កីឡាអន្តរជាតិ
អន្តរជាតិ
ឈ្មោះខ្មែរស្ថិតនៅលើស្នាមសាក់របស់ Ibrahimovicសម្រាប់យុទ្ធនាការ WFP ![](https://image.thmeythmey.com/pictures/2015/02/16/1-zlatan.jpg)
×![]()
មិនមែនជារឿងចៃដន្យនោះឡើយដែលកីឡាករ ZlatanIbrahimovicនៃក្លិប Paris Saint Germainបានដោះអាវរបស់ខ្លួន បន្ទាប់ពីបានស៊ុតបាល់បញ្ចូលទីលើក្រុម Caen នាការប្រកួតលីក Ligue 1 របស់បារាំង កាលពីថ្ងៃសៅរ៍។ ការដោះអាវរបស់ខ្សែប្រយុទ្ធស៊ុយអែតរូបនេះ គឺដើម្បីបង្ហាញស្នាមសាក់បណ្តោះអាសន្នរបស់ខ្លួនក្នុងយុទ្ធនាការគាំទ្រកម្មវិធីស្បៀងអាហារពិភពលោករបស់អង្គការសហប្រជាជាតិ។ នៅលើស្នាមសាក់ មានឈ្មោះមនុស្សប្រមាណ៥០នាក់ដែលរងគ្រោះដោយការអត់ឃ្លាន ហើយអ្វីដែលគួរឲ្យកត់សម្គាត់ គឺឃើញមានឈ្មោះជាភាសាខ្មែរចំនួន២ផងដែរ គឺ «លីដា និងឈើយ»។
យោងតាមគេហទំព័រ football.fr កីឡាករ ZlatanIbrahimovicបានចូលរួមក្នុងយុទ្ធនាការរបស់កម្មវិធីស្បៀងអាហារពិភពលោករបស់អង្គការសហប្រជាជាតិ (WFP) ដោយមិនគិតពីប្រាក់កម្រៃនោះឡើយ។ ការដោះអាវរបស់ ZlatanIbrahimovicបាននាំឲ្យគេទទួលកាតលឿង ហើយរូបគេត្រូវអវត្តមាននាការប្រកួតជាមួយក្លិប Monaco នាថ្ងៃទី១ ខែមិនា។
ថ្លែងក្នុងសន្និសីទសារព័ត៌មានកាលពីថ្ងៃអាទិត្យ ដោយមានការចូលរួមពីតំណាងអង្គការ WFP ប្រចាំប្រទេសបារាំង បាននិយាយថា៖ «អ្វីដែលបានកើតឡើងកាលពីម្សិលមិញ មិនមានជារឿងគិតទុកមុននោះឡើយ ប៉ុន្តែខ្ញុំពិតជារីករាយណាស់។ នៅរាល់ពេលដែលអ្នកលឺពីឈ្មោះ Ibrahimovicអ្នកក៏នឹងគិតទៅដល់ឈ្មោះពួកគាត់ផងដែរ [ឈ្មោះដែលសាក់លើខ្លួន]» ។
ការដោះអាវជាច្រើននាទី គេមើលឃើញមានឈ្មោះដែលសរសេរជាច្រើនភាសា ដែលក្នុងនោះមានឈ្មោះខ្មែរ «ឈើយ» «លីដា» និងឈ្មោះផ្សេងទៀត ដូចជា «Carmen, Mariko, Antoine, Siatta, Rahma»។ឈ្មោះទាំងអស់មានចំនួន៥០នាក់ ដែលអ្នកទាំងនោះ សុទ្ធជាជនដែលបានជួបគ្រោះទុរភឹក្ស។
នេះជាការចូលរួមរបស់ Ibrahimovicក្នុងគម្រោង «805 Million Names» របស់ WFP ។ កីឡាកររូបនេះ បាននិយាយថា៖ «គ្មានអ្វីដែលគ្រោះថ្នាក់ជាងការអត់ឃ្លាននោះឡើយ ពីព្រោះមិនមែនមានតែម្នាក់ ឬពីរនាក់ទេ ពោលគឺមានរហូតដល់ទៅ៨០៥លាននាក់។ ប្រសិនបើខ្ញុំអាចដាក់ឈ្មោះពួកគាត់បានទាំងអស់ ខ្ញុំច្បាស់ជាធ្វើ»៕
ទស្សនាវីដេអូ
© រក្សាសិទ្ធិដោយ thmeythmey.com