ជាតិ
ព្រឹទ្ធាចារ្យ វ៉ង់ ជុន អតីតនិស្សិតសាលាជាតិផ្នែកល្ខោនជំនាន់ទី១ទទួលមរណភាពក្នុងអាយុ៨៥ឆ្នាំ
×![]()
ដោយ: សារព័ត៌មានថ្មីៗ
ព្រឹទ្ធាចារ្យ វ៉ង់ ជុន វរសិល្បករផ្នែកល្ខោន បានទទួលមរណភាពកាលពីព្រឹកថ្ងៃទី២ ខែមិថុនា ក្នុងអាយុ៨៥ឆ្នាំ។ នេះបើតាមការបញ្ជាក់ក្នុងទំព័រហ្វេសប៊ុកមហាវិទ្យាល័យសិល្បៈ នាដសាស្ត្រ នៃសាកលវិទ្យាល័យភូមិន្ទវិចិត្រសិល្បៈ។
កើតនៅស្រុកសំរោងទង ខេត្តកំពង់ស្ពឺ លោក វ៉ង់ ជុន ជាអតីតនិស្សិតសាលាជាតិផ្នែកល្ខោនជំនាន់ទីមួយ ចាប់ពីឆ្នាំ១៩៥៥ ដល់ឆ្នាំ១៩៦២។ ក្រោយទទួលបានសញ្ញាបត្រសិល្បៈនាដកម្ម លោកបានក្លាយជានាដករ។ បន្ថែមពីលើនេះ ពីឆ្នាំ១៩៦៣ ដល់១៩៦៥ លោកក៏ជាអ្នកទទួលបន្ទុកបច្ចេកទេសភ្លើង បំពងសំឡេង តុបតែងឆាក និងផ្នែកសម្លៀកបំពាក់ផងដែរ។
កើតចេញពីគ្រួសារដែលមានឪពុកជាអាចារ្យនៅវត្តមហាមន្ត្រី លោក វ៉ង់ ជុន ដែលឆ្លងកាត់ការសិក្សានៅវត្ត ហើយបានចូលប្រឡងចូលសាលាល្ខោន។ ក្នុងបទសម្ភាសជាមួយលោក ញាណ សុជាតិ ដែលត្រូវបានផ្សាយនៅទំព័រហ្វេសប៊ុកផ្លូវការ របស់សាកវិទ្យាល័យភូមិន្ទវិចិត្រសិល្បៈ កាលពីឆ្នាំ២០២០ ព្រឹទ្ធាចារ្យ វ៉ង់ ជុន លើកឡើងថា ឆាក ជាសមរភូមិដ៏ក្តៅគគុករបស់សិល្បករ ដែលអាចបង្ហាញនូវសច្ចធម៌។
លើសពីការសម្តែងលើឆាក ព្រឹទ្ធាចារ្យ វ៉ង់ ជុន បានប្រៀបប្រដូចខ្លួនដូចជាចុងភៅផ្នែកល្ខោន ដោយសារព្រឹទ្ធាចារ្យមានជំនាញផ្នែកតុបតែង និងបច្ចេកទេសភ្លើង ក្រោយឆ្លងកាត់ការសិក្សាពីវិស្វករបរទេស កាលពីសម័យសង្គមរាស្ត្រនិយម។
ពីឆ្នាំ១៩៥៩ ដល់ឆ្នាំ១៩៦៣ លោកជាអ្នកទទួលខុសត្រូវនៅមហោស្រពចតុមុខ ដោយធ្វើជាអ្នកដំឡើងភ្លើងលើឆាក ដំឡើងមេក្រូ រហូតដល់ក្លាយជាអ្នកគ្រប់គ្រងឆាក។ ពីឆ្នាំ១៩៧០ ដល់ឆ្នាំ១៩៧៩ លោកបានក្លាយជាសាស្ត្រាចារ្យ និងជាអ្នកគ្រប់គ្រងរោងល្ខោនរដ្ឋ។
