កីឡាអន្តរជាតិ
×![]()
កីឡាករ FloydMayweather កំពុងត្រៀមលក្ខណៈគ្រប់បែបយ៉ាង ដើម្បីត្រៀមខ្លួនសម្រាប់ការប្រកួតដ៏ធំក្នុងអាជីពរបស់គេ ដែលរូបគេនឹងត្រូវប្រកូតជាមួយកីឡាករអាស៊ី Manny Pacquiao នៅថ្ងៃទី ២ ខែឧសភា ខាងមុខនេះ។ ក្នុងចំណោមត្រៀមខ្លួនជាច្រើន កីឡាករ Floyd ក៏បានចំណាយប្រាក់ ២៥ ០០០ ដុល្លារ ដើម្បីទិញឧបករណ៍ការពារធ្មេញ សម្រាប់ប្រើក្នុងកម្មវិធីប្រកួតដ៏ធំនោះផងដែរ។
យោងតាម CNBC បានដកស្រង់សំដីគ្រូពេទ្យធ្មេញរបស់ Floyd គឺលោក Lee Gause ថា មកដល់ពេលនេះលោកបានផលិតឧបករណ៍ការពារធ្មេញ សម្រាប់កីឡាករ Floyd Mayweather ដែលឧបករណ៍នេះ ធ្វើឡើងពីត្បូង និងដុំមាស និងធាតុផ្សំរឹងមាំជាច្រើនទៀត ដែលមានតម្លៃគិតជាទឹកប្រាក់ប្រមាណជា ២៥ ០០០ ដុល្លារ។
ស្ថិតក្នុងវ័យ៣៨ ឆ្នាំFloyd Mayweatherគឺជាកីឡាករប្រដាល់សាកលដែលប្រកួតមិនដែលចាញ់ និងជាម្ចាស់ជើងឯកពិភពលោក៥ សម័យ។ ដើម្បីឲ្យសក្ដិសមនឹងកេរ្តិ៍ឈ្មោះនេះ នឹងសមស្របទៅនឹងការប្រកួតប្រចាំសតវត្សផងនោះ លោកទន្តបណ្ឌិតGauseនិងក្រុមការងាររបស់គាត់បាននៅធ្វើការយ៉ាងហ្មត់ចត់ ដើម្បីប្រាកដថា ឧបករណ៍ការពារធ្មេញរបស់ Floydត្រូវបានផលិតឡើងដោយល្អឥតខ្ចោះនិងមានផាសុខភាពទៀតផង។
សំបុត្រចូលទស្សនាព្រឹត្តិការណ៍ប្រកួតនៅថ្ងៃទី ២ ខែឧសភានេះ មានតម្លៃជាមធ្យម ១០ ១២២ដុល្លារនៅក្នុងទីផ្សារលក់បន្តហើយសម្រាប់កៅអីនៅខាងមុខជុំវិញសង្វៀនគឺមានតម្លៃ ៦៧ ០០០ ដុល្លារ។
បើយោងតាមការប៉ាន់ស្មានមួយ Mayweatherអាចទទួលបានប្រាក់ ១២០លានដុល្លារពីការប្រកួតនេះ ដែលវានឹងអាចរក្សាតំណែងរបស់គាត់ជាអត្តពលិកដែលមានតម្លៃខ្លួនខ្ពស់បំផុតនៅក្នុងពិភពលោក។ខណៈពេលដែល Mayweatherបានទទួលបានប្រាក់ជាង ៤០០លានដុល្លារ ពីលើសង្វៀនប្រដាល់ ចាប់តាំងពី១៩៩៦ មក៕
© រក្សាសិទ្ធិដោយ thmeythmey.com
