កីឡាជាតិ
ជាតិ
កម្ពុជាត្រៀមខ្លួនសម្រាប់កីឡាស៊ីហ្គេមឆ្នាំ២០១៥ នៅសិង្ហបុរី ដោយគ្មានចំបាប់ និងវ៉ូវីណាម ![](https://image.thmeythmey.com/pictures/2014/12/19/19122014162651nocc.jpg)
×![]()
គណៈកម្មាធិការជាតិអូឡាំពិកកម្ពុជា (NOCC) និងក្រសួងអប់រំ យុវជន និងកីឡា កាលពីថ្ងៃពុធកន្លងមក បានជួបប្រជុំជាមួយថ្នាក់សហព័ន្ធកីឡាជាតិនានា ដើម្បីពិភាក្សាកិច្ចការដែលពាក់ព័ន្ធនឹងការចូលរួមក្នុងព្រឹត្តិការណ៍កីឡាស៊ីហ្គេមនៅក្នុងប្រទេសសិង្ហបុរី នាពាក់កណ្តាលឆ្នាំ២០១៥ ខាងមុខនេះ។
ព្រឹត្តិការណ៍កីឡាស៊ីហ្គេមលើកទី២៨ នឹងប្រព្រឹត្តទៅនាអំឡុងខែមិថុនា ឆ្នាំ២០១៥ ខាងមុខនេះ ដោយសិង្ហបុរី ទទួលបន្ទុកធ្វើជាម្ចាស់ផ្ទះ។ បើតាមការបញ្ជាក់របស់លោក ញ៉ាន សុខវិសាល នាយបេសកកម្មនៃគណៈកម្មាធិការជាតិអូឡាំពិកកម្ពុជា (NOCC) កម្ពុជាមានប្រភេទកីឡាជាបឋមចំនួន២៣ដែលត្រូវចូលរួមប្រកួតប្រជែង ប៉ុន្តែប្រភេទកីឡាមួយចំនួននឹងត្រូវកាត់ចេញ បន្ទាប់ពីមានការត្រួតពិនិត្យត្រឹមត្រូវពីសំណាក់មន្ត្រីបច្ចេកទេស NOCC និងក្រសួងអប់រំ យុវជន និងកីឡា។
កាលពីថ្ងៃពុធកន្លងមក លោក វ៉ាត់ ចំរើន អគ្គលេខាធិការ NOCC និងលោក អ៊ុក សិទ្ធិជាតិ អគ្គនាយកកីឡា នៃក្រសួងអប់រំ យុវជន និងកីឡា បានដឹកនាំកិច្ចពិភាក្សាជាមួយថ្នាក់ដឹកនាំសហព័ន្ធកីឡាជាតិដែលជាប់ពាក់ព័ន្ធទាំងអស់ទាក់ទងនឹងការត្រៀមលក្ខណៈនានាសម្រាប់ព្រឹត្តិការណ៍កីឡាប្រចាំតំបន់មួយនេះ។
អគ្គលេខាធិការ NOCC លោក វ៉ាត់ ចំរើន បានលើកឡើងថា ម្ចាស់ផ្ទះសិង្ហបុរីបានសម្រេចដាក់កីឡាចំនួន៣៦ប្រភេទដោយមាន៤០២វិញ្ញាសាសម្រាប់ការប្រកួតប្រជែង ហើយកម្ពុជាសម្រេចចិត្តបញ្ជូនបញ្ជីប្រតិភូ និងអត្តពលិក រួមជាមួយប្រភេទកីឡាជាបឋមចំនួន២។
