RFI
អន្តរជាតិ
សកម្មជនប្រជាធិបតេយ្យហុងកុង១៤នាក់ជាប់ទោសពីបទវិទ្ធង្សនា ![សកម្មជនប្រជាធិបតេយ្យហុងកុង១៤នាក់ជាប់ទោសពីបទវិទ្ធង្សនា © RFI 驻香港特约记者麥燕庭提供](https://image.thmeythmey.com/pictures/2024/05/31/download.jpg)
សកម្មជនប្រជាធិបតេយ្យហុងកុង១៤នាក់ជាប់ទោសពីបទវិទ្ធង្សនា © RFI 驻香港特约记者麥燕庭提供
×![]()
ដោយ៖អៀង សុខម៉ិញ/RFI ខេមរភាសា
តាំងពីច្បាប់សន្តិសុខជាតិតាក់តែងដោយប៉េកាំងបានចូលជាធរមាននៅហុងកុងមក នេះជាការបើកសវនាការដ៏ធំបំផុតដំបូង ប្រឆាំងសកម្មជនប្រជាធិបតេយ្យ។ នៅថ្ងៃទី៣០ ឧសភា២០២៤ តុលាការហុងកុងបានប្រកាសកាត់ទោសសកម្មជនបក្សប្រឆាំងប្រជាធិបតេយ្យ១៤រូប ពីបទមានកំហុសប្រព្រឹត្តអំពើវិទ្ធង្សនា។
នៅក្នុងសវនការដ៏ធំបំផុតប្រឆាំងនឹងសកម្មជនប្រជាធិបតេយ្យ៤៧រូប គិតចាប់តាំងពីច្បាប់សន្តិសុខហុងកុងចូលជាធរមាននៅពាក់កណ្តាលឆ្នាំ២០២០មក តុលាការបានសម្រេចជំនុំជម្រះសេចក្តីលើករណីជនជាប់ចោទ១៦រូបដែលបដិសេធមិនទទួលស្គាល់ការចោទប្រកាន់។ ក្នុងចំណោមនោះ មានតែពីរនាក់ប៉ុណ្ណោះដែលត្រូវបានរួចខ្លួន ដោយតុលាការសម្រេចថាពិតជាគ្មានទោសមែន។ សកម្មជនប្រជាធិបតេយ្យ១៤នាក់ មានជាអាទិ៍អតីតសមាជិកសភា លោកឡុងហែរ លោកលឿង កុកហ៊ុង លោក រ៉ៃចាន់ និងអតីតអ្នកកាសែតម្នាក់ផង ត្រូវបានចៅក្រមប្រកាសថាមានទោសពីបទធ្វើវិទ្ធង្សនា។ សកម្មជនជាប់ចោទទាំងនោះ ប៉ុនប៉ងបង្កឱ្យមានវិបត្តិធម្មនុញ្ញនៅហុងកុង។ នេះបើតាមចៅក្រមនៃតុលាការជាន់ខ្ពស់ហុងកុង។ ប៉ុន្តែទម្ងន់ទោសនឹងត្រូវសម្រេចនៅពេលក្រោយ ក្នុងឆ្នាំនេះ។
នៅក្នុងច្បាប់សន្តិសុខហុងកុង ទោសធ្វើវិទ្ធង្សនា អាចនឹងនាំជនជាប់ចោទឱ្យជាប់ឃុំឃាំងអស់មួយជីវិត។
រងការចោទប្រកាន់ជាផ្លូវការតាំងពីឆ្នាំ២០២១ សកម្មជនប្រជាធិបតេយ្យហុងកុងទាំង៤៧រូប ដែលភាគច្រើនបានជាប់ឃុំស្រេចទៅហើយនោះ សុទ្ធសឹងជាអ្នកនយោបាយនៃបក្សប្រឆាំង និងត្រូវជាប់ចោទពីបទផ្សំគំនិតរៀបចំផែនការធ្វើវិទ្ធង្សនា ដើម្បីផ្តួលរដ្ឋាភិបាល តាមរយៈសកម្មភាពរៀបចំការបោះឆ្នោតក្រៅផ្លូវការជ្រើសរើសបេក្ខជនបក្សប្រឆាំងសម្រាប់ទៅចូលរួមបោះឆ្នោតសភា។ បក្សប្រឆាំងមានកម្មវត្ថុដណ្តើមយកសំឡេងភាគច្រើនឱ្យបាន ទើបអាចប្រើសិទ្ធិវេតូប្រឆាំងនៅពេលសម្រចគម្រោងថវិកានិងអាចបង្ខំប្រមុខដឹកនាំហុងកុងស្និទ្ធនឹងប៉េកាំងកាលណោះ គឺលោកស្រីការីឡាំ ឱ្យចុះចេញពីតំណែងបាន។ សម្រាប់ក្រុមប្រជាធិបតេយ្យ នេះជាយន្តការនយោបាយសុទ្ធសាធ មិនមែនជាបញ្ហាខុសច្បាប់ទេ។
សំណុំរឿងក្តីនេះបានទទួលការតាមដានយ៉ាងស្អិតពីសំណាក់សហគមន៍អន្តរជាតិ ដោយឃើញមានតំណាងការទូតបារាំង អ៊ីតាលី និងប្រទេសក្នុងសហភាពអឺរ៉ុបជាច្រើនទៅចូលរួមស្តាប់។
សហរដ្ឋអាមេរិក ព្រមទាំងប្រទេសលោកខាងលិចបានរិះគន់ប៉េកាំងថាមិនគោរព សេរីភាពរបស់ហុងកុងដូចពាក្យសន្យាពេលទទួលយកហុងកុងពីអង់គ្លេសវិញ។
ក្រៅពីសវនាការដ៏ចម្រូងចម្រាសគ្មានវត្តមានគណៈវិនិច្ឆ័យដូចទម្លាប់ អាជ្ញាធរហុងកុងបានចាប់ខ្លួនមនុស្ស៧នាក់ផ្សេងទៀត ពីបទបង្ហោះសារតាមបណ្តាញសង្គមបែបញុះញង់ឱ្យមានការបះបោរ។ នេះក៏ជាករណីចាប់ខ្លួនដំបូងពាក់ព័ន្ធនឹងច្បាប់សន្តិសុខជាតិថ្មី ទើបចូលធរមានកាលពីខែមីនា ដែលគ្រោងដាក់ពន្ធនាគារអស់មួយជីវិតចំពោះបទឧក្រិដ្ឋ ៥ប្រភេទ គឺក្បត់ជាតិ បះបោរ ចារកិច្ច ការបំផ្លាញនិងជ្រៀតជ្រែតពីក្រៅ៕
© រក្សាសិទ្ធិដោយ thmeythmey.com