លោក មួង ច័ន្ទរស្មី ប្រធានការិយាល័យអប់រំ និងផ្សព្វផ្សាយ នៃនាយកដ្ឋានសារមន្ទីរ បានប្រាប់សារព័ត៌មានថ្មីៗថា វត្ថុបុរាណដែលនឹងដាក់តាំងពិព័រណ៍នេះ មានចំនួន៩៩វត្ថុ ដោយក្នុងនោះវត្ថុបុរាណធ្វើពីថ្មចំនួន៥ ,ធ្វើពីសំរឹទ្ធចំនួន២២ និងធ្វើពីមាស ដែលជាគ្រឿងអលង្ការ មានចំនួន៧២។
  

លោក ច័ន្ទរស្មី បន្ថែមថា វត្ថុបុរាណធ្វើពីថ្ម និងសំរឹទ្ធ នឹងតាំងពេញ៦ខែ។ ដោយឡែកចំពោះគ្រឿងអលង្ការធ្វើពីមាស ត្រូវបានបែងចែកជា៦ក្រុម ដើម្បីដាក់តាំងឆ្លាស់គ្នា ក្នុងមួយក្រុមតាំងរយៈពេល១ខែ។ 
 

«គ្រឿងអលង្ការ មានជាឈុត មានមកុដ ខ្សែព័ទ្ធឆៀង ក្រវិល និងគ្រឿងលម្អផ្សេងៗ។ គ្រឿងអលង្ការទាំងនេះ យើងបែងចែកជា៦ក្រុម។ ហើយយើងដាក់តាំងឆ្លាស់គ្នា​ បានន័យថា ក្នុងមួយក្រុមយើងដាក់តាំង១ខែ។ ខែក្រោយ យើងដាក់តាំង១ក្រុមផ្សេងទៀត»។ នេះជាការបញ្ជាក់បន្ថែម របស់លោក ច័ន្ទរស្មី។
 

សូមបញ្ជាក់ថា ការតាំងពិព័រណ៍វត្ថុបុរាណទាំង៩៩វត្ថុ រយៈពេល៦ខែនេះ នឹងបើកឱ្យសាធារណជន ចូលទស្សនាជារៀងរាល់ថ្ងៃ រួមទាំងថ្ងៃសៅរ៍ ថ្ងៃអាទិត្យ និងថ្ងៃបុណ្យផងដែរ ៕