ជាតិ
អាជ្ញាធរ ផ្លាស់ប្តូរប្រព័ន្ធចរាចរនៅតំបន់ជុំវិញរង្វង់មូលកួចកាណុង ដើម្បីបញ្ចៀសការស្ទះចរាចរណ៍ ![](https://image.thmeythmey.com/pictures/2024/06/07/7620241013a.jpg)
×![]()
រដ្ឋបាលរាជធានីភ្នំពេញ បានសម្រេច កែសម្រួលប្រព័ន្ធចរាចរនៅតំបន់ជុំវិញចំណុចរង្វង់មូលកួចកាណុង ដើម្បីកាត់បន្ថយការកកស្ទះចរាចរណ៍នៅតំបន់នេះ។
រដ្ឋបាលរាជធានីភ្នំពេញ បានកត់សម្គាល់ឃើញថា នៅចំណុចរង្វង់មូលកួចកាណុង មានការកកស្ទះជារៀងរាល់ថ្ងៃ ជាពិសេសនៅពេលព្រឹកចន្លោះពីម៉ោង ៧ ដល់ម៉ោង ៨កន្លះ និងពេលល្ងាច ពីម៉ោង ៤ កន្លះនាទី ដល់ម៉ោង ៧យប់ ដែលជាហេតុធ្វើឱ្យប៉ះពាល់ដល់ការធ្វើដំណើរ និងសណ្តាប់ធ្នាប់សាធារណៈ។ រដ្ឋបាលរាជធានីភ្នំពេញ បញ្ជាក់ដូច្នេះ នៅក្នុងសេចក្តីជូនដំណឹងរបស់រដ្ឋបាល ចុះថ្ងៃទី៦ ខែមិថុនា។
ដើម្បីសម្រួលដល់ការធ្វើដំណើររបស់ប្រជាពលរដ្ឋ និងសមស្របតាមបទដ្ឋានបច្ចេកទេស រដ្ឋបាលរាជធានីភ្នំពេញ បានរៀបចំកែសម្រួលប្រព័ន្ធចរាចរនៅតំបន់ជុំវិញចំណុចរង្វង់មូលកួចកាណុង ដោយ ដំឡើងភ្លើងសញ្ញាចរាចរ នៅចំណុចប្រសព្វរវាងផ្លូវលេខ៧០ និងមហាវិថីព្រះមុនីវង្ស។
អាជ្ញាធរ នឹងដាក់ខឿនបែងចែកទ្រូងផ្លូវលើមហាវិថីព្រះមុនីវង្សចាប់ពីច្រមុះជ្រូករង្វង់មូលកួចកាណុង ដល់ផ្លូវលេខ៨០ ព្រមទាំងរៀបចំផ្លូវឯកទិសលើផ្លូវលេខ៤៧ ទិសដៅឆ្ពោះទៅវត្តភ្នំ ចាប់ពីរង្វង់មូលកួចកាណុង ដល់ផ្លូវលេខ៨០។ ចំណុចកែសម្រួលមួយទៀត គឺការរៀបចំផ្លូវទ្វេទិស មានទិសដៅទៅមក ចាប់ពីផ្លូវលេខ៨០ ដល់រង្វង់មូលវត្តភ្នំ។
បើតាមរដ្ឋបាលរាជធានីភ្នំពេញ គម្រោងនេះ នឹងដាក់ឱ្យដំណើរការសាកល្បង ចាប់ពីថ្ងៃទី៧ ខែមិថុនា ឆ្នាំ២០២៤នេះ៕
© រក្សាសិទ្ធិដោយ thmeythmey.com