អន្តរជាតិ
កូរ៉េខាងជើង បង្ហោះប៉េតប៉ោងផ្ទុកសំរាមទៅកូរ៉េខាងត្បូងជាថ្មី
× ប៉េតប៉ោងរាប់សិបដែលបង្ហោះដោយកូរ៉េខាងជើង ត្រូវបានប្រទះឃើញជាថ្មីនៅក្នុងទីក្រុងសេអ៊ូល និងខេត្ត Gyeonggi នៅថ្ងៃទី៩ ខែមិថុនា។ អាជ្ញាធរកូរ៉េខាងត្បូង ក៏ប្រញាប់ស្វែងរកប៉េតប៉ោងទាំងនេះ ជាមួយការព្រមានទីក្រុងព្យុងយ៉ាងចំពោះទង្វើបង្ករឿងបែបនេះ។
បើតាមយោធាកូរ៉េខាងត្បូង កូរ៉េខាងជើងបានបញ្ជូនប៉េតប៉ោងដែលត្រូវសន្មត់ថាមានផ្ទុកដោយសំរាមទៅកាន់កូរ៉េខាងត្បូងនៅថ្ងៃទី៨ ខែមិថុនា បន្ទាប់ពីបានបាញ់បង្ហោះប៉េតប៉ោងប្រមាណ១ពាន់រួចហើយឆ្លងកាត់ព្រំដែនចាប់តាំងពីសប្តាហ៍មុន។
តាមពិតទៅ ទីក្រុងព្យុងយ៉ាង បានប្រកាសផ្អាកបញ្ជូនប៉េតប៉ោងនេះម្ដងហើយ ក្រោយទីក្រុងសេអ៊ូលគំរាម។ ការបញ្ជូនប៉េតប៉ោងលើកនេះ ទំនងជាឆ្លើយតបនឹងសកម្មជនកូរ៉េខាងត្បូងដែលបានបង្ហោះប៉េតប៉ោងធំៗដែលផ្ទុកក្រដាសការឃោសនាប្រឆាំងក្រុងព្យុងយ៉ាងទៅខាងជើងនៅចន្លោះថ្ងៃទី៦ និងទី៧ កន្លងទៅ។
នៅរដ្ឋធានីសេអ៊ូល អាជ្ញាធររកឃើញប៉េតប៉ោងចំនួន៣០ គិតត្រឹមម៉ោង៨ព្រឹក។ ចំណែកខេត្ត Gyeonggi និងទីក្រុង Incheon ដែលជាទីក្រុងកំពង់ផែភាគខាងលិចនៃទីក្រុងសេអ៊ូលក៏បានរាយការណ៍ពីវត្តមានប៉េតប៉ោងនៅកន្លែងផ្សេងៗ រួមទាំងនៅសមុទ្រលឿង និងតំបន់លំនៅដ្ឋានផ្សេងទៀតនៅភាគខាងត្បូងនៃព្រំដែនជាមួយកូរ៉េខាងជើង។
រហូតមកដល់ពេលនេះ មិនទាន់មានរបាយការណ៍ពីមនុស្សរងរបួស ឬខូចខាតទ្រព្យសម្បត្តិនៅឡើយទេ។ នេះបើតាមទីភ្នាក់ងារព័ត៌មាន Yonhap ។ អាជ្ញាធរកូរ៉េខាងត្បូង បានណែនាំពលរដ្ឋកុំឱ្យប៉ះវត្ថុទាំងនោះ ហើយរាយការណ៍ទៅអាជ្ញាធរយោធា ឬប៉ូលិសដែលនៅក្បែរនោះ។
រដ្ឋាភិបាលកូរ៉េខាងត្បូង ក៏ធ្វើប្រតិបត្តិការក្រុមឆ្លើយតបបន្ទាន់ ដើម្បីធានាសុវត្ថិភាពសាធារណៈ និងពិគ្រោះយោបល់ជាមួយយោធាដើម្បីឈានដល់វិធានការជាមូលដ្ឋានប្រឆាំងនឹងយុទ្ធនាការប៉េតប៉ោងម្តងហើយម្តងទៀតរបស់ទីក្រុងព្យុងយ៉ាង។
ជាមួយគ្នានេះ ក្រសួងការពារជាតិកូរ៉េខាងត្បូងបានចេញបញ្ជាបន្ទាន់មួយឱ្យកងទ័ពទាំងអស់នៅក្នុងប្រុងជើងការដែរ៕
Tag:
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com