ចំពោះការត្រៀមលក្ខណៈនេះ លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា បានអះអាងថា ការប្រមូលផ្តុំក្រុមជម្រើសជាតិនឹងដំណើរការចាប់ពីថ្ងៃទី៦ ខែមករា រហូតដល់ថ្ងៃទី៥ ខែមិថុនា ឆ្នាំ២០១៥ ។ អ្វីដែលខុសប្លែកពីឆ្នាំមុនៗ ក្រសួងអប់រំ យុវជន និងកីឡា បានសម្រេចបើកប្រាក់ឧបត្ថម្ភប្រចាំថ្ងៃដល់អត្តពលិកគ្រប់រូបដើម្បីគ្រប់គ្រងការហូបចុកដោយខ្លួនឯង ពោលគឺមិនមានការរៀបចំអាហាររួមនោះឡើយ។ ជាមួយគ្នានេះ ថ្នាក់ដឹកនាំក្រសួងបានស្នើដល់សហព័ន្ធកីឡាទាំងអស់ឲ្យតាមដានពិនិត្យមើលការហូបចុករបស់កីឡាករ-កីឡាការិនី ពីព្រោះវាអាចបង្កនូវហានីភ័យខ្ពស់ ប្រសិនបើពួកគេគ្រប់គ្រងមិនបានត្រឹមត្រូវ។
ដើម្បីទទួលបាននូវធនធានពិតប្រាកដ អគ្គនាយកកីឡា លោក អ៊ុក សិទ្ធិជាតិ បានណែនាំដល់សហព័ន្ធទាំងអស់ធ្វើការជ្រើសរើសកីឡាករ-កីឡាការិនី ប្រកបដោយសុក្រឹត្យភាព និងតម្លាភាព ជាពិសេសជ្រើសរើសចេញពីក្នុងចំណោមអ្នកដែលឆ្លងកាត់ការប្រកួតជើងឯកថ្នាក់ជាតិ ហើយកីឡាករ-កីឡាការិនី ដែលមានមូលដ្ឋាននៅបរទេស ក៏ត្រូវឆ្លងកាត់ការធ្វើតេស្តិ៍វាស់ស្ទង់កម្រិតសមត្ថភាពផងដែរ។
អ្វីដែលគួរឲ្យសោកស្តាយ កីឡាដ៏មានសក្តានុពលពីរប្រភេទរបស់កម្ពុជា គឺចំបាប់ និងវ៉ូវីណាម មិនត្រូវបានម្ចាស់ផ្ទះដាក់បញ្ចូលសម្រាប់ការប្រកួតប្រជែងនាពេលខាងមុខនោះឡើយ ដែលនេះ ជាបន្ទុកដ៏ធ្ងន់របស់កម្ពុជាក្នុងស្វែងរកមេដាយឲ្យបានច្រើនជាងមុន។
កាលពីព្រឹត្តិការណ៍កីឡាស៊ីហ្គេមលើកទី២៧ នៅក្នុងប្រទេសមីយ៉ាន់ម៉ា នាឆ្នាំ២០១៣ កម្ពុជាដណ្តើមបានមេដាយសរុបចំនួន៤៧ ក្នុងនោះ មាស៨ ប្រាក់១១ និងសំរឹទ្ធ២៨ ។ ក្នុងចំណោមជ័យលាភី ដែលកម្ពុជាទទួលបាននាពេលនោះ កីឡាចំបាប់ឈ្នះមេដាយមាស៤ ប្រាក់២ និងសំរឹទ្ធ៤ ខណៈវ៉ូវីណាម បានមេដាយមាស២ ប្រាក់១ និងសំរឹទ្ធ៧ ។
កីឡាទាំង២៣ប្រភេទ ដែលកម្ពុជា គ្រោងបញ្ជូនជាបឋមសម្រាប់ព្រឹត្តិការណ៍កីឡាស៊ីហ្គេមនាពេលខាងមុខរួមមានដូចជាហែលទឹក អត្តពលកម្ម វាយសី បាល់បោះ ប្រដាល់សាកល ទូកកានូ ប្រណាំងកង់ជិះសេះគុនដាវ បាល់ទាត់ វាយកូនហ្គោល កាយសម្ព័ន្ធ យូដូប៉េតង់បាល់អោប សីប៉ាតាក្រ វាយកូនឃ្លីលើតុ តេក្វាន់ដូ វាយកូនបាល់ទូកប្រពៃណី ទ្រីយ៉ាត្លុង បាល់ទះ និងវូស៊ូ៕
© រក្សាសិទ្ធិដោយ thmeythmey.com