ជាតិ
កម្ពុជា-ហ្វាំងឡង់ បន្តពង្រីកកិច្ចសហប្រតិបត្តិការលើវិស័យអប់រំ សុខាភិបាល ពាណិជ្ជកម្ម និងបរិស្ថាន ![លោក Jyri Järviaho ឯកអគ្គរដ្ឋទូតហ្វាំងឡង់ប្រចាំកម្ពុជា(ឆ្វេង) នាជំនួបសម្តែងការគួរសម និងជម្រាបលា ជាមួយសម្តេច ហ៊ុន ម៉ាណែត នាយករដ្ឋមន្ត្រីកម្ពុជា(ស្តាំ)នៅថ្ងៃទី៤ មិថុនា។ (រូបភាព៖ ទំព័រហ្វេសប៊ុកសម្តេច ហ៊ុន ម៉ាណែត)](https://image.thmeythmey.com/pictures/2024/06/04/4620241527c__1_.jpg)
លោក Jyri Järviaho ឯកអគ្គរដ្ឋទូតហ្វាំងឡង់ប្រចាំកម្ពុជា(ឆ្វេង) នាជំនួបសម្តែងការគួរសម និងជម្រាបលា ជាមួយសម្តេច ហ៊ុន ម៉ាណែត នាយករដ្ឋមន្ត្រីកម្ពុជា(ស្តាំ)នៅថ្ងៃទី៤ មិថុនា។ (រូបភាព៖ ទំព័រហ្វេសប៊ុកសម្តេច ហ៊ុន ម៉ាណែត)
×![]()
រដ្ឋាភិបាលហ្វាំងឡង់ នៅតែបន្តពង្រឹង និងពង្រីកកិច្ចសហប្រតិបតិ្តការជាមួយកម្ពុជា លើវិស័យសំខាន់ៗ មានជាអាទិ៍វិស័យអប់រំ, សុខាភិបាល, ពាណិជ្ជកម្ម, បរិស្ថាន និងការបណ្តុះបណ្តាលវិជ្ជាជីវៈ។ សេចក្តីអះអាងនេះ ធ្វើឡើងនៅក្នុងជំនួបសម្តែង ការគួរសម និងជម្រាបលា របស់ លោក Jyri Järviaho ឯកអគ្គរដ្ឋទូតហ្វាំងឡង់ប្រចាំកម្ពុជា ដែលមាននិវេសនដ្ឋាននៅទីក្រុងបាងកក ជាមួយសម្តេច ហ៊ុន ម៉ាណែត នាយករដ្ឋមន្រ្តីកម្ពុជា នៅថ្ងៃទី៤ មិថុនានេះ។
ផ្តើមជំនួបនេះ លោក Jyri Järviaho បានសាទរចំពោះសម្ដេច ហ៊ុន ម៉ាណែត ដែលត្រូវ បានជ្រើសតាំងជានាយករដ្ឋមន្រ្តីនៃកម្ពុជា ហើយក៏សម្តែងមរណទុក្ខចំពោះការសោយព្រះទិវង្គតរបស់ សម្តេច ទេព វង្ស សម្តេចព្រះមហាសង្ឃរាជកម្ពុជា។
បន្តពីនេះ លោក Jyri Järviaho ឯកអគ្គរដ្ឋទូតហ្វាំងឡង់ប្រចាំកម្ពុជា បានបញ្ជាក់ពីការ បន្តពង្រឹង និងពង្រីកកិច្ចសហប្រតិបតិ្តការរបស់ហ្វាំងឡើងជាមួយកម្ពុជា លើវិស័យអប់រំ សុខាភិបាល ពាណិជ្ជកម្ម បរិស្ថាន និងការបណ្តុះបណ្តាលវិជ្ជាជីវៈ។ ក្នុងអាណត្តិការទូតរយៈពេល៤ឆ្នាំនៅកម្ពុជា លោក Jyri Järviaho ក៏បានចូលរួមចំណែកក្នុងការពង្រឹង និងពង្រីកកិច្ចសហប្រតិបត្តិការ និងការគាំទ្រដល់ការអភិវឌ្ឍសង្គម-សេដ្ឋកិច្ចនៅកម្ពុជា លើការងារបោសសំអាតមីន, ការគ្រប់គ្រង និងចុះបញ្ជីដីធ្លី, ការគាំទ្រដល់អង្គជំនុំជម្រះវិសាមញ្ញក្នុងតុលាការកម្ពុជាជាដើម។
លោក Jyri Järviaho ឯកអគ្គរដ្ឋទូតហ្វាំងឡង់ប្រចាំកម្ពុជា(ឆ្វេង) នាជំនួបសម្តែងការគួរសម និងជម្រាបលា ជាមួយសម្តេច ហ៊ុន ម៉ាណែត នាយករដ្ឋមន្ត្រីកម្ពុជា(ស្តាំ)នៅថ្ងៃទី៤ មិថុនា។ រូបភាព៖ ទំព័រហ្វេសប៊ុកសម្តេច ហ៊ុន ម៉ាណែត
ជាការឆ្លើយតប សម្តេច ធិបតី បានវាយតម្លៃខ្ពស់ ចំពោះការចូលរួមចំណែកយ៉ាងសកម្ម របស់លោក Jyri Järviaho ក្នុងការពង្រឹង និងពង្រីកទំនាក់ទំនងការទូត និងកិច្ចសហប្រតិបត្តិការលើវិស័យជាច្រើន ជាពិសេសវិស័យអប់រំ។ ប្រមុខរាជរដ្ឋាភិបាល បានគូសបញ្ជាក់ថា «រាជរដ្ឋាភិបាលនីតិកាលទី៧ នៃរដ្ឋសភា នឹងបន្តអនុវត្តគោលនយោបាយលើកកម្ពស់វិស័យអប់រំ តាមរយៈការផ្តល់អាទិភាពលើការកសាងមូលធន មនុស្សប្រកបដោយសមត្ថភាព និងសុខភាព ដើម្បីអភិវឌ្ឍសង្គម-សេដ្ឋកិច្ចឱ្យកាន់តែរីកចម្រើន និងរឹងមាំ បន្ថែមទៀត»។ នេះជាបញ្ជាក់របស់សម្តេច ហ៊ុន ម៉ាណែត មុននឹងបន្តថាកម្ពុជា ក៏បាន ដាក់ចេញគោលនយោបាយជាអាទិភាព ក្នុងការអភិវឌ្ឍជំនាញវិជ្ជាជីវៈ និងបច្ចេកទេស ដើម្បីឆ្លើយតបទៅនឹងតម្រូវការទីផ្សារការងារប្រកបដោយភាពបត់បែន និងតាមតម្រូវការជាក់ស្តែង ព្រមទាំងពង្រឹងសមត្ថភាពបន្ថែម ដោយការរៀបចំជំនាញឡើងវិញ និងការបង្កើនជំនាញ។
ប្រមុខរាជរដ្ឋាភិបាលកម្ពុជា បន្តស្វាគមន៍ និងលើកទឹកចិត្ត រដ្ឋាភិបាល ហ្វាំងឡង់ ក្នុងការពង្រឹង និងពង្រីកបន្ថែមទៀត កិច្ចសហប្រតិបត្តិការលើវិស័យអប់រំ សុខាភិបាល ពាណិជ្ជកម្ម និងបរិស្ថានជាមួយក្រសួង-ស្ថាប័នពាក់ព័ន្ធរបស់កម្ពុជា៕
Tag:
អប់រំ
ការទូត
បរិស្ថាន
© រក្សាសិទ្ធិដោយ thmeythmey.com