ជាតិ
ប្រធានក្រុមប្រឹក្សាទឹកពិភពលោក ប្ដេជ្ញាលើកកម្ពស់គោលនយោបាយសន្តិសុខទឹកនៅទូទាំងពិភពលោក
លោក លោក Loic Fauchon ប្រធានក្រុមប្រឹក្សាទឹកពិភពលោក
×![]()
ដោយ: ផាត ដាណេ
ឥណ្ឌូណេស៊ី៖ នាពិធីបើកវេទិកាទឹកពិភពលោកលើកទី១០ (The 10th World Water Forum) នៅព្រឹកថ្ងៃទី២០ ខែឧសភា នៅមជ្ឈមណ្ឌលសន្និបាតអន្តរជាតិ Bali Nusa Dua Convention Centre លោក Loic Fauchon ប្រធានក្រុមប្រឹក្សាទឹកពិភពលោក បានបង្ហាញការប្ដេជ្ញាចិត្តលើកកម្ពស់គោលនយោបាយសន្ដិសុខទឹកទូទាំងពិភពលោក និងអំពាវនាវឱ្យប្រទេសទាំងអស់បញ្ចូលសិទ្ធទទួលបានទឹកក្នុងរដ្ឋធម្មនុញ្ញ និងច្បាប់ផងដែរ។
លោក Loic Fauchon បានអះអាងថា តម្រូវការទឹកត្រូវបានកើនឡើងកាន់តែច្រើនលើសកលលោកនាពេលបច្ចុប្បន្ន។ នោះក៏ព្រោះ កំណើននៃឥទ្ធិពលអាកាសធាតុ ប្រជាជន នគរូបនីយកម្ម និងកម្រិតជីវភាពរបស់ពលរដ្ឋផងដែរ។ ហេតុដូច្នេះហើយ ធនធានទឹកក៏ត្រូវការការអភិរក្ស ថែរក្សា និងការប្រើប្រាស់ដោយប្រុងប្រយ័ត្ន និងត្រឹមត្រូវផងដែរ។
ប្រធានក្រុមប្រឹក្សាទឹកពិភពលោកបានបញ្ជាក់ថា ការអភិរក្សធនធានទឹកនាពេលបច្ចុប្បន្ន គឺពិតជាសំខាន់ ដោយផ្នែកលើវិស្វកម្ម បច្ចេកវិទ្យា រួមជាមួយនឹងការច្នៃប្រឌិតឌីជីថល។ ទន្ទឹមនឹងនេះ លោក Loic Fauchon ក៏ជំរុញឱ្យបង្កើនការសាងសង់អាងស្តុកទឹក ការផ្ទេរទឹក ការប្រើប្រាស់ទឹកក្រោមដីដោយប្រុងប្រយ័ត្ន រួមទាំងការប្រើប្រាស់ទឹកសំណល់ឡើងវិញផងដែរ។
«យើងត្រូវគ្រប់គ្រងការប្រើប្រាស់ទឹកឱ្យបានដិតដល់តាមដែលអាចធ្វើទៅបាន តាមដានការលេចធ្លាយ សម្អាត ការបំពុល និងផ្លាស់ប្តូរឥរិយាបថប្រចាំថ្ងៃ មិនថាផ្នែកកសិកម្ម ប្រើប្រាស់ក្នុងស្រុក និងឧស្សាហកម្មនោះឡើយ»។ នេះជាការលើកឡើងរបស់លោក Loic Fauchon ដោយបន្តថា ទឹកសម្រាប់មនុស្ស និងធម្មជាតិ ត្រូវមានសមតុល្យដ៏ត្រឹមត្រូវ ដើម្បីធានាសុវត្ថិភាពទឹក។
ប្រធានក្រុមប្រឹក្សាទឹកពិភពលោករូបនេះ បានប្ដេជ្ញាលើកកម្ពស់គោលនយោបាយសន្តិសុខទឹកនៅទូទាំងពិភពលោក និងចង់បង្កើនការរចនា និងការអនុវត្តដំណោះស្រាយផ្អែកលើធម្មជាតិ។ លោក ក៏ចង់ឃើញមានការកែប្រែអាកប្បកិរិយា និងផ្លាស់ប្តូរទម្លាប់លើការប្រើប្រាស់ទឹក ហើយអ្នកបង្កើតសម្ព័ន្ធថវិកាសម្រាប់ទឹកអាចលុបចោលបំណុលទឹកសម្រាប់ប្រទេសក្រីក្របំផុត ដែលបង្ហាញក្នុងសន្និសីទរបស់អង្គការសហប្រជាជាតិ។
លើសពីនេះ លោក Loic អំពាវនាវឱ្យប្រទេសទាំងអស់បញ្ចូលសិទ្ធទទួលបានទឹកក្នុងរដ្ឋធម្មនុញ្ញជាតិ ច្បាប់ និងសមាមាត្រខ្ពស់នៃមូលនិធិអាកាសធាតុផ្សេងៗ រួមទាំងសកម្មភាពអន្តរជាតិ ដើម្បីធានាឱ្យកាន់តែសកម្ម អភិបាលកិច្ចផ្អែកលើកិច្ចសហប្រតិបត្តិការពហុភាគី ដែលមានសារៈសំខាន់ផងដែរសម្រាប់ការពង្រឹងច្បាប់នៃការសម្របសម្រួលសម្រាប់ទន្លេ បឹង និងអាង៕
អត្ថបទនេះផលិតឡើងជាផ្នែកមួយនៃ World Water Forum Media Fellowship ដែលគាំទ្រដោយអង្គការ Internews, បណ្ដាញអ្នកសារព័ត៌មានផែនដី (Earth journalism Network) និងដៃគូទឹកអូស្រ្តាលី (Australian Water Partnership)។
Tag:
វេទិកាទឹកពិភពលោក
© រក្សាសិទ្ធិដោយ thmeythmey.com
