សង្គមអន្តរជាតិ
អន្តរជាតិ
ដានជើងដាយណូស័រអាយុប្រហែល១២០លានឆ្នាំ ត្រូវបានប្រទះឃើញនៅចិន ![រូបភាព ៖ Xinhua](https://image.thmeythmey.com/pictures/2024/05/28/28520241711a.jpg)
រូបភាព ៖ Xinhua
×![]()
ហ្វូស៊ីលដានជើងដាយណូស័រពីសម័យ Cretaceous ដែលមានអាយុប្រហែល១២០លានឆ្នាំមុន ត្រូវបានរកឃើញថ្មីៗនេះនៅលើភ្នំមួយនៅទីក្រុង Lufeng ខេត្តយូណានរបស់ចិន។
តាមអ្នកជំនាញមកពីមជ្ឈមណ្ឌលស្រាវជ្រាវ និងអភិរក្សហ្វូស៊ីលដាយណូស័រទីក្រុង Lufeng ចំនួនដានជើងហ្វូស៊ីលដាយណូស័រដែលបានរកឃើញលើកនេះគឺមានទំហំធំ និងច្រើនប្រភេទចម្រុះមានចំនួនជាង ៤០០ហ្វូស៊ីលដានជើង។ ការប្រៀបធៀបទីតាំងសម្គាល់បានបង្ហាញថា ប្លុកថ្មដែលស្នាមជើងដាយណូស័រនោះមានអាយុប្រហែល ១២០លានឆ្នាំ។
តាមការចុះផ្សាយរបស់ទីភ្នាក់ងារសារព័ត៌មានរដ្ឋចិន Xinhua ដោយបានដកស្រង់សម្តីពីនាយកមជ្ឈមណ្ឌលស្រាវជ្រាវ និងអភិរក្សហ្វូស៊ីលដាយណូស័រទីក្រុង Lufeng លោក Wang Tao ហ្វូស៊ីលដានជើងដាយណូស័រដែលត្រូវបានរកឃើញនេះត្រូវបានបែងចែកជា ៣ប្រភេទ ហើយទីប្រជុំជនភ្នំ Konglongshan នៃទីក្រុង Lufeng ខេត្តយូណាន ជាកន្លែងដែលមានហ្វូស៊ីលដានជើងដាយណូស័រជាច្រើនបានប្រមូលផ្តុំនៅទីនោះ។
![](https://image.thmeythmey.com/pictures/2024/05/28/b.png)
យ៉ាងណាមិញ ការរកឃើញដានជើងដាយណូស័រធំៗ និងច្រើនប្រភេទនាពេលនេះ គឺជាលើកទីមួយដែលបង្ហាញថា ប្រហែលជាមានប្រភេទសត្វដាយណូស័រច្រើនរស់នៅក្នុងតំបន់ Lufeng។
តាមការស្រាវជ្រាវរបស់លោក Wang Tao តំបន់នេះប្រហែលពីមុនជាទីតាំងមាត់បឹងដែលហ៊ុំព័ទ្ធដោយដើមឈើក្រាស់។ នៅពេលដែលដាយណូស័ចុះមកផឹកទឹក ពួកវាបានបន្សល់ទុកស្នាមជើងនៅក្នុងភក់។
ចាប់តាំងពីឆ្នាំ១៩៣៨ ហ្វូស៊ីលដាយណូស័រជាង១២០ ត្រូវបានរកឃើញនៅក្នុងតំបន់ Lufeng។ របកគំហើញនេះមានសារសំខាន់ក្នុងការបង្ហាញថាក្នុងអំឡុងសម័យ Cretaceous នៅតែមានចំនួនដាយណូស័រធំៗ និងចម្រុះប្រភេទដែលរស់នៅក្នុងតំបន់ Lefung។ បច្ចុប្បន្ន ការស្រាវជ្រាវពាក់ព័ន្ធហ្វូស៊ីលដាយណូស័រនៅទីនេះកំពុងតែបន្ត៕
Tag:
ចិន
ដាយណូស័រ
ហ្វូស៊ីល
© រក្សាសិទ្ធិដោយ thmeythmey.com