ជាលើកដំបូងចាប់តាំងពីឆ្នាំ២០១៩ មេដឹកនាំកូរ៉េខាងត្បូង ជប៉ុន និងចិន បានជួបគ្នាជាថ្មីនៅក្រុងសេអ៊ូល ដោយបានលើកពីប្រធានបទជាច្រើនទៅជជែក ក្នុងនោះមានដូចជាកូរ៉េខាងជើង ពាណិជ្ជកម្ម បច្ចេកវិទ្យា និងអត្រាកំណើតធ្លាក់ទាបជាដើម។ ការរំសាយអាវុធនុយក្លេអ៊ែរ និងសន្តិភាពលើឧបទ្វីបកូរ៉េ ក៏ជាប្រធានបទដ៏សំខាន់មួយ ក្នុងជំនួបត្រីភាគីនេះដែរ។ 

 

«យើងបញ្ជាក់ជាថ្មីថា ការថែរក្សាសន្តិភាព, ស្ថិរភាព និងវិបុលភាពលើឧបទ្វីបកូរ៉េ និងតំបន់អាស៊ីភាគឦសាន ជាផលប្រយោជន៍រួម និងការទទួលខុសត្រូវរួមរបស់យើង»។ សេចក្តីថ្លែងការណ៍រួមរបស់មេដឹកនាំកូរ៉េខាងត្បូង ជប៉ុន និងចិន ចេញនៅថ្ងៃទី២៧ ខែឧសភា បានសង្កត់ធ្ងន់បែបនេះ ដោយបន្តជំហរក្នុងការរំសាយកម្មវិធីនុយក្លេអ៊ែរលើឧបទ្វីបកូរ៉េ និងបញ្ហាចាប់ជំរិត។ 

 

ទន្ទឹមនេះ នាយករដ្ឋមន្រ្តីចិន លោក លី ឈាំង, ប្រធានាធិបតីកូរ៉េខាងត្បូង លោក យូន សុកយ៉ល និងនាយករដ្ឋមន្រ្តីជប៉ុន លោក គីស៊ីដា ហ្វូមីអូ បានសន្យាបន្តពីពង្រីកកិច្ចសហប្រតិបត្តិការជាមួយអាស៊ាន រួមទាំងគាំទ្រឡាវ ធ្វើជាប្រធានផ្លាស់វេនអាស៊ាននៅក្នុងឆ្នាំ២០២៤។ 

 

មេដឹកនាំប្រទេសទាំង៣ បានប្តេជ្ញាពន្លឿនកិច្ចចរចាលើកិច្ចព្រមព្រៀងពាណិជ្ជកម្មសេរី ដែលបានផ្អាកចាប់តាំងពីឆ្នាំ២០១៩ មក បន្ទាប់ពីកិច្ចចរចាចំនួន ១៦លើក។ កិច្ចចរចាលើកិច្ចព្រមព្រៀងពាណិជ្ជកម្មសេរី បានចាប់ផ្តើមឡើង នៅក្នុងឆ្នាំ២០១២។ 

 

ស្របពេលមានជំនួបត្រីភាគីរៀបចំឡើង កូរ៉េខាងជើង បានជូនដំណឹងទៅជប៉ុនពីការបាញ់បង្ហោះគ្រាប់រ៉ុក្កែតបំពាក់ផ្កាយរណបចារកិច្ច នៅមុនថ្ងៃទី៤ ខែមិថុនា។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។

 

ក្នុងអំឡុងកិច្ចប្រជុំ លោក គីស៊ីដា និងលោកយូន បានរិះគន់ផែនការបាញ់បង្ហោះគ្រាប់រ៉ុក្កែតបំពាក់ផ្កាយរណបចារកិច្ចរបស់កូរ៉េខាងជើង ហើយបានចាត់ទុកជាការបំពានសេចក្តីសម្រេចក្រុមប្រឹក្សាសន្តិសុខ៕