ជាតិ
ក្រឡានលក់តាមកញ្ជើនៅភ្នំពេញ ពិបាកប្រជែងជាមួយនំបញ្ចុក និងអាហារតាមផ្លូវផ្សេងទៀត
×![]()
ដោយ៖ ញ៉ សុខហឿន
ភ្នំពេញ៖ ពេលធ្វើដំណើរទៅតាមបណ្តាខេត្ត អ្នកភ្នំពេញមួយចំនួនតែងតែឈប់ទិញក្រឡាននៅតាមផ្លូវ ដោយដឹងច្បាស់ពីតំបន់ និងទីតាំងដែលលក់ក្រឡានឆ្ងាញ់ ដូចជានៅក្រចេះ កំពង់ឆ្នាំង កំពង់ចាម សៀមរាប បាត់ដំបង ជាដើម។ ប៉ុន្តែអ្នកដើរទូលលក់តាមកញ្ជើនៅភ្នំពេញ បែរជាត្អូញត្អែរ ថា អាហារបាយដំណើបចម្អិនក្នុងបំពង់ឫស្សីនេះ មិនសូវមានអ្នកទិញឡើយ។
អត្ថបទទាក់ទង
កាលពី៣ទៅ៤ឆ្នាំមុន អ្នកស្រី លាង អាចលក់ក្រឡាន បានពី១៣ទៅ១៥ម៉ឺនក្នុងមួយថ្ងៃ ប៉ុន្តែពេលនេះ គាត់ពិបាករកចំណូលខ្លាំងណាស់។ គាត់ត្អូញថា៖ «អ្នកលក់ច្រើនពេក ទាំងអ្នកលក់ក្រឡានដូចគ្នា រួមទាំងអ្នកលក់នំញ្ចុក ការ៉េម ជាដើម។ មួយថ្ងៃ លក់បាន១០ម៉ឺនរៀលយ៉ាងតឹង»។
វ័យខ្ទង់៤០ឆ្នាំ ស្ត្រីពីស្រុកកំពង់ត្រឡាច ខេត្តកំពង់ឆ្នាំងរូបនេះ ត្រូវក្រោកពីម៉ោង៤ភ្លឺ ដើម្បីដុតក្រឡាន ហើយរៀបចំយកមកលក់នៅភ្នំពេញ ដោយបន្តលក់រហូតដល់យប់ ជួនកាល ឈានដល់ម៉ោង១អធ្រាត្រ ទើបវិលត្រឡប់ទៅផ្ទះវិញ។
រៀងរាល់ថ្ងៃ អ្នកស្រី លាង ត្រូវក្រោកពីម៉ោង ៤ព្រឹកដើម្បីធ្វើនំហើយគាត់ត្រូវធ្វើរហូតដល់ម៉ោង៨ព្រឹកអី ទើបរៀបចំមកភ្នំពេញហើយបន្តលក់រហូតដល់យប់ ជូនកាលម៉ោង ១ យប់ទើបគាត់អាចត្រឡប់ទៅផ្ទះវិញ។
អ្នកស្រី លាង ស្ថិតក្នុងចំណោមស្ត្រី៤ទៅ៥នាក់ផ្សេងទៀត ដែលដើរលក់ក្រឡាន តាមកញ្ជើនៅមុខវាំង ជាពិសេសនៅពេលល្ងាច ពីព្រោះជាពេលវេលាដែលអ្នកដំណើរត្រូវការអាហារទ្រាប់ពោះ។ មើលទៅអ្នកលក់នំបញ្ចុក អ្នកលក់ការ៉េម អ្នកលក់ម្ជូ អ្នកលក់នំចំណី និងវត្ថុអនុស្សាវរីយ៍ផ្សេងទៀត ទទួលបានអតិថិជនឥតដាច់ តែមនុស្សទៅហួសមកហួសក្រឡានក្នុងកញ្ជើរបស់អ្នកស្រី លាង។
ក្រឡានមួយ មានតម្លៃពី៣ ទៅ៥០០០រៀល ក្រោយដកចំណាយថ្លៃឡានឈ្នួលពីកំពង់ឆ្នាំងមកភ្នំពេញ ថ្លៃហូប និងចំណាយលើគ្រឿងផ្សំផ្សេងៗទៀត គឺអ្នកស្រីលាងចំណេញបានតែពី៣ ទៅ៤ម៉ឺនរៀលប៉ុណ្ណោះក្នុងមួយថ្ងៃ។
ស្ថានភាពក៏មិនសូវខុសគ្នាប៉ុន្មានឡើយសម្រាប់អ្នកលក់មួយរូបទៀតមកពីខេត្តកំពង់ឆ្នាំង។ អ្នកស្រី សាំ សាវឿន ដែលប្រកបរបរជាអ្នកលក់ក្រឡានតាមផ្លូវជិត១០ឆ្នាំ ក៏មានតម្អូញបែបនេះដែរ។ ទោះលក់បានប្រាក់ចំណេញតិចតួច ប៉ុន្តែអ្នកស្រីចង់ឱ្យគ្រប់គ្នាគាំទ្រផលិតផលខ្មែរ។
« អ៊ំគ្មានកូនណាចិញ្ចឹមទេ មានតែពីរប្រពន្ធប្រពន្ធតទល់បើមិនរក ច្បាស់ជាគ្មានលុយសងធនាគារឡើយ»។ អ្នកស្រីបានបញ្ជាក់យ៉ាងដូច្នេះ ខណៈបច្ចុប្បន្នក្រឡានដែលអ្នកស្រីដើរលក់ពី៤០០០ទៅ៥០០០រៀល ពិបាករកអ្នកទិញណាស់។ «បើគិតទាំងថ្លៃដើម ថ្លៃពលកម្មយើងមិនចំណេញច្រើនឡើយ ហើយក្រឡាននេះ ក៏មិនងាយធ្វើនោះដែរ»។គាត់បានបន្ថែមយ៉ាងដូច្នេះ៕
© រក្សាសិទ្ធិដោយ thmeythmey.com
