ការថយចុះព័ត៌មានរសើបនេះ លោកស្រី សុគន្ធា បានពន្យល់ថា អ្នកដែលតែងតែចែកចាយព័ត៌មានរសើប តែងជួបបញ្ហា ដូចជាជាប់បណ្ដឹងពីសមត្ថកិច្ច និងភាគីពាក់ព័ន្ធ ដែលវាជាហេតុផលចម្បងនាំឱ្យអ្នកសារព័ត៌មាន ពុំសូវចូលចិត្តរាយការណ៍រឿងបញ្ហាដីធ្លី សិទ្ធិមនុស្ស បញ្ហាសង្គម និងនយោបាយជាដើម។ សេរីភាពសារព័ត៌មាន និងសេរីភាពបញ្ចេញមតិ សម្រាប់លោកស្រី គឺមិនអាចញែកដាច់ពីគ្នាបានទេ។ ចំពោះសិទ្ធិបញ្ចេញមតិ មានចែងក្នុងក្រមខណ្ឌច្បាប់ជាតិ និងអន្តរជាតិ។ ដូច្នេះ លោកស្រី សង្កត់ធ្ងន់ថា៖ «អ្នកសារព័ត៌មាន ដែលផលិតអត្ថបទ និងរឿងរ៉ាវ តាមវិជ្ជាជីវៈ ដោយមានអង្គហេតុ និងប្រភពត្រឹមត្រូវ ត្រូវមានច្បាប់ការពារពួកគេវិញផងដែរ»។ 

 

រីឯ លោក ហ៊ុយ វណ្ណៈ ជាប្រធានដឹកនាំសហភាពសហព័ន្ធអ្នកសារព័ត៌មានកម្ពុជាវិញ យល់ថា សេរីភាពសារព័ត៌មាន មានភាពល្អប្រសើរ។ ប៉ុន្តែអ្វីដែលជាចំណុចខ្សោយ លោកសង្កត់ធ្ងន់លើច្បាប់ស្ដីពីរបរសារព័ត៌មាន ដែលមានតាំងពីឆ្នាំ១៩៩៥។ «ច្បាប់នេះ ពុំអាចឆ្លើយតប និងធ្វើជាមូលដ្ឋាន នឹងទិដ្ឋភាពនៃការវិវឌ្ឍនសង្គមនាពេលបច្ចុប្បន្នឡើយ។ បច្ចុប្បន្ន កម្ពុជានៅខ្វះ ក្រមសីលធម៌វិជ្ជាជីវៈអ្នកសារព័ត៌មាន សម្រាប់ចែងឱ្យជាក់លាក់ ខណៈអ្នកសារព័ត៌មានខ្លះបានគោរព ខ្លះពុំបានគោរព»។ នេះជាការមើលឃើញរបស់ លោក ហ៊ុយ វណ្ណៈ៕ 

លោក ហ៊ុយ វណ្ណៈ ជាប្រធានដឹកនាំសហភាពសហព័ន្ធអ្នកសារព័ត៌មានកម្ពុជា។ រូបពី ហ្វេសប៊ុក លោក វណ្ណៈ