មនុស្សរាប់ពាន់នាក់បានតវ៉ានៅក្នុងរដ្ឋធានីយ៉េរ៉េវ៉ាន់ ដោយទាមទារឱ្យមានការដាក់ទោស និងដកតំណែងនាយករដ្ឋមន្ត្រី ដើម្បីប្រឆាំងនឹងការប្រគល់ភូមិនៅជាប់ព្រំដែនចំនួន៤ ដែលអាមេនីគ្រប់គ្រងចាប់តាំងពីទសវត្សរ៍ឆ្នាំ១៩៩០ ទៅឱ្យអាស៊ែបៃហ្សង់។
មនុស្សរាប់ពាន់នាក់ដែលដឹកនាំដោយមេសាសនាកាតូលិក Bagrat Galstanyan បានប្រមូលផ្តុំគ្នានៅទីលានកណ្តាលនៃរដ្ឋធានីយ៉េរ៉េវ៉ាន់របស់អាមេនីកាលពីថ្ងៃទី៩ ខែមិថុនា។ លោក Galstanyan ជាអ្នកដឹកនាំព្រះវិហារក្នុងតំបន់ Tavush ដែលជាកន្លែងដែលភូមិជាប់ព្រំដែនចំនួន៤ ត្រូវបានប្រគល់មកវិញដោយអាមេនីទៅកាន់អាស៊ែបៃហ្សង់។
លោក Galstanyan បានរិះគន់នាយករដ្ឋមន្រ្តី Nikol Pashinyan ថាជាអ្នកសុំទានដែលបានស្វែងរកសន្តិភាពជាមួយប្រជាជនអាស៊ែបៃហ្សង់ ក្នុងភាពអាម៉ាស់ចំពោះប្រជាជនរបស់ប្រទេសខ្លួន។ លោកបានអំពាវនាវឲ្យសភាបើកសម័យប្រជុំពេញអង្គវិសាមញ្ញក្នុងសប្តាហ៍នេះ ដើម្បីចោទប្រកាន់នាយករដ្ឋមន្ត្រី។
លោក Galstanyan និយាយថា ៖« តាមការស្នើសុំរបស់ប្រជាជន សមាជិកសភាត្រូវតែបោះឆ្នោតដើម្បីបង្ខំឲ្យរដ្ឋាភិបាលចាស់លាលែង និងបង្កើតរដ្ឋាភិបាលថ្មី។ រដ្ឋាភិបាលបណ្តោះអាសន្ននឹងធ្វើការបោះឆ្នោតសភាមុនកាលកំណត់»។ នេះបើតាមសារព័ត៌មាន AFP។
ទីតាំងភូមិ Baghanis Ayrim, Ashagi Askipara, Kheyrimli និង Gizilhajili នៅតំបន់ព្រំដែននៃប្រទេសអាស៊ែបៃហ្សង់ និងអាមេនី។ ក្រាហ្វិក ៖ Top-center
កំហឹងតវ៉ារបស់ប្រជាជនអាមេនីបានផ្ទុះឡើងនៅក្នុងខែមេសា នៅពេលដែលរដ្ឋាភិបាលអាមេនី និងអាស៊ែបៃហ្សង់បានយល់ព្រមកំណត់ព្រំដែនប្រវែង ១២,៧គីឡូម៉ែត្រ។ អាមេនីបានយល់ព្រមប្រគល់ត្រឡប់ទៅអាស៊ែបៃហ្សង់វិញនូវភូមិចំនួន៤គឺ Baghanis Ayrum, Ashaghi Askipara, Kheyrimli និង Ghizilhajili ដែលពួកគេបានកាន់កាប់តាំងពីទសវត្សរ៍ឆ្នាំ១៩៩០ ។
តំបន់ដែលបានប្រគល់ត្រូវបានចាត់ទុកថាជាយុទ្ធសាស្ត្រសំខាន់សម្រាប់អាមេនី ព្រោះវាបិទផ្លូវហាយវ៉េសំខាន់ៗដែលតភ្ជាប់ទៅហ្សកហ្ស៊ី។ អ្នកស្រុកអាមេនីដែលតាំងទីលំនៅក្បែរនោះ និយាយថា ចំណាត់ការរបស់រដ្ឋាភិបាលបានបំបែកពួកគេចេញពីប្រទេសផ្សេងទៀត ដោយចោទប្រកាន់នាយករដ្ឋមន្ត្រី Pashinyan ពីបទប្រគល់ទឹកដីនេះទៅឱ្យអ្នកជិតខាងរបស់ពួកគេ។
លោក Pashinyan បានការពារការសម្រេចចិត្តរបស់រដ្ឋាភិបាលដោយបញ្ជាក់ថា ការដោះស្រាយជម្លោះព្រំដែនជាមួយអាស៊ៃបៃហ្សង់ ជាមធ្យោបាយតែមួយគត់ដើម្បីធានាបាននូវអត្ថិភាពរបស់អាមេនីនៅក្នុងព្រំដែនស្របច្បាប់ និងទទួលស្គាល់ជាអន្តរជាតិ។ ទោះជាយ៉ាងណាក៏ដោយ ការពន្យល់នេះមិនត្រូវបានទទួលយកដោយជនជាតិអាមេនីជាច្រើននាក់នោះទេ។
លោក Galstanyan បានបោះបង់ភាពជាបុព្វជិតរបស់លោកបណ្តោះអាសន្ន ដើម្បីឈរឈ្មោះជានាយករដ្ឋមន្ត្រី។ ទោះជាយ៉ាងណាក៏ដោយ លោកមិនមានសិទ្ធិកាន់តំណែងនេះតាមច្បាប់អាមេនី ដោយសារតែលោកមានសញ្ជាតិពីរ៕