ក្នុងការប៉ុនប៉ងធ្វើរដ្ឋប្រហារ រថពាសដែកយោធា និងកងទ័ព បានសម្រុកចូលវិមានរដ្ឋាភិបាលនៅល្ងាចថ្ងៃទី២៦ ខែមិថុនា។ ប៉ុន្តែលោកប្រធានាធិបតី Luis Arce ក៏បញ្ជាឱ្យកងទ័ពដកថយវិញភ្លាម ដែលបញ្ជានេះត្រូវបានអនុវត្តដោយគ្មានការបង្ហូរឈាមឡើយ។

 

ស្របពេលការប៉ុនប៉ងដណ្ដើមអំណាចកំពុងមាននៅឡើយ លោក Arce ក៏បានដកតំណែងមេបញ្ជាការកងទ័ពពីលោកឧត្តមសេនីយ៍ Juan José Zúñiga ដែលជាមេដឹកនាំរដ្ឋប្រហារ និងមេទ័ពជើងទឹក Juan Arnez Salvador ។ អ្នកទាំង២ ត្រូវបានចាប់ខ្លួននៅពេលបន្ទាប់ដែរ។

 

រដ្ឋមន្ត្រីបូលីវី​ Eduardo del Castillo ប្រាប់អ្នកសារព័ត៌មានថា លោក Zúñiga ចង់ដណ្ដើមអំណាច ដោយផ្ដួលរំលំរដ្ឋាភិបាលកើតចេញពីការបោះឆ្នោត។

 

មុនការចាប់ខ្លួន អតីតប្រមុខកងទ័ពបូលីវីអះអាងថា លោក Arce ជាអ្នកបញ្ជាឱ្យយោធាធ្វើបែបនេះ ដើម្បីទ្រទ្រង់សភាពការណ៍ក្នុងប្រទេស។ ប៉ុន្តែរដ្ឋមន្ត្រីយុត្តិធម៌បូលីវី Iván Lima និយាយថា លោក Zúñiga កំពុងកុហក។ នេះបើតាមទីភ្នាក់ងារព័ត៌មាន AP ។

 

បូលីវី ស្ថិតក្នុងស្ថានភាពមិនល្អប្រសើរជាច្រើនខែមកហើយដោយសារវិបត្តិសេដ្ឋកិច្ចក្នុងប្រទេស និងទំនាស់ក្នុងបក្សកាន់អំណាច៕