កីឡាអន្តរជាតិ
Floyd ចំណាយជិត២០ម៉ឺនដុល្លារជួលចុងភៅមកធ្វើអាហារមុនពេលប្រកួតជាមួយ Pacquiao
×![]()
កីឡាករប្រដាល់សញ្ជាតិអាមេរិក Floyd Mayweatherដែលជាអត្តពលិករកចំណូលបានខ្ពស់បំផុតនៅលើពិភពលោកបានជួលមេចុងភៅផ្ទាល់ខ្លួនដើម្បីមកពិនិត្យរបបអាហារប្រចាំថ្ងៃរបស់គាត់នៅមុនពេលការប្រកួតដ៏ធំមួយក្នុងអាជីព ជាមួយកីឡាករសញ្ជាតិហ្វីលីពីនManny Pacquiaoនៅខែឧសភា ខាងមុខនេះ។
សារព័ត៌មាន TMZ បានផ្សាយថា កីឡាFloydបានចំណាយប្រាក់សរុប ១៨៤ ០០០ ដុល្លារ ដើម្បីជួលមេចុងភៅមកពីទីក្រុងឡាសវេហ្គាស ដើម្បីចម្អិនអាហារឲ្យលោកញ៉ាំ ក្នុងមួយថ្ងៃ ៤ ពេល រហូតដល់ថ្ងៃប្រកូតជាមួយ កីឡាករPacquiao។
ប្រភពដដែលបានឲ្យដឹងផងដែរថា ចុងភៅដែលកីឡាករ Floydជួលមកនេះ គឺមានឈ្មោះហៅក្រៅថា Chef Q ហើយនាងនឹងត្រូវធ្វើការ ២៤ ម៉ោងក្នុងមួយថ្ងៃ និង ៧ ថ្ងៃក្នុងមួយសប្ដាហ៍ ដើម្បីធ្វើអាហារដែលមានសារធាតុចិញ្ចឹមគ្រប់គ្រាន់ សម្រាប់កីឡាករ Floydឲ្យរហូតដល់ថ្ងៃប្រកួតមកដល់ នៅថ្ងៃទី២ ខែឧសភា។
បើយោងតាមតម្លៃនៃការជួលចុងភៅនេះ គឺមានន័យថា ក្នុងមួយពេលកីឡាករ Floydនឹងបរភោគអាហារមួយចាន ដែលមានតម្លៃជាង ១០០០ ដុល្លារ។ កីឡាករប្រដាល់រូបនេះបាននិយាយថា៖«អ្នកណាក៏ដោយដែលរស់នៅជុំវិញពិភពលោកប្រសិនបើអ្នកចង់ឲ្យ នាងChef Qទៅចម្អិនសម្រាប់ពួកគេ គឺពួកគេត្រូវចំណាយប្រាក់ជាង ១០០០ ដុល្លារក្នុងមួយចាន។ប៉ុន្តែបើអ្នកស្គាល់ខ្ញុំ អ្នកនឹងទទួលបានការបញ្ចុះតំលៃរ»។
ចុងភៅChef Qបានប្រាប់សារព័ត៌មាន TMZ ថារបបអាហារប្រចាំថ្ងៃរបស់Floydគឺត្រូវតែមានកម្រិតប្រូតេអ៊ីនខ្ពស់គ្មានជាតិស្ករ ជាមួយនឹងសាច់មាន់សាច់គោនិងត្រី ជាដើមលាយជាមួយគ្រឿងផ្សំស្រស់ ហើយមិនត្រូវញ៉ាំអាហារ fast food ជាដាច់ខាត។
សូមបញ្ជាក់ថា កីឡាករប្រដាល់លំដាប់ពិភពលោកទាំងពីរ គឺ Floyd Mayweatherនិង Manny Pacquiao បានយល់ព្រមចុះកិច្ចព្រមព្រៀងក្នុងការប្រកួតដ៏ធំមិនធ្លាប់មាន នៅថ្ងៃទី២ ខែឧសភា ឆ្នាំ២០១៥ ខាងមុខនេះ នៅសង្វៀនMGM Grand Garden Arena ក្នុងទីក្រុង Las Vegas សហរដ្ឋអាមេរិក៕
© រក្សាសិទ្ធិដោយ thmeythmey.com
