ជាតិ
សមត្ថភាពបញ្ចូលសំឡេងរបស់ ឋានរិទ្ធ និងម៉ារីណែត ទទួលបានប៊ូតុងមាសពី ខាត់ សុឃីម ![](https://image.thmeythmey.com/pictures/2014/12/22/marineth.jpg)
×![]()
នាសប្តាហ៍ចុងក្រោយនៃវគ្គ Judge Audition ក្នុងកម្មវិធី Cambodia’s Got Talent របស់ទូរទស្សន៍ហង្សមាស តារាចម្រៀង ខាត់ សុឃីម បានចុចប៊ូតង់ពណ៌មាសដល់បេក្ខជន អេ ឋានរិទ្ធ និងបេក្ខនារី ឈុន ម៉ារីណែត ដែលបានបញ្ចេញសមត្ថភាពលើការបញ្ចូលសំឡេងក្នុងឈុតនៃរឿងដ៏កំសត់មួយ។
អេ ឋានរិទ្ធ និង ឈុន ម៉ារីណែត គឺជាមិត្តភក្ត្ររួមការងារផ្នែកពិធីករ-ពិធីការិនី ដែលបម្រើការនៅវិទ្យុមួយក្នុងរាជធានីភ្នំពេញ។ ម៉ារីណែត បានបញ្ជាក់ថា ពួកគាត់មិនដែលធ្លាប់បានទទួលការបណ្តុះបណ្តាលផ្នែកបញ្ចូលសំឡេងឡើយ ប៉ុន្តែជំនាញដែលនេះ កើតឡើងតាមរយៈការងារដែលខ្លួនបំពេញជារៀងរាល់ថ្ងៃ។
ក្នុងរយៈពេលតែ២នាទីនៃកម្មវិធី Cambodia’s Got Talent ឋានរិទ្ធ និងម៉ារីណែត បានបញ្ចូលសំឡេងទាក់ទងនឹងឈុតរឿងមួយដែលតួប្រុសកំពុងស្ថិតមុខចង្គូមមច្ចរាជ។ នាជីវិតចុងក្រោយរបស់បុរសដែលមានឈ្មោះថា «ភូ» មានការទួញសោកពីមនុស្សជាច្រើន ជាពិសេសភរិយា និងកូនៗជាទីស្រឡាញ់។
បើផ្អែកលើបច្ចេកទេសនៃការបញ្ចូលសំឡេងរបស់អ្នកទាំងពីរ គេស្រមៃឃើញរូបភាពមនុស្សជាច្រើនទៀតដូចជាឪពុកម្តាយ ជីដូនជីតា អ្នកបម្រើប្រុសស្រី រួមទាំងសំនៀងខ្មែរ-ចិនប៉ៃឡាំ និងលាយឡំដោយសម្តីកំប្លុកកំប្លែងរបស់អ្នកបម្រើនៅវិនាទីចុងក្រោយផងដែរ។
តារាចម្រៀង ខាត់ សុឃីម ដែលបានចុចប៊ូតុងពណ៌មាសដើម្បីឲ្យអ្នកទាំងពីរឈានដល់វគ្គ LiveShow ដោយមិនចាំបាច់ប្រកួតជម្រុះ បានលើកឡើងថា តាមរយៈការផ្ចង់ស្តាប់តែសំឡេង គាត់មានអារម្មណ៍ហាក់ដូចជាមានមនុស្សពី២០ទៅ៣០នាក់។ លោក ព្រាប សុវត្ថិ និងតារាកំប្លែងនាយ កុយ ក៏ទទួលស្គាល់សមត្ថភាពដ៏អស្ចារ្យនេះផងដែរ៕
© រក្សាសិទ្ធិដោយ thmeythmey.com