អន្តរជាតិ
អុីស្រាអែលថា ខ្លួនអាចធ្វើឱ្យលីបង់ទៅជាយុគថ្មវិញបាន ខណៈ UN ព្រមានហានិភ័យជម្លោះ ![](https://image.thmeythmey.com/pictures/2024/06/27/b.jpg)
×![]()
ប្រមុខការពារជាតិអ៊ីស្រាអែលនិយាយថា ប្រទេសលោកមិនចង់បានសង្រ្គាមនៅលីបង់ ប៉ុន្តែអាចបញ្ជូនប្រទេសជិតខាងរបស់ខ្លួនមួយត្រលប់ទៅយុគសម័យថ្មវិញបាន បើសង្រ្គាមផ្ទុះដោយចៀសមិនរួច។ ស្របពេលស្ថានការណ៍កាន់តែតានតឹង ប្រធានផ្នែកមនុស្សធម៌របស់អង្គការសហប្រជាជាតិបានព្រមានថា ជម្លោះបែបនេះនឹងក្លាយជាភាពអាត្មានិយម។
ព្រំដែនអ៊ីស្រាអែល និងលីបង់ កំពុងប្រទះការបាញ់បោះទៅជារៀងរាល់ថ្ងៃរវាងកងកម្លាំងអ៊ីស្រាអែល និងក្រុមសកម្មប្រយុទ្ធ Hezbollah ដែលគាំទ្រដោយអ៊ីរ៉ង់។ អ្វីដែលគួរឱ្យបារម្ភនោះ ការបាញ់បោះនេះ អាចកើនទំហំទៅជាសង្រ្គាមពេញបន្ទុក ដែលធ្វើឱ្យស្ថានការណ៍តំបន់មជ្ឈិមបូព៌ាដែលកំពុងសោកសៅដោយជម្លោះអ៊ីស្រាអែល-ហាម៉ាស់ កាន់តែធ្ងន់ធ្ងរ។
អ៊ីស្រាអែលក៏ធ្លាប់ប្រកាសដែរថា ខ្លួនមានផែនការសម្រាប់ការវាយលុកនៅលីបង់ថែមទៀត។ មេដឆកនាំក្រុម Hezbollah លោក Hassan Nasrallah ក៏ព្រមានអ៊ីស្រាអែលវិញដែរ។
រដ្ឋមន្ត្រីការពារជាតិអ៊ីស្រាអែល Yoav Gallant បាននិយាយក្នុងអំឡុងដំណើរទស្សនកិច្ចទៅកាន់ទីក្រុងវ៉ាស៊ីនតោនកាលពីថ្ងៃទី២៦ មិថុនា ថា ប្រទេសរបស់លោកអាចយកលីបង់ត្រឡប់ទៅយុគសម័យថ្មវិញ ប៉ុន្តែមិនចង់ធ្វើវាទេ។ លោកប្រាប់អ្នកសារព័ត៌មានថា អ៊ីស្រាអែលមិនចង់បានសង្រ្គាមទេ ប៉ុន្តែយើងកំពុងរៀបចំសម្រាប់គ្រប់សេណារីយ៉ូ"។
«ក្រុម Hezbollah យល់យ៉ាងច្បាស់ថា យើងអាចផ្ដល់ការខូចខាតដ៏ធំនៅលីបង់ ប្រសិនបើសង្រ្គាមត្រូវបានចាប់ផ្តើម។» ប្រមុខការពារជាតិអ៊ីស្រាអែលបញ្ជាក់បែបនេះ។
សម្ព័ន្ធមិត្តរបស់អ៊ីស្រាអែល រួមទាំងអាម៉េរិកផង មិនចង់បានជម្លោះមួយទៀតឡើយ។ ទីក្រុងវ៉ាស៊ីនតោន ក៏ជជែកជាមួយអ៊ីស្រាអែល លីបង់ និងតួអង្គដទៃទៀតលើរឿងនេះដែរ។ ជាមួយគ្នានេះ រដ្ឋមន្ត្រីការពារជាតិអាមេរិក ឡយ អូស្ទីន ប្រាប់លោក Gallant នៅថ្ងៃទី២៦ ខែមិថុនាថា សង្រ្គាមមួយផ្សេងទៀតជាមួយក្រុម Hezbollah អាចមានផលវិបាកដ៏អាក្រក់សម្រាប់មជ្ឈិមបូព៌ា ហើយលោកជំរុញឱ្យមានដំណោះស្រាយការទូត។
ខណៈដែលស្ថានការណ៍តានតឹងទៅៗ អ្នកសម្របសម្រួលផ្នែកមនុស្សធម៌របស់អង្គការសហប្រជាជាតិ Martin Griffiths បានប្រាប់អ្នកយកព័ត៌មាននៅទីក្រុងហ្សឺណែវនៅថ្ងៃទី២៦ ថា លីបង់គឺជាចំណុចភក្ដៅជាងបញ្ហាផ្សេងទៀត។ លោកចាត់ទុកជម្លោះណាមួយ ជារឿងដ៏បំផ្លិចផ្លាញបំផុត ហើយ
សង្រ្គាមដែលពាក់ព័ន្ធនឹងប្រទេសលីបង់ នឹងអូសទាញស៊ីរីដែរ៕
© រក្សាសិទ្ធិដោយ thmeythmey.com