យនាយកគ្រឹះស្ថានសិក្សារដ្ឋ និងឯកជន បន្តធ្វើការងារជាមួយអាជ្ញាធរមូលដ្ឋាន អាណាព្យាបាលសិស្ស និងសហគមន៍ ក្នុងការចូលរួមទប់ស្កាត់ អវត្តមានសិស្ស និងត្រូវបន្តពង្រឹងវត្តមានរបស់សិស្ស សំដៅចូលរួមលុបបំបាត់សកម្មភាពប្រមូលផ្តុំលេងទូរស័ព្ទ លេងហ្គេមតាមអ៊ីនធឺណិត ជក់បារី, បារីអេឡិចត្រូនិក និងឈានទៅលួចប្រើប្រាស់គ្រឿងញៀនរបស់សិស្ស។
ទន្ទឹមនឹងនេះ លោកអភិបាលខេត្ត ក៏អំពាវនាវដល់ម្ចាស់អាជីវកម្ម ម៉ាត កន្លែងលក់កាហ្វេ-ភេសជ្ជៈ, ក្លិបហាត់ប្រាណ ក្លិបបាល់ទះ ក្លិបបាល់ទាត់, អាហារដ្ឋាន និងកន្លែងកម្សាន្តនានា ចូលរួមសហការជាមួយអាជ្ញាធរមូលដ្ឋាន ក្នុងការផ្តល់ព័ត៌មានក្នុងករណីមានការប្រមូលផ្តុំរបស់សិស្ស ឬយុវជន លេងទូរស័ព្ទ លេងហ្គេមតាមអ៊ីនធឺណិត ជក់បារី និងប្រព្រឹត្តសកម្មភាពអសកម្មនានា នៅក្នុងទីតាំងអាជីវកម្មរបស់ខ្លួន។ ក្នុងករណី ម្ចាស់អាជីវកម្មមិនសហការ ហើយនៅបណ្តែតបណ្តោយឱ្យមានភាពអសកម្មនានាអាជ្ញាធរមានសមត្ថកិច្ច នឹងបិទអាជីវកម្មព្រមទាំងដាក់ទោសទណ្ឌតាមផ្លូវច្បាប់ជាធរមាន។ នេះបើតាមការណែនាំរបស់ លោក អ៊ុន ចាន់ដា អភិបាលខេត្តកំពង់ចាម៕