ព្រឹទ្ធាចារ្យ វ៉ង់ ជុន គឺជាព្រឹទ្ធាចារ្យសិល្បៈមួយរូប ដែលបានរួមចំណែកស្រោចស្រង់វិស័យសិល្បៈ ជាពិសេសផ្នែកល្ខោនឱ្យរស់រានមានជីវិតឡើងវិញ ក្រោយរបបខ្មែរក្រហម។ ព្រឹទ្ធាចារ្យបានបន្តផ្ទេរចំណេះដឹងរបស់ខ្លួន ដល់យុវជនជំនាន់ក្រោយ នៅសាកលវិទ្យាល័យភូមិន្ទ វិចិត្រសិល្បៈ រហូតដល់ចូលនិវត្តន៍។
ជាអតីតនិស្សសាលាជាតិផ្នែកល្ខោនជំនាន់ទីមួយ លោក វ៉ង់ ជុន ឆ្លងកាត់ការសិក្សាពីសាស្ត្រាចារ្យល្ខោនល្បីៗ កាលពីសម័យសង្គមរាស្ត្រនិយម រួមមាន លោក ហង្ស ធន់ហាក់, លោក ពៅ យូឡេង ជាដើម។ តាមការចងចាំរបស់លោក ស្ថាបនិកល្ខោននិយាយ កាលពីឆ្នាំ១៩៥៤ រួមមាន ព្រឹទ្ធាចារ្យ ហង្ស ធន់ហាក់, ព្រឹទ្ធាចារ្យ នួន កន, ព្រឹទ្ធាចារ្យ ឆេង ផុន, ព្រឹទ្ធាចារ្យ លី គឹមអ៊ួង, ព្រឹទ្ធាចារ្យ ហង់ ជួន, ព្រឹទ្ធាចារ្យ ហ៊ីង ប៊ុនថុន, ព្រឹទ្ធាចារ្យ មាស គក, ព្រឹទ្ធាចារ្យ ផឹក សំផេន, ព្រឹទ្ធាចារ្យ ប៉ុល សំអឿន, ព្រឹទ្ធាចារ្យ អ៊ុំ ឈឺន, ព្រឹទ្ធាចារ្យ ពៅ យូឡេង, ព្រឹទ្ធាចារ្យ អ៊ុំ ស៊ឹម, ព្រឹទ្ធាចារ្យ យិល ចាន់ធូ, ព្រឹទ្ធាចារ្យ អ៊ុំ ដរ៉ា, ព្រឹទ្ធាចារ្យ យក់ គុណ។
តាមឃ្លីបវីដេអូ នៃបទសម្ភាសកាលពីឆ្នាំ២០២០ ដដែល ព្រឹទ្ធាចារ្យ វ៉ង់ ជុន បានលើកឡើងពីទីតាំងរោងល្ខោនបាសាក់ដ៏សម្បូរបែប ក្នុងរាជធានីភ្នំពេញ នៅមុនរបបខ្មែរក្រហម ដោយមាននៅគីឡូលេខ៦, រោងថ្មមុខវត្តលង្កា, រោងឈើនៅផ្សារកាប់គោ, ផ្សារស៊ីឡឹប, ផ្សារដើមគ, រោងគឹម សឺន ក្រោយសាលានរោត្តម ជាដើម។
«មរណភាពរបស់លោកសាស្ត្រាចារ្យ គឺជាការបាត់បង់ធនធានមនុស្សផ្នែកសិល្បៈវប្បធម៌ ដែលគួរឱ្យសោកស្តាយបំផុត»។ នេះជាការលើកឡើងរបស់បណ្ឌិត ហេង សុផាឌី សាកលវិទ្យាធិការនៃសាកលវិទ្យាល័យភូមិន្ទវិចិត្រសិល្បៈ ក្នុងលិខិតរំលែកទុក្ខជូន លោកស្រី ម៉ី ស៊ីវន ដែលជាភរិយាសាស្ត្រាចារ្យ វ៉ង់ ជុន។
សពរបស់ព្រឹទ្ធាចារ្យ ត្រូវតម្កល់ធ្វើបុណ្យនៅផ្ទះលេខ១៦C បុរីប៉េហួតភូមិន្ទ ផ្លូវ៥៩៨ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ៕
Tag:
សិល្បៈ
© រក្សាសិទ្ធិដោយ thmeythmey.com
