កីឡាជាតិ
ជាតិ
FFC ប្តូរកៅអីស្តាតអូឡាំពិកថ្មីស្របតាម FIFA ដោយយកទម្រង់រចនាបថខ្មែរ ![](https://image.thmeythmey.com/pictures/2024/01/18/front-_________________________ffc.jpg)
×![]()
ទីបំផុតសហព័ន្ធកីឡាបាល់ទាត់កម្ពុជា (FFC) រកឃើញជ័យលាភីការរចនាប្លង់កៅអីពហុកីឡដ្ឋានជាតិអូឡាំពិកហើយ។ មិនបង្អង់យូរ ការផ្លាស់ប្តូរកៅអីមានបង្អែក ដើម្បីឱ្យស្របតាមគោលការណ៍សហព័ន្ធកីឡាបាល់ទាត់អន្តរជាតិ (FIFA) និងអាស៊ី (AFC) ចាប់ផ្តើមដំណើរការតែម្តង។
តាមរយៈការបង្ហោះរបស់ FFC បានជ្រើសរើសរចនាប្លង់កៅអីកីឡដ្ឋានថ្មី របស់លោក ហោ មណីឬទ្ធិ ដែលជាជ័យលាភីការរចនាប្លង់នេះ ក្រោយទទួលបានការគាំទ្រពីអ្នកគាំទ្រច្រើនជាងគេ។ យ៉ាងណា ប្លង់របស់លោក មណីឬទ្ធិ ក៏ត្រូវបានកែសម្រួលពីអ្នករចនារបស់ FFC បន្ថែមផងដែរមុនសម្រេចយកទៅប្រើប្រាស់។
មុនសម្រេចចុងក្រោយ ក្នុងដំណើរការផ្លាស់ប្តូរកៅអីនេះ FFC បានប្រកាសរកអ្នកចង់បញ្ចេញស្នាដៃលើការរចនាប្លង់ក្នុងកីឡដ្ឋាន ដោយអ្នកដែលទទួលបានការជ្រើសរើសក្នុងការរៀបចំកៅអីឡើងវិញ នឹងទទួលបានការលើកទឹកចិត្តពី FFC ផងដែរ។
![](https://image.thmeythmey.com/pictures/2024/01/18/inside1.jpg)
តាមលក្ខខណ្ឌរបស់ AFC និង FIFA ដើម្បីអាចឱ្យពហុកីឡដ្ឋានជាតិនេះ ទទួលធ្វើជាម្ចាស់ផ្ទះក្នុងការប្រកួតអន្តរជាតិបាន តម្រូវឱ្យមានកៅអីដែលមានបង្អែក ដោយរុះរើកៅអីដែលមានសព្វថ្ងៃចេញវិញ។
កៅអីដែលគ្មានបង្អែកសព្វថ្ងៃ ត្រូវបានបំពាក់នៅមុនការប្រកួតកីឡាស៊ីហ្គេមលើកទី៣២។ បើទោះអាចទទួលរៀបចំស៊ីហ្គេមបានក្តី ប៉ុន្តែដោយសារទទួលបានការអនុគ្រោះពី AFC ប៉ុណ្ណោះ។ បើមានកៅអីផ្អែក នោះ FFC មិនបាច់ស្នើសុំ AFC ទៀតឡើយ នៅពេលរៀបចំប្រកួតអន្តរជាតិ។
ក្រោយទទួលបានកញ្ចប់ជំនួយពីសហព័ន្ធបាល់ទាត់អាស៊ាន (AFF) ការរចនា និងដំឡើងកៅអីថ្មី ដែលអាចផ្ទុកទស្សនិកជនសរុបចំនួន ៣០,០០០នាក់ គ្រោងនឹងបញ្ចប់ការដំឡើងនៅដើមឆ្នាំ ២០២៤នេះ៕
![](https://image.thmeythmey.com/pictures/2024/01/18/inside2.jpg)
Tag:
FFC
ពហុកីឡដ្ឋានជាតិអូឡាំពិក
© រក្សាសិទ្ធិដោយ thmeythmey.com