នាវាផ្ទុកយន្តហោះដើរដោយថាមពលនុយក្លេអ៊ែររបស់អាម៉េរិក ចូលចតនៅមូលដ្ឋានទ័ពជើងទឹកកូរ៉េខាងត្បូងក្នុងទីក្រុង Busan ដែលមានចម្ងាយ៣២០គីឡូម៉ែត្រភាគអាគ្នេយ៍រដ្ឋធានីសេអ៊ូលនៅព្រឹកថ្ងៃទី២២ ខែមិថុនា។ នាវានេះអមដោយនាវាពិឃាត USS Halsey និង USS Daniel Inouye។ នេះបើយោងតាមកងទ័ពជើងទឹកកូរ៉េខាងត្បូង។

 

នេះជាលើកដំបូងក្នុងពេល៧ខែដែលនាវាផ្ទុកយន្តហោះអាម៉េរិកចូលចត្តនៅកូរ៉េខាងត្បូងចាប់តាំងពីដំណើរទស្សនកិច្ចរបស់នាវាដឹកយន្តហោះ USS Carl Vinson ក្នុងខែវិច្ឆិកា។ 

 

បើតាមទីភ្នាក់ងារព័ត៌មានកូរ៉េខាងត្បូង Yonhap នាវា USS Theodore Roosevelt ទើបបញ្ចប់សមយុទ្ធកងទ័ពជើងទឹកត្រីភាគីរវាងកូរ៉េខាងត្បូង អាម៉េរិក និងជប៉ុនកាលពីខែមេសាកន្លងទៅ។ ប្រទេសទាំង៣ នឹងធ្វើសមយុទ្ធពហុភាគីត្រីភាគីចម្រុះវិស័យជាលើកដំបូងនៅចុងខែនេះ ដែលនឹងរួមសមយុទ្ធផ្លូវអាកាស សមុទ្រ ក្រោមទឹក និងតាមប្រព័ន្ធអ៊ីនធឺណិត។

 

សម្ព័ន្ធមិត្តទាំង៣ ហាក់បារម្ភទំនាក់ទំនងកាន់តែជិតស្និទ្ធរវាងទីក្រុងព្យុងយ៉ាង និងក្រុងមូស្គូ បន្ទាប់ពីមេដឹកនាំកូរ៉េខាងជើង គីម ជុងអ៊ុន និងប្រធានាធិបតីរុស្ស៊ី វ្ល៉ាឌីមៀ ពូទីន បានចុះហត្ថលេខាលើកិច្ចព្រមព្រៀងមួយដោយសន្យាការពារគ្នាទៅវិញទៅមកនៅក្នុងសង្រ្គាម។

 

ជុំវិញវត្តមាននាវាដឹកយន្តហោះអាម៉េរិក កងទ័ពជើងទឹកកូរ៉េខាងត្បូងនិយាយថា ដំណើរទស្សនកិច្ចចុងក្រោយនេះ ជាការអនុវត្តការប្តេជ្ញាចិត្តរបស់អាម៉រិកចំពោះកូរ៉េខាងត្បូង៕