កម្មវិធីទូរសព្ទដៃ « កំណត់ត្រាទឹកនោមផ្អែម CarnetDia » បានទទួលការគាំទ្រពីមជ្ឈមណ្ឌលកម្ពុជា៤.0 និងសមាគមបច្ចេកវិទ្យាទឹកនោមផ្អែម និងក្រពេញកម្ពុជា។ តាមទិន្នន័យ មានពលរដ្ឋចំនួន ២៤ ៥០៦នាក់ បានប្រើប្រាស់កម្មវិធីទូរសព្ទដៃមួយនេះ ក្នុងនោះមានអ្នកប្រើប្រព័ន្ធ IOS ចំនួន ១១​ ២៤១នាក់ និងចំនួន ១៣ ២៦៥ ពីអ្នកប្រើប្រព័ន្ធAndroid ។ ដោយឡែក អ្នកជំងឺទឹកនោមផ្អែមដែលបានកត់ត្រាទុកជាតិស្ករ មានចំនួន ៣ ៥៣៨នាក់  ក្នុងនោះស្រ្តីមានចំនួន ២ ៣៧២នាក់ និងបុរស​ ចំនួន ១ ១៦៦នាក់។
  

លោក ស៊ុំ សត្ថា វេជ្ជបណ្ឌិតឯកទេសជំងឺទឹកនោមផ្អែម ដែលជាស្ថាបនិកកម្មវិធីទូរសព្ទដៃ «CarnetDia» ថា កម្មវិធីទូរសព្ទនេះ បានជួយដល់អ្នកជំងឺទឹកនោមផ្អែម និងផ្ដល់អត្ថប្រយោជន៍ជាច្រើនដល់អ្ន​កជំងឺនិងសាច់ញាតិ។ ស្ថាបនិករូបនេះ បានបន្ថែមថា អ្នកប្រើប្រាស់កម្មវិធីមួយនេះភាគច្រើនស្ថិតក្នុងវ័យកណ្ដាល។ 
 

លោកវេជ្ជបណ្ឌិត ស៊ុំ សត្ថា បានអះអាងថា ៖ «យើងឃើញថាអ្នកជំងឺទឹកនោមផ្អែមដែលបានកត់ត្រាជាតិស្ករក្នុងទូរសព្ទដៃ  គាត់លែងប្រើប្រាស់ប៊ិចក្រដាសទៀតហើយ គាត់អាចផ្ញើទិន្នន័យរបស់គាត់ទៅគ្រូពេទ្យយ៉ាងងាយស្រួល។ អ្នកដែលចូលចិត្តប្រើកម្មវិធីនេះ គឺចន្លោះអាយុពី៣០-៣៩ឆ្នាំ តែទោះបីយ៉ាងណាក៏ដោយក៏មានចំនួនមនុស្សចាស់ប្រើប្រាស់ដែរ ដោយមានការជួយពីសាច់ញាតិរបស់គាត់» ។ 

 

កម្មវិធី«CarnetDia កំណត់ត្រាទឹកនោមផ្អែម»  មានមុខងារសំខាន់ៗ ដែលធ្វើឱ្យលោកអ្នកទទួលបានអត្ថប្រយោជន៍ជាច្រើន រួមមាន៖ វីដេអូ រូបភាព និង អត្ថបទ អប់រំអំពីជំងឺទឹកនោមផ្អែម, ការកត់ត្រាតេស្ដជាតិស្ករ, រាប់ជំហាន ដែលជួយលើកទឹកចិត្តអ្នកជំងឺ ឱ្យធ្វើលំហាត់ប្រាណជាប្រចាំ។ ការវាយតម្លៃលើហានិភ័យជំងឺទឹកនោមផ្អែមប្រភេទទី២  និងមុខងារវេជ្ជបណ្ឌិត (Telemedicine) សម្រាប់អ្នកជំងឺ និងវេជ្ជបណ្ឌិតទំនាក់ទំនងគ្នាជាប្រចាំ។ 
 

សាធារណជនអាចទាញយក App កំណត់ត្រាទឹកនោមផ្អែមឈ្មោះថា«CarnetDai» ដោយឥតគិតថ្លៃ ពី AppStoreតាមតំណនេះ​https://apps.apple.com និងពី Play Storeតាមរយៈតំណនេះ https://play.google.com ៕​