កីឡាអន្តរជាតិ
អន្តរជាតិ
ចិនគ្រោងកែទម្រង់វិស័យបាល់ទាត់របស់ខ្លួន ដើម្បីក្លាយជាមហាអំណាចបាល់ទាត់ ![](https://image.thmeythmey.com/pictures/2015/03/19/1932015163731china.jpg)
×![]()
រដ្ឋាភិបាលចិនបានបង្ហាញមហិច្ឆតារបស់ខ្លួន លើវិស័យកីឡាបាល់ទាត់ ដោយគ្រោងនឹងធ្វើកំណែទម្រង់មួយដើម្បីបង្កើនសមត្ថភាពនៃការប្រកួតកីឡាប្រភេទនេះ នៅក្នុងប្រទេសដែលមានប្រជាជនច្រើនបំផុតនៅលើពិភពលោកមួយនេះ។ នេះបើយោងតាមការផ្សាយរបស់ CCTV ។
គោលដៅសំខាន់ជាចំបងនៃគម្រោងនេះគឺត្រូវធ្វើយ៉ាងណាដើម្បីធានាថាក្រុមបាល់ទាត់ស្ត្រីរបស់ប្រទេសចិន ក្លាយជាក្រុមខ្លាំងមួយនៅលើពិភពលោកនិងចំណែកឯក្រុមបាល់ទាត់បុរសវិញ ត្រូវតែរីកចម្រើនក្លាយជាក្រុមដែលមានកម្លាំងដ៏អស្ចារ្យមួយ។
ចំពោះគោលដៅរយៈពេលវែងមួយទៀតគឺប្រទេសចិន ចង់ធ្វើជាម្ចាស់ផ្ទះ នៃការប្រកួតកីឡាបាល់ទាត់ពិភពលោក WorldCup ដែលចិនបានចូលរួមនៅក្នុងព្រឹត្តិការណ៍តែម្ដងគត់កាលពីឆ្នាំ ២០០២ហើយបានធ្លាក់ចេញពីការប្រកួត ៣២ ក្រុមចុងក្រោយ ដោយចាញ់ក្រុមទាំងបី នៅក្នុងពូលនិងបានបរាជ័យដោយរកគ្រាប់បាល់បានតែ ១ គ្រាប់តែប៉ុណ្ណោះ។
ដើម្បីរកមូលនិធិសម្រាប់ទ្រទ្រង់គម្រោងនេះ ចិនបានអំពាវនាវឱ្យមានការបើកឆ្នោតកីឡាជាតិ ដើម្បីយកប្រាក់ ទៅបង្កើនការវិនិយោគនៅក្នុងវិស័យកីឡាបាល់ទាត់។
បើតាមគម្រោងនេះ ចិនក៏បានស្នើសុំឲ្យមានការសាងសង់មជ្ឈមណ្ឌលបណ្តុះបណ្តាលកីឡាបាល់ទាត់ ពីរបន្ថែមទៀតនៅថ្នាក់ជាតិរួមជាមួយនឹងការបង្កើនហេដ្ឋារចនាសម្ព័ន្ធកីឡាបាល់ទាត់នៅទូទាំងប្រទេសផងដែរ។
ឧទាហរណ៍ផែនការនេះ ចង់ឱ្យមានការកសាងអគារបណ្តុះបណ្តាលកីឡាបាល់ទាត់ ២ ម៉ឺននៅក្នុងសាលាបឋមសិក្សានិងមធ្យមសិក្សានៅត្រឹមឆ្នាំ ២០២០នឹងត្រូវសាងសង់អគារលើសនេះពីរដងនៅត្រឹមឆ្នាំ ២០២៥ ។ ជាក់ស្ដែង សាលារៀនតែ ៥០០០ប៉ុណ្ណោះនៅទូទាំងប្រទេសចិន ដែលមានផ្តល់មធ្យោបាយហ្វឹកហាត់កីឡាបាល់ទាត់៕
© រក្សាសិទ្ធិដោយ thmeythmey.com