អង្គការឧតុនិយមពិភពលោក (WMO) ដែលស្ថិតក្រោមអង្គការសហប្រជាជាតិនៅថ្ងៃទី២៣​ ខែមេសា បានចេញផ្សាយរបាយការណ៍ស្តីពីស្ថានភាពអាកាសធាតុអាស៊ីឆ្នាំ២០២៣ ដោយនិយាយថា អាស៊ីជាតំបន់ដែលបានទទួលរងនូវគ្រោះមហន្តរាយធម្មជាតិច្រើនបំផុតដោយសារតែការប្រែប្រួលអាកាសធាតុកាលពីឆ្នាំមុន ស្របពេលប្រទេសជាច្រើនជួបប្រទះនូវបាតុភូតប្រែប្រួលអាកាសធាតុជាបន្តបន្ទាប់ដូចជា គ្រោះរាំងស្ងួត រលកកំដៅ រហូតដល់ព្យុះ និងទឹកជំនន់ជាដើម។

 

ទឹកជំនន់ ជាមូលហេតុចម្បងបង្កឲ្យមានការស្លាប់មនុស្សច្រើននៅក្នុងតំបន់នេះប្រចាំឆ្នាំ ២០២៣។ ទ្វីបនេះបានទទួលរងនូវគ្រោះធម្មជាតិទាក់ទងនឹងទឹកសរុបចំនួន ៧៩ដងក្នុងនោះ ៨០ភាគរយជាព្យុះ និងទឹកជំនន់បណ្តាលឱ្យមនុស្សជាង ២០០០នាក់បានបាត់បង់ជីវិត និង៩លាននាក់រងផលប៉ះពាល់។
 

«ការប្រែប្រួលអាកាសធាតុកំពុងកើតមានជាញឹកញាប់ និងភាពធ្ងន់ធ្ងរនៃគ្រោះមហន្តរាយធម្មជាតិ ជាមួយនឹងផលប៉ះពាល់សេដ្ឋកិច្ច សង្គម និងបរិស្ថានសំខាន់ៗនៅអាស៊ី»។ លោក Celeste Saulo ប្រធាន WMO បានថ្លែង​បែបនេះដោយបានគូសបញ្ជាក់ពីលទ្ធផលនៃរបាយការណ៍នេះថាជាការដាស់តឿនទៅកាន់តំបន់នេះ។

 

របាយការណ៍ខាងលើបានបន្ថែមថា អាស៊ីកំពុងឡើងកំដៅក្នុងអត្រាលឿនជាងមធ្យមភាគពិភពលោក ខណៈដែលសីតុណ្ហភាពពិភពលោកឈានដល់កម្រិតខ្ពស់បំផុតនៅឆ្នាំ ២០២៣។ សីតុណ្ហភាពជាមធ្យមានកម្រិតខ្ពស់ ជាពិសេសពីភាគខាងលិចស៊ីបេរីទៅអាស៊ីកណ្តាល និងពីភាគខាងកើតចិនដល់ជប៉ុន ដោយជប៉ុនជួបប្រទះក្តៅខ្លាំងនៅរដូវក្តៅ។

 

ស្ថានភាពនេះបណ្តាលឱ្យផ្ទាំងទឹកកករលាយ និងកម្រិតទឹកសមុទ្រកើនឡើងដែលគំរាមកំហែងដល់សន្តិសុខទឹកនៅក្នុងតំបន់។ ភ្នំខ្ពស់របស់អាស៊ីប្រមូលផ្តុំនៅតំបន់ខ្ពង់រាបទីបេ ដែលផ្ទុកបរិមាណព្រិល និងទឹកកកច្រើនជាងគេនៅខាងក្រៅតំបន់ប៉ូលទាំងពីរ។ ផ្ទាំងទឹកកកចំនួន២០ផ្ទាំង ក្នុងចំណោមផ្ទាំងទឹកកកដែលបានត្រួតពិនិត្យចំនួន២២ នៅអាស៊ីបន្តរលាយក្នុងអត្រាខ្ពស់។

 

អង្គការឧតុនិយមពិភពលោក បានបញ្ជាក់ថា ទីភ្នាក់ងារឧតុនិយមនៅអាស៊ីចាំបាច់ត្រូវកែលម្អលំហូរនៃព័ត៌មានដែលផ្តល់ទៅឱ្យអង្គការសហប្រជាជាតិយ៉ាងឆាប់រហ័ស ដើម្បីស្វែងរកវិធីកាត់បន្ថយហានិភ័យគ្រោះមហន្តរាយធម្មជាតិ។

 

«សកម្មភាព និងយុទ្ធសាស្ត្រឆ្លើយតបរបស់យើងត្រូវការឆ្លុះបញ្ចាំងពីភាពបន្ទាន់នៃពេលនេះ។ ការកាត់បន្ថយការបំភាយឧស្ម័នផ្ទះកញ្ចក់ និងការសម្របខ្លួនទៅនឹងបម្រែបម្រួលអាកាសធាតុ មិនមែនជាជម្រើសទៀតទេ ប៉ុន្តែជារឿងសំខាន់ដែលត្រូវធ្វើ»។ ប្រធាន WMO លោក Saulo បានបញ្ជាក់បែបនេះ ។ នេះបើតាមទីភ្នាក់សារព័ត៌មានបារាំង AFP